TATPATMEI 18

Jethro rui Mousi ta Ariwmei

1Isaraelmei ta Izip khou rui zaypat ni khou Ravguangc rui Mousi khou khatni kamei nunc khou taanclou kanmei lam guay tei Mousi now pu Jethro, Midianmei amuh rui chu the. 2Mousi rui kanow Zippora ta thouc ganc patmei tangv kanow pu Jethro rui,#Tat 2.21,22 3kanac nei ta lev twna laagutlou the. Kanac mpouh akhat zanc rui Gershom (kamei rui sa khwan e, “Ai hei ngginramc thangc ngginmei swna lungc tat the” ) twna phuaklou the.#Lat 7.29 4Izipmei guangc rui swluai nimei khou rui kata kanduaklou the twna gaanv khat zanc tei Eliezar twna phuaklou the. 5Gaanv khat zanc rui Eleazer (kamei rui sa khwan e, Izipmei guangc baengmun khou rui apu tuang Racguangc rui kanlou the.) twna phuaklou the. 6Kaniw guang puni twna Mousi khou kapouc rui tithay guang rey the, 7kum tina Mousi rui kata riw patna kahu khou nkhum keyna kata kaput the. Kaniw sucnu makna gayna bam dai cho twmei khat khat khou thanvna Mousi tuang pheykai khou gut the. 8Isaraelmei ta kanpatlou diu khang rui Ringhpouc rui Izipmei khatni kaniw tuang guangc khou taanclou kanmei guay tei Mousi rui Jethro khou raclou the. Kaniw chaeng khou ryanramei azuh ariw kanmei khatni Ringhpouc rui kaniw ta nkhavlou kanmei hei guay tei ni raclou the. 9Jethro tei mi guay tei chu pwkhou neihla the. 10Kumna kamei rui mundaw the, “Izipmei khatni Izip guangc baanc khou rui nang ta kanduakloumeipu Ringhpouc ta thuanc o! Katuang mei nunc ta bangh sw bammei khou rui kanloumeipu Ringhpouc ta thuanc o! 11Ringhpouc hei rav kaguayna khou rui daic liangmeipu the twmei ai thay the, kalam thu Izipmei rui Isaraelmei ta heidi malana sw bam khou kamei rui hei kumhmei taanv hei taanclou the.” 12Kapumc rawna khaeng khang khatni baihmei puatkat Ravguangc khang kat khang Jethro rui phungc guang the. Aron khatni Isaraelmei kapy guay Mousi theilayna kalummei taanv swna mi khaengmei taektw tei tu nchamc the.

Latzanpouc nunc Suangloumei

(Ria 1.9-18)

13Nthuanh thauna Mousi tei meic nunc khang latzanpouc swna khatni meic nunc tei rui kadaeng khou lauthwan khou rui tingzyn nganv dinghuamc bam khwan e. 14Mousi rui sw nimei taanv guay tei Jethro rui how lana kumna thanv e, “Nang rui meic nunc khang sw bammei kaguay hei akumhmei tuang cho? Nang ta kachuc khang meic nunc ta tei lauthwan khou rui zingbangc nganv tiding nkhwanlouna ramh guayna nang rana sw bammei thu tabui lwn cho?”

15Khoutei Mousi rui daw the, “Ai mi hei sw mak nuh makna the, kalam thu meic nunc Ravguangc chwn thanv khang akhou guang bam tuang the. 16Thowkumhmei agay agimei nai e thei kaniw akhou guang the kumna ai rui nkhuai nzih latzan swlou the kumna kaniw khou Ravguangc tuang latdanv khatni latdyn guay dinclou the.”

17Khoutei Jethro rui sa the, “Nang rui sw bammei thiak hei nchumh mak khe. 18Mi hei thu nang ni meic nunc ni lak puni the. Mi hei nang rana rui taanc ngam nimei taanv hamh the. 19Kumna ai rui lat gaymei akhat salou pumc e kumna Ravguangc rui nang ta nkhavlou puni. Nang hei Ravguangc hu khou meic nunc phaan dingmeipu swna kaniw tuang latlu patmei tei Ravguangc khou phungc guangmei hei nchumh the. 20Nang rui meic nunc khou tei Ravguangc tuang latdanv guay tei dinclou nina e kumna kaniw akumhna lungc nina cho khatni tabui tuang taanc nina cho twmei nchamlou tio. 21Hei ruc khou rui kapy sw nuhmei maansei nunc kapahna meic nunc tuang kapy tiswlou tho: meic 1000, 100, 50, khatni ruh tuang kapy swmei nunc lou tho. Kaniw tei Ravguangc ta pingmei, lwm nuhmei khatni lanvbiwmei laa lak nimei hei kumhmei nunc nina e. 22Kaniw tei latzanpouc nunc swna taanc bam nzut kan diu Kunghmei tuang latbamv guay thu kaniw rui nang khou phungc guang kan diu tiki lat lau launa guay thu kaniw rui katiamh kandiu. Hei tei rui kaniw rui nang puat phungc nkhavna nang khang chiwmaih puni the. 23Ravguangc tuang latdanv theilayna nang rui mi hei taanc e thei nang pumc ni si lak ge, kumna meic nunc ni kaniw tuang latzan nzanh luaina kakai kakai tat dat nuh puni.”

24Mousi rui Jethro tuang lat tei laana taanc the, 25Isaraelmei pang khou rui kapy sw nuhmei nunc kapah pat the. Kaniw ta tei meic 1000, 100, 50 khatni ruh kang tuang kapy nunc tiswlou the. 26Kaniw tei meic nunc tuang latzanpouc nunc sw bam kan the. Kunghmei latbamv guay tei kaniw rui Mousi khou phungc guangna nthyammei latbamv guay thu kaniw rui nzanhlou the.

27Khoutei Mousi rui kapouc ta kady kanavlouna kapouc tei kakai nzwan dat kan the.

Currently Selected:

TATPATMEI 18: RONGBSI

Highlight

Copy