2 TIMOTHI 2
2
Khrista tuang Gaymei Ricmei
1Hei zaeng rui anacle, Khrista Jisu khou naimei zauzian khou tei nang tanc o. 2Meic mpeyna hu khou nang akhou rui chu kanmei guay tei meic baihmei khou dinclou dat ngam nimei lwmnuhmei nunc khou nsinlou o.
3Khrista Jisu tuang gaymei ricmei akhat swmei tuang ryanramei dam tei nang ni phungc o. 4Rihmei akhat tei katuang ricpy ta tipianlou niipui zaeng rui katuang charay tuang taanv tei rui kata sw kaguakc mak khang sw e. 5Talicmei gaanv khat tei kamei kariak lungc khou talic mak ge thei, swan laa mak ge. 6Lautaanhmei khou ni, taanc ranvpui mei tei reymei dam tei kakhang e. 7Ai rui sa bammei guay hei kakhanh o; kabah thay ngam khang Poubauhmei rui tiilou puni.
8Atuang gaychamv khou dinc bammei, David kikta, theihmei khou rui ringcthau dat kanmei Jisu Khrista ta ningtow o. 9Mi gaychamv khang rui ai ryanra khaengv bam tuang e khatni meicbiw meicdowmei ta kumcna kang bangclou bam tuang e. Tiki ata bangclou bam sini, Ravguangc lat ta thu bangclou mak ge. 10Hei zaeng rui, Ravguangc rui kadahloumei nunc khang ai ramh guayna khaengv bam e. Mi kiu kaniw ni Khrista Jisu khou naimei ringcbamv khatni tingsaeng hymdaihmei tei laa kan khang e. 11Mi hei kalingpui lat re:
“Aniu kamei lev theic nchamc e thei,
aniu kamei lev ringc nchamc puni.
12Aniu ryanra khaengv bam e thei,
aniu kamei lev guanghtu nchamc puni.
Aniu rui kata laalou ti mak ge thei,
kamei rui ni aniu ta laalou mak puni.#Met 10.33; Luk 12.9
13Aniu lwm nuh mak sini,
kamei thu kalat suai mak ge;
kalam thu karana kalat ta kak dat mak khe.”
Ravguangc rui Piulou Nuhpui Mei
14Nang mei nunc khou tei mi hei tiningtowlou o: lat lam khou agay riu twna kaniw ta Poubauhmei hu khou salou o. Hei tei rui chuloumei nunc ta sw kasicloumei na hamhna, gaymei swlou tuang khatna sini maek ge. 15Taanc suaina zakmei ariwpui mei tei kumh makna; Ravguangc mikzaw khou pianlou nuhpui taanvtaanhmei siamruaimei sw khang, Ravguangc tuang nchumhmei lat tei nchumhna sinswna ngampui kasang taanc o. 16Mi kumhmei Ravguangc tuang hamhmei agi agamei khou tei nang lay kazauh riu; hei tei rui meic nunc ta Ravguangc khou rui tiduc hay haylou puni. 17Mi kumhmei lat tei suc paengv patmei sudaic kumh tuang e. Mi kumcna sw bammei nunc pang khou tei Humenaia lev Phileta hei ni kazauh the. 18Kaney nchumhmei khou rui mbiangh pat lana ringcthau datmei hei pat tang kan the twna dincna meic gaanvsaekc tuang lwmmei tei swmaanlou the. 19Tiki Ravguangc rui kasiamh thaulou kanmei ntipmei kaibam tei thu sw kachac dat ngam ni tu hamh the; “Poubauhmei rui katuang mei guay ta thay e” khatni “Thow pw ni kamei Poubauhmei tuang e twna sapui mei tei nkhuaimei taanv khou rui tat pat nina e” twna mi kaibam tauc khou tei hylouna nai e.#Sin 16.5
20Kai daihmei khou daandi khatni kachaekc tuang kuanh kiuh rana nai mak ge; thing tuang lev niang tuang ni nai de. Hei tei asaekc ta chakhwang bamv khou, asaekc ta chiwmei bamv khou sinsw e. 21Thowkumhmei rui mi simei guay khou tei rui nthanna bam ti thei, kata nthukmei bamv khou sinswlou puni. Kalam thu kamei thu katgutloumei khatni kakaipouc khang kage naimei, gaypui taanv khou sinsw khang chamdaanvloupui mei e. 22Chabwan swmei tuang meic pumc rui kahawmei simei guay khou tei rui pak tat ro, kumna ravchaptatmei, lwmmei, nzianmei, khatni chuzaenghmei ta, kalingmei Khristianmei nunc thei tei lay kapaamvna karamc o. 23Mpangmei khatni ramh thay makmei tuang agi agamei khou tei nang kazauh riu. Hei tei thu agay khang na de twmei nang thay e. 24Poubauhmei bangc thu agay nina hamh e. Kamei meic guayna ta nzianthay nina e; khaengvthayna nchamlou thay nina e; 25kata akhangvmei nunc ta lungh zaenghna dinc ntwnlou nina e. Kalam thu Ravguangc rui lungh laih khang kaniw khou tiilou datna kaniw nchumhmei ta thay guang dat nuh e. 26Kum pwkhou kaniw kabah thay pat dat lana, kamei ningmei titaanh khang kaniw ta nymlou bammei ravsic phac khou rui duak pat dat nuh e.
Currently Selected:
2 TIMOTHI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
