TATPATMEI 16

Manna khatni Akhuaihna

1Isaraelmei nunc tei kaniw Izip khou rui tat patmei tangv kaneimei bw tuang zaeng 14mei nungc Elim khou rui tat thau datna Elim khatni Sinai chyng kak khou naimei Sin twna kawmei tazikramv khou guang the. 2Mi tazikramv khou tei kaniw rui Mousi lev Aron ta nut the. 3Kumna kaney khou sa the, “Ringhpouc rui aniw ta Izip kandic khou swluailou kham e thei gay nimei tuang e. Hei khou tei thu aniw dungc huamcna khav-zanh ni tu e, ramh baih baihmei ni tu ni saanv tuna lungh tu de. Tiki ndaapc tarina theih khang nangney rui aniw ta mi tazikramv khou hei nduangh guanglou di the.”

4 Ringhpouc rui Mousi khou sa the, “Ntaw thu ai rui tingkauh thangc rui nangniw khang taektw riu key puni the. Tingmik kathuic meic nunc tei kapaengc patna mi nungc khang tei biuh khang khuaiclou nina the. Kaniw ai rui samei theilayna taanc ny taanh mak ny zauc puni the.#Jhn 6.31 5Zaeng charukmei nungc tei thu baih baihmei tingmik tuang suangc kadam akhat mbuna khuaiclouna chamdaanv nina e.”

6Kumna Mousi lev Aron rui Isaraelmei kapwmna khou sa the, “Izip khou rui nangniw ta nduangh patmei hei Ringhpouc rui e twmei aseic zingbangc nangniw thay puni the. 7Lauthwan kiu Ringhpouc bammei tuang kahym gaanhmei riw kiu nangniw how puni the. Nangniw rui kata nutna sa bammei tei kamei chu the. Ngguay, nangniw rui nut bammei hei kata e kalam thu aney rui sw bammei hei thu kamei rui sa samei tei sw bammei tuang de.” 8Mi tangv Mousi rui sa the, “nangniw lauthwan ntyan tu nii na tumei zu tei tu khang tingzyn zanh tii nimeipu tei Ringhpouc e, kalam thu nangniw rui kata pian makna sa bammei tei kamei chu the. Nangniw rui aney ta nutna sa bammei tei Ringhpouc ta nutna sa bam tu e.”

9Mousi rui Aron khou sa the, “Isaraelmei kaguayna tei Ringhpouc hu khou guang ding khang sa tho, kalam thu kaniw rui pian makna sa bammei tei kamei rui chu the.” 10Aron rui meic guayna khou tei sa pwkhou, kaniw tazikramv biak thangc ziangrih pat the, hei khou tei thay mak daekna Ringhpouc tuang kahym gaanhmei riw muangh khou pat the. 11Ringhpouc rui Mousi khou sa the, 12“Isaraelmei nunc nutna sa bammei tei ai chu the. Tingzyn zingc kamv ramh ram khou zanh mphang puni the khatni lauthwan kaniw rui tu nii saanv tu khang ntyan mphang puni the twna kaniw khou sa ti tho. Khou tei, ai hei Ringhpouc e, ai hei kaniw Racguangc e twmei kaniw thay puni the.”

13Mi nungc tingzyn tei akhuaihna kangdai akhat samc guang the, zypui kailuangc tei tow padik the, khatni lauthwan kaniw zypui kailuangc tei zikdui rui padik the. 14Zikdui tei phui kan pwkhou mpu raih raimei lip syniang dic ruc khou nai duc the. Hei tei gunh nkangvloumei kumcna siamh siam na de. 15Hei tei Isaraelmei nunc rui how lana tabui cho twmei thay lam makna, “Mi hei tabui cho,” twna kaniw khat khat khou thanv the.#1 Ko 10.3

Mousi rui kaniw khou sa the, “Mi hei Ringhpouc rui nangniw tu khang tiimei taektw the. 16Mi hei meic kathuicna rui kakhang kakhang biuh mak saanv, khuaic tho, kumna kaikhunhmei meic kathuic khang handwang kanei kanei khuaic tho twna sa the.”

