JUDA 1
1
1Jisu Khrista bangc khatni Jakob kainac Juda rui,#Met 13.55; Mrk 6.3
Pu Ravguangc rui nzianmei khatni Jisu Khrista rui gaeklou bammei kawloumei nunc khang hymei:
2Zauzian, chuzaenghmei, khatni nzianmei nangniw khou padikna nai bam di tho.
Kachangc Hamhmei Dinhmei nunc
3Nzianmeithiu, aniu kadam laa nchamc bammei ringcbamv lam khou nangniw khou hy khang ai machunh bam tuang e; tiki Ravguangc rui nthanmei nunc aniu khang tiiloumei kalaic dat lakmei lwmmei khang hei adow khang, nangniw ta katiulou mak nuh mak khe twmei alung khou guang dat the. 4Kalam thu, kaniw tuang nthah boulahmei taanv gumbin khang rui Ravguangc tuang zauzian chamv ta sw-mbianghmei nunc, aniu tuang akhat namei Kaipouc Poubauhmei Jisu Khrista ta laalou makmei nunc, rey khou rui kaniw ruc khou latzan keylou tangmei, rav ta thay makmei nunc aniu pang khou nkamhna tiap gut bam the.
5Mi hei nangniw thay tang bammei tuang di the; tiki tiningtowlou datpui tuang e. Twmei thu, Isaraelmei ta Izip khou rui kanpatloumei Poubauhmei#Poubauhmei: Baanhhy baibal asaekc khou Jisu twna hylou e. Grik lat khou thu Jisu twmei hei Joshua twna sa e. kamei rui lwm makmei guay ta swmaan dat kan e.#Tat 12.51 #Sin 14.29-30 6Kaniw khang tiiloumei ngamv paengc thangc patna, kaniw tuang lungbamv mpatlou kanmei kauh baanchara nunc ta tei ningtow o. Kaniw ta tingsaeng kangriang rui ntana kabangc zinghmei bamv thangc bangclou kan the. 7Sodom lev Gomora khatni mi tuang kainingmei kaidai guay ta tei ni ningtow o. Mi kaidai guay khou lungc bammei nunc tei, mi kauh baanchara nunc tei kumcna nthah boulahna kariak twanmei taanv taanh khou rui tingsaeng mai khou meic guay khang sw-nchinmei tuang swna ryanra khaengv the.#Tha 19.1-24
8Mi hei kumcna, kaniw tuang ndawman rui kaniw pumc khou paapc titaanc the; kapy swmei ngam ta chakhwang sw mak khe khatni tingkauh mei nunc ta ramh sak makna sa the. 9Kauh baanchara kapy Mikhael sini hei tei kumcna sw kan mak ge. Kamei Mousi pumc ta asutna ravsic lev agaypui ganv khou, kamei latsic sana karuc khou latzan kauc pat kan mak ge; tiki “Poubauhmei rui nang ta dandi tii puni,” twna sa kan e.#Dan 10.13-21; 12.1 #Nda 12.7 #Ria 34.6 #Zek 3.2 10Tiki kaniw thu kaniw kabah thay mak makmei ta sakasicna athwng e. Kaniw rui thaymei kiu khouringh kumcna kalwnlung tuang lungning khou rui pat patmei tei taancna hei tei rui kaniw ta swmaanmei hei e. 11Kaniw hei sansi e dav! Kaniw Kain chaeng tat kan the. Syan khang rui kaniw Balaam tuang khuay khou tei keylou kan the. Kaniw Kora kumcna kapyswmei ta liamna maanmei khou keylou kan the.#Sin 22.1-35; 16.1-35 12Kaniw nangniw tuang nzianmei napngai khou ping zak thay makna tu zangv mbana bammei tei laimiak teylou kumh tuang e. Kaniw bung khang na kakhanhmei nunc e. Kaniw hei mpwan rui phungc tat bammei ting maekmei muangc tei kumhmei e. Kaniw hei tingsei mun nganvna kathai nthai makmei, phuai patlou tina theic kangc bammei bang tei kumhmei e. 13Kaniw hei duipui dui luat kumhmei e; kaniw tuang zakmei taanv guay tei duiphwan kumcna phuangc thau e. Kaniw hei kabamv kazy thay makna samc bammei gaanchuangcna nunc, kaniw bamv khang kabangc thangc tingsaeng zinghmei khou chamdaanvlou bammei nunc kumhmei e.
14Adam khou rui kin chaneimei khou lungcloumei Enok rui ravmundincna sa e: “Poubauhmei katuang baanchara aching aching ta nduanghna guang e.#Tha 5.18,21-24 15Meic guay ta latzan sw khang e— Rav ta thay makmei nunc ta, kaniw rui Rav ta thay makna taancloumei taanv guay khatni Rav ta thay makmei paapcmei nunc rui karuc khou latsic latrouc salou kanmei guay khang tei dandi tii khang e!”
16Kaniw hei kaganv kathuic khanc lanc e, pianmei maek ge; kaniw tuang simei kahawmei khou tei lungc e; kaniw gaengh swna latsav daic e khatni kaniw khang gaeng nimei khou sathuanc thay e.
Kasiaththay khang Dincloumei
17Nzianmeithiu, aniu Poubauhmei Jisu Khrista tuang latdiutatmei nunc rui nangniw khou dinc kasuakcloumei tei ningtow o. 18“Nkhamhpui ganv khou, kaniw tuang Rav ta thay makmei kahawmei khou tat bammei sinnui sinnumei nunc guang puni,” twna kaniw rui nangniw khou salou kan the.#2 Pi 3.3 19Kaniw hei kalangv tipatmei nunc e, mbaanv chwn phunghmei nunc e, Ravguangc Bumaengc maekmei nunc e. 20Tiki, nzianmeithiu, nangniw thu nangniw ta nthan liangmei lwmmei panty khou kasiamh thau o. Bumaengh Nthanmei paan rui huayney bam o; 21khatni Poubauhmei Jisu Khrista rui kazauzian paan rui ringcsuangmei tiilou nimei ta nkhwan bam khou hei, nangniw Ravguangc tuang nzianmei khou tei bam o. 22Lwmsimei nai bammei nunc ta tei zauc nzianlou o; 23gaanvsaekc ta mai khou rui kathangv patna kanlou o; khatni gaanvsaekc khou ping kadanna zauzian lyanlou o. Tiki kaniw pumc tuang kahawmei rui sw mphuammei pheybaan ta tei thu karaeng o.
Suaic Samcloumei
24Nangniw ta bow mak khang gaeklouna, khuay maekna khatni neihlana hymdaihmei kapamv khou phungc guanglou ngammeipu — 25akhat namei Racguangc khatni Guloumeipu khang, aniu Poubauhmei Jisu Khrista paan rui, hymdaihmei, tikguncdaihmei, pumtan khatni ngamv hei reynungc ni, ntaw ni, tingsaeng khang sw diu! Amen
Currently Selected:
JUDA 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
