2 TIMOTHI 3
3
Nkhamhpui Ganv
1Nkhamhpui ganv khou kungc sihpui tuang ganv guang puni twmei thay o. 2Meic guay lwnlung tei mi kum puni: kakhang khang na ningmei, syanlanv agaamvmei, gaenghswmei, daihriw swmei, meickai ta swzakmei, pui pu lat liammei, thuancku thay makmei, ravning makmei, 3meic nzian thay makmei, kuaklou thay makmei, meickai ta sw kasic khang swmei, sw kasic karoucmei, meic nzimei, gaymei ta karaengmei, 4lwmnuh makmei, sinriap nuh makmei, kanga kaliangmei, Ravguangc ta suangc meic pumc rui kahawmei ta laa niimei, 5mpaeng khou thu ravningmei khe sw lana, mi tuang pumtan ta tei thu nuh makmei. Mi kumhmei nunc khou tei rui mpaanna bam o. 6-7Kaniw gaanvsaekc kai kai khou tiapgutna, paapc puatrith phungc bammei khatni meic pumc tuang kahawmei zaat guay rui phungc pat phungc gut tat bammei, ncham bam sini nchumhmei ta thay zat makmei suanmei ntumei nunc ta kaniw sinsw e. 8Janni lev Jambri rui Mousi ta nuh mak kanmei kumcna, kaniw lungning nkhuai kanmei khatni lwm makmei kaniw hei rui nchumhmei ta nuh mak ge.#Tat 7.11 9Kaniw asaanh tatlou ni tu hamh e. Kaniw rampang tei meic guayna rui thay pat puni de. Janni lev Jambri tei ni mi kum kan tuang e.
Nkhamhmei Kadyloumei
10Nang thu atuang latdyn, akheiliak, atuang tamhmei, aram lum, aram khaengthay, aram zian, aram khaengtan thay kan the. 11Ata raikasicmei khatni ai ryanramei ariw kanmei— Antiokh khou, Ikonium khou khatni Lustra khou taraina makmei ramrianra ai ariw kanmei tei nang thay e. Tiki mi guay khou tei rui Poubauhmei rui ata kanlou the.#Lat 13.14-52; 14.1-7,8-20 12Khrista Jisu khou ravningmei panty khou lungc niimei guay ta thu rairiu puni tina di the. 13Meicgay makmei nunc khatni gaypui khe swmei nunc tei thu meickai ta khatni kaniw rana kaniw ta guatna si hay hay tat kan ni tuang di the. 14Tiki nang thu, nang khou dinclou kanmei khatni nang ntipna lwm kanmei nchumhmei tei sin ntip bam o. Nang ta thow thow rui nchamlou tu cho twmei nang thay e, 15khatni Khrista Jisu khou lwmmei paan rui ringhbamv khou zaylou nimei ningting nang khou tiiloumei Nthanmei Latrik tei nang alauc khou rui thay the twmei nang thay e. 16Nthanmei Latrik kapwm hei Ravguangc khou rui guang tuang e, kumna mi hei nchamlou khang, luhlou khang, sw ntwnlou khang, khatni ravchap tat khang nchamlou khang gaeng e.#Nthanmei latrik kapwm hei Ravguangc khou rui guang tuang e kumna mi hei...gaeng e: hamh e thei Ravguangc khou rui guangmei nthanmei latrik guay hei...gaeng e. 17Mi kumna, mi hei rui Ravguangc siamruaimei ta kathouc taanh khang biuhpui mei khatni gaymei taanv kathuic taanc ngampui mei tiswlou e.
Currently Selected:
2 TIMOTHI 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
