1 TIMOTHI 6
6
1Ravguangc zanc khatni aniw tuang latdyn ta sakasic mak khang, bangh sw bammei kaniw ni kaniw kaipouc nunc ta chakhwang sw nina e. 2Lwmloumeipu akhat bangc nunc tei kakaipouc ta chana de twna ramh sak mak tuang sw lak nina e. Mi phaan tei kaniw taanc chuylou ranv nina e. Kalam thu kaniw rui taanclou nimei tei kaniw rui nzianmei lwmmei nchamc khang e.
Nchumh Makmei Latdyn khatni Kalingmei Lanv
Mi lat guay hei dinclou o khatni piu khang katiulou o. 3Aniu Poubauhmei Jisu Khrista tuang kalingmei lat khatni ravningmei tuang latdyn ta nuh makna baihmei riakdyn dinhpui mei tei, 4daihriw swmei rui khungcna kamei ramhkhat sini thay mak ge. Kakhou simei tipat khang lat lam khou agay agi niimei lungning rui padik ge. Mi khou tei rui patmei thu mamavmei, tamramei, sakasicmei, ningkasicmei, 5kalungning khou nchumhmei maekmei mei nunc pang khou agay agi bammei hei the. Ravningmei hei thu lungcgay nipui chaeng e twna kaniw ning e.
6Ngguay, ravningmei tuang lunggai kiu thu, kakhou nai naimei tei pian rapmei tei the. 7Kalam thu aniu mbaanv khou ramhkhat na sini phungc guang mak ge; ramhkhat na sini phungc tat ni tu hamh e. 8Hei zaeng rui, tu zangv khang nai, pheybaan nai tw e thei, aniu hei tei rui pianmei sw nina e. 9Tiki lungcgay niimei nunc tei nthiammei khou keylouna mpangmei tuang kaniw ta sw kasic nimei ta kahawmei phac khou keylouna maan kanmei mpeyna nai the. 10Kalam thu syan agaamvmei hei simei guay tuang bangbi e. Syan kahaw khou rui meic gaanvsaekc thu lwmmei khou rui tat pat lana lungh ryanramei rui kaniw lungthw sauh biw kumc bam geic e.
Charay Kadyloumei
11Tiki, Ravguangc tuang mei nang thu, mi guay khou rui rei pat ro; kumna ravchaptatmei, ravningchuymei, lwmmei, nzianmei, khaengvthaymei, khatni lungh zaenghmei nang khou nai khang karamc o. 12Lwmmei tuang lauluangc hei pak ranvna pak tho, kumna ringcsuangmei tei laa tho. Nang lwmlou the twna meic mpeyna hu khou sa ndauh khou tei, nang ta kawloumei hei mi ringhmei hei tiilou khang e. 13Ramh guayna khou ringhmei tiiloumei Racguangc hu khou, Pontia Pilat hu khou sa ndauhlou kanmei Khrista Jisu hu khou, ai rui nang khou mi latdanv hei tii guang e.#Jhn 18.37 14Mi hei aniu Poubauhmei Jisu Khrista guang mak saanv piuna tat bam khang e. 15Mi tingmik kiu hymdaihmei, kanei makmei ngamv Kaipouc, guangh guay Guangc khatni kaipouc guay Kaipouc, Ravguangc rui kating tangc pwkhou tii guang puni. 16Kamei hei theih makmeipu e, meic guang tuanc ngam makmei riw khou bammeipu e; kata meic gaanv khat na sini how kan mak ge khatni how ngam mak ge. Chakhwang champouhmei khatni pumtan tingsaengzaeng kakhang sw diu! Amen
17Mi mbaanv tuang lungcgaymei nunc ta daihriw sw mak khang sa o. Kadyng maekmei lunggai khou tei hamhna, gaat tuang maekna ramh katana sakbi sakba makna tiiloumei Racguangc khou ngangvlou khang sa o. 18Kaniw gaytaanv khou lungcgay khang, lungning daicna khatni baanh daicna tii pat khang sa o. 19Mi kumna kaniw khang lanv lou kaduaina thei thangc khang ntipmei phayding kasiamh lana kalingmei ringcpaan tei kaniw laa ngam khang e.
20Timothi, nang khou nsinlou kanmei tei swmaan mak khang singaek chuy o. Kiuc hamhmei “Thaymei” twmei tuang, Ravguangc tuang hamhmei agi agamei khou tei nang thu lay kazauh riu. 21Kalam thu meic gaanvsaekc kaniw khou mi “Thaymei” tei nai the twna sana lwmmei khou rui tat pat kan the.
Zauzian nangniw khou naimei sw di tho.
Currently Selected:
1 TIMOTHI 6: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
