2 TIMOTHI 1
1
Chaengriw Lat
1Ravguangc rui ningmei thei layna Khrista Jisu tuang latdiutatmei swmei, Khrista Jisu khou naimei aniu khang nrianhloumei ringhmei tei dinc ndauh khang ndiuloumei Paul rui—
2Anac mpouh Timothi khang hymei:
Pu Ravguangc khatni aniu Poubauhmei Khrista Jisu rui zauzian, nzianloumei khatni chuzaenghmei nang khou tiilou diu!#Lat 16.1
Thuanckumei khatni Katiuloumei
3Ai zingbangc kalaanv huayneypui ganv kathuic nang khang ningtowna, alungning khou lwmsi tuang maekna apu apouc nunc kumcna ai kasiamruai sw bammeipu Ravguangc ta ai thuancku bam e. 4Nang mikdui tei ai ningtowna, nang ta how dat pwkhou neihla dat punimei khang tei rui ai nang ta how dat niina bam e. 5Nang peic Loidi khou khatni nang pui Eunika khou naimei kalingmei lwmmei nang khou naimei tei ai ningtow e. Hei tei nang khou nai e twmei ai lwm e.#Lat 16.1 6Hei zaeng rui, abaanc sungclou khou tei nang khou tiilou kanmei Ravguangc tuang kaipat tei tichuangc bam khang ai nang ta tiningtowpui tuang e. 7Kalam thu Ravguangc rui aniu khou tiiloumei Bumaengc hei zammei Bumaengc hamh e; pumtan, nzianmei khatni meic pumc ta sinriapmei Bumaengc de.
8Hei zaeng rui, aniu Poubauhmei lam khou sa khang zak riu; Khrista khang kang bammei alam khou zak riu. Mi phaanv tei Gaychamv khang rui phungc nimei nang tuang ryanramei dam tei Ravguangc tuang pumtan paan rui phungc o. 9Kamei rui aniu ta, aniu taanv paan rui hamhna, kamei rui ningmei thei layna kazauzian paan rui kanlou the khatni katuang mei khang kawlou the. Mi zauzian hei mbaanv damh mak khou rui Khrista Jisu khou kamei rui aniu khang tiilou the. 10Tiki aniu ta kanloumeipu Khrista Jisu guang khou rui mi zauzian hei aniu khou ndauhlou the. Kamei rui theihmei ta swmaanlou the, kumna gaychamv paan rui theic dat makmei panty tiilou the. 11Mi gaychamv hei dinc ndauh khang khatni nchamlou khang ata ndiulou the.#1 Ti 2.7 12Hei zaeng rui ai mi kumna ryanra khaengv bam tuang e. Ai lungh geic dat mak khe, kalam thu ai lwm bammeipu ta ai thay e. Kamei rui akhou nsinloumei#Kamei rui akhou nsinloumei; hamh e thei ai rui kakhou nsinlou kanmei. hei kapumtan rui mi Tingmik tei nganvna gaeklou puni twmei ai thay e. 13Nang ta zaylou khang ai rui nang khou dinclou kanmei nchumhmei lat tei ntipna sin o. Khrista Jisu khou bammei aniu khang tiiloumei lwmmei khatni nzianmei khou tei bam o. 14Nang khou nsinlou kanmei lanv tei, aniu khou bammei Bumaengh Nthanmei paan rui gaek chuyna sin bam o.
15Asia khou bammei guay, Phugelo lev Hermogene kazauhna ata mpatlou the twmei nang thay e. 16Onesiphora kai kaikhunc khou Poubauhmei rui suaihiamlou pw diu. Kalam thu kamei rui katupc sihna achaengc tiringclou e; ata kang bangclou bammei khou hei kamei zak mak ge. 17Kamei Rom khou guang rappui lev ata phuna adaeng khou guang e. 18Poubauhmei rui mi Tingmik nungc kiu kata zauc nzianlou pu di tho! Ephisia khou kamei rui akhang taanclou kanmei guay tei nang thay ranvna bammei tei the.
Currently Selected:
2 TIMOTHI 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