17Isaraelmei rui hei tei khuaic the, gaanvsaekc rui laalou geic the, gaanvsaekc rui laalou rau the. 18Kaniw hei tei ndath pwkhou khuaiclou geihmei nunc tei nai geic kasuan mak khe, khatni khuaiclou raumei nunc tei ni rau kasuan mak khe. Meic kathuicna kakhang kakhang biuhmei tei khuaiclou bam khwan the.#2 Ko 8.15 19“Meic gaanv khat na sini mi hei nthuanh khang nsaekclou nuh mak ge,” twna Mousi rui kaniw khou sa the.

20Tiki meic gaanvsaekc thu hei tei chulou makna asaekc nsaekclou the. Nthuanh lauthwan thau pwkhou hei tei nthanv rana di the khatni taamc namhsi the. Mousi rui kaniw ta kalungpuamc the. 21Lauthwan pum meic kathuicna kakhang kakhang biuh khang khuaic the; nsaekcloumei guay tei neih tanc pat pwkhou nungc dat kan the.

22Zaeng charukmei nungc kadam kanei, gaanv khat khang handwang padeih padeih khuaiclou the. Kaniw tuang kapy swmei guay tei guangna mi lam khou tei salou the, 23kumna Mousi rui kaniw khou sa the, “Nthuanh hei thu nthanmei nthaekcmei tingmik, Ringhpouc kakhou kat gutlou kanmei tingmik the twna kamei rui latdanv tii the. Nangniw rui tuzangvmei tuang suangc nimei guay tei aseic rui suangc tho. Tu nsaekcloumei guay tei nthuanh khang rylou nina the.”#Tat 20.8-11 24Mousi tuang latdanv theilayna tu nsaekcmei guay tei nthuanh khang lou the; hei tei kasic mak ge khatni nthanv gut mak ge. 25Mousi rui sa the, “Hei tei aseic hei tu tho, kalam thu aseic hei Sabbathneic, Ringhpouc khang katgutloumei nthaekcmei tingmik ge, kumna aseic hei nangniw khang kapaengc thangc taektw ariw pu lak khe. 26Zaeng charuk tei nangniw taektw khuaic nina e, tiki zaeng chaneimei nungc, nthaekcmei nungc thu hei tei nai dat ni tuang hamh the.”

27Zaeng chaneimei nungc kaniw gaanvsaekc thu taektw khuaih khang kapaengc pat the, tiki kaniw akhat na sini ariw mak khe. 28Hei khou tei Ringhpouc rui Mousi khou sa the, “Asaanh nang mei nunc hei alatdanv piu makna bam ni hena cho? 29Ringhpouc ai rui nthaekcmei tingmik hei tiiloumei tuang the twmei ningtow o, hei zaeng rui zaeng charukmei nungc neih nei tu biuh khang tii tanh tan puni. Zaeng chaneimei nungc tei meic kathuicna kamei kamei bammei bamv khou bam nina e. Kumna kakai kakai khou rui tat pat nuh mak ge.” 30Heikumna meic nunc tei zaeng chaneimei nungc taanvtaanh mak ge.

31Isaraelmei nunc rui mi taektw ta tei Manna twna kaw the. Hei tei makikuamc sunna thu mphwanmei kumc e, khatni nkhuaihdui loumei ntyan kumc e.#Sin 11.7,8 32Mousi rui sa the, “Ringhpouc kamei rui aniu ta Izip khou rui nduangh pat khou aniu tazikramv khou tu khang kamei rui tiimei taektw e twmei aniu tou nac nunc khou lyan bam khang manna asaekc rylou o twna kamei rui latdanv tii the.” 33Mousi rui Aron khou sa the, “Ramh haan akhat laana manna handwang kanei mi khou tei lou the, kumna lungc guang nimei aniu tou nac nunc khang rylou khang hei tei Ringhpouc bammei bamv khou tei rylou tho.”#Ibr 9.4 34Ringhpouc rui Mousi khou latdanv tiimei kumcna hei tei rylou nuh khang rui Aron rui hei tei Latdyng Khuk hu khou tei lou the. 35Kaniw rui guang lungc nimei bamv Kanaan kandic tei tangh mak saanv Isaraelmei nunc tei mi manna tei tingkwm 40 tu guang the.#Jos 5.12 36(Mi douc tei buanh akhat lev handwang 20 lev nchamc e.)

Currently Selected:

TATPATMEI 16: RONGBSI

Highlight

Copy