2 JAHON 1
1
1Gaanvthaih ai rui—
Nzianmei kapahloumei aluhpui khatni kanac nunc#aluhpui khatni kanac nunc: Mi hei phwamling akhat khatni mi phwamling tuang mei nunc ta khuangh e. (Kathaek 4-5 tei zauc o.) khou hy e. Nangniw ta nzian changhna nzianmei hei arana hamh e, nchumhmei ta thaymei guay na rui nzian e. 2Kalam thu aniu khou nchumhmei nai e, kumna mi hei aniu khou tingsaeng nai bam puni.
3Pu Ravguangc khatni Pu Nac Mpouh Jisu Khrista rui aniu khang zauzian, nzianloumei khatni suaihiam tiilou diu; nchumhmei khatni nzianmei khou mi guay hei aniu khang sw diu.
Kachangcmei lev Nzianmei
4Nang nac nunc gaanvsaekc, Pu tuang latdanv thei layna kachangcmei khou tat bam the twmei thay pwkhou ai mpeyna neihla e. 5Hei zaeng rui, nzianmei aluhpuile, ai rui nang khou zaenghuay e: niu meic guayna khat khat ta nzian kho. Mi hei ai nang khou latdanv kathanc hy bam tu hamh e; mi hei thaurey khou na rui aniu khou tiiloumei latdanv e. 6Ai rui aniu khat khat ta nzian kho twna sa bammei kabac kiu thu, aniu Ravguangc lat piuna lungc nina e twpui tuang e. Thaurey khou na rui nangniw chu kanmei latdanv kiu thu nangniw meic guayna nzianna lungc nina e twmei hei e.
7Meic guatpui mei mpeyna mbaanv kapwm khou tat pat kan the. Kaniw kiu Jisu Khrista hei maansei swna lungc guang e twmei nuh makmei nunc e. Mi kumhmei nunc hei meic guatmei nunc e khatni Khrista ta zauczihmei nunc e. 8Aniw#aniw: baanhhy baibal asaekc khou nangniw twna hylou e. rui taanclou kanmei tei nangniw swmaan mak khang ramhthay o; nangniw swan nthuihna laa khang karamc o.
9Thow pw ni Khrista tuang latdyn lungc khou bam makna kapaengc tat twan pat kanmei nunc tei thu kaniw khou Ravguangc maekpui mei nunc e. Mi latdyn lungc khou bampui mei tei kakhou Pu ni, Kanac Mpouh ni bampui mei e. 10Hei zaeng rui, mi latdyn hei hamhna baihmei phungc guangpui mei ta thu nangniw kai khou laalou riu; dwan gay ni kadylou riu. 11Kalam thu mi kumhpui mei khang tei dwan gay kadypui mei tei mi pu tuang simei taanv khou tei kadam ni kazauh the.
Kady Kanavmei
12Ai nangniw khou salou khang mpeyna nai he; tiki tatdyn swna hy lak khe, kumna aniu neihlamei padik khang, nangniw daeng khou guangna zaw lev zaw howna racloumei rui gay the twna ning the.
13Nang nzianmei nang swanrey nac#nang swanrey nac: Mi tatdyn hei hymeipu tuang phwamling mei nunc ta khuangh e. guay rui nang khang dwan gay kady e.
Currently Selected:
2 JAHON 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
