3 JAHON 1
1
1Gaanvthaih ai rui— Ai kalingna nzianmei Gaia khang hymei:#Lat 19.29; Rom 16.23; 1 Ko 1.14
2Kungcna nzianmei, ramh lam guayna khou nang khang gaymei rana ariw bam khang khatni nang bumaengh khou gayna bammei kumcna nang pumc ni gayna bam khang ai huayney bam e. 3Aniu chana punav gaanvsaekc guangna nang nchumhmei khou lwmnuhmei swna bammei khatni nang nchumhmei khou lungc bammei chamv tei raclou pwkhou akhang mpeyna neihlamei nai e. 4Anac nunc nchumhmei khou lungc bam e twmei chamv chuna neihlamei suangc baihmei neihlamei maek ge.
Gaia ta Thuanhmei
5Kungcna nzianmei, nang rui chana punav nunc, gin ga swna guangmei nunc khang swchuyna swlou bammei hei lwmnuhmei taanv e. 6Kaniw rui mi khou hei guangna nang ramzian tei phwamling khou raclou the. Kaniw tuang chaengtat khou tei Ravguangc rui pianlou nuhmei thak khou kaniw ta nkhavlou tio. 7Kalam thu kaniw tei Khrista tuang taanv khang rui tat pat kan tuang e, kumna Khristian hamhmei nunc rui thu kaniw ta nkhavlou mak khe. 8Kum thena, aniu Khristian nunc rui kaniw ta nkhavlouna kaniw rui nchumhmei khang taanc bammei khou hei kadam laa nchamclou nina the.
Diotrephi lev Demitria
9Ai rui phwamling khang duimei tatdyn hylou kan tuang e; tiki kapy sw niimei Diotrephi tei ai rui samei tei chulou mak khe. 10Kumna ai guang pwkhou kiu, kataanv guay tei phungc pat pw ni: kamei rui saraamcna aniw ta sakasicna sa kanmei; mi na tei rui kakhang pian makna, Khristian chana punav nunc guangmei ta tei kamei rui laalou makmei na hamhna, laalou niimei nunc ta sini thingc lana kaniw ta phwamling khou rui alay ganh khang swmei, mi guay hei e.
11Kungcna nzianmei, simei ta lay nzeic riu; gaymei ta lay nzeic o. Gaymei taanhpui mei guay tei thu, Ravguangc tuang e; simei taanhpui mei tei thu Ravguangc ta how mak ge.
12Meic guayna rui Demitria ta sa chuy bam e; nchumhmei kahak rui ni sa chuy bam e. Aniw rui ni kalam khou hei tei kumcna sa bam muay e. Kumna aniu sa bammei hei kaling e twmei nang thay e.
Kady Kanavloumei
13Ai nang khou sa khang mpeyna nai he; tiki tatdyn swna hy nii mak khe.
14Ai nang ta asaanh mak khou ariw khang ning bam e. Mi khou kiu rui zaw lev zaw puanc kariuna rac di kho.
15Nang khou chuzaenghmei nai diu. Nang pammei guay rui dwan gay kady e. Aniw pammei guay ta gaanv khat gaanv khat swna dwan gay kady e twna salou o.
Currently Selected:
3 JAHON 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.