2 THESOLONIKAMEI 3
3
Aniw khang Huayneylou o
1Nkhamh khou, chanathiu, Poubauhmei lat katumcna zin lik pat khang khatni nangniw kumcna hei tei ningthukna laalou khang, aniw khang huayneylou o. 2Meicsimei nunc khou rui aniw ta kanduaklou khang ni huayneylou o. Kalam thu meic guayna lwmmei rana hamh e. 3Tiki Poubauhmei thu lwmnuhmei e, kumna nangniw khou pumtan tiilou puni khatni nangniw ta Simeipu khou rui gaeklou puni. 4Kumna aniw rui nangniw khou dinclou kanmei guay tei piu bam e khatni piu bam puni twmei aniw nangniw ta Poubauhmei khou lwmgaymei nai e.
5Poubauhmei rui nangniw khou Ravguangc ramzian tei thay mbumei khou zaylou pu dio khatni Khrista tuang khaengvthaymei tei tiilou pw dio.
Taanv Taanc Nina e
6Chanathiu, aliauhmei khatni aniw rui dincloumei tei piu makmei chana nunc khou tei rui mpaanna bam o. Mi latdyn hei aniu Poubauhmei Jisu Khrista zanc khou tii tuang e. 7Aniw nangniw daeng khou bam khou tei aliauh makna, taanc bammei tei kumcna nangniw ni taanc nina e twmei nangniw thay e. 8Aniw meic gaanv khat na tuang sini katy kamanv tii makna laa tu mak ge. Aniw khang rui nangniw gaanv khat na khang sini puatcrith tiilou mak khang aniw zingbangc kalaanv taanv taanc ranvna lungc kan e. 9Hei tei nangniw aniw ta makuat nina e twna sa nuhpui lam maekna hamh e; tiki nangniw aniw thei lay nzeic khang e. 10“Taanv taanc zihpui mei tei thu tu ni tu mak kan diu,” twna aniw nangniw daeng khou bam khou tei latdanv swna sa bammei tei the.
11Aniu mi hei samei kiuthu, aliauhna, taanv taanh makna meickai taanv lam kaphianh khang tynna bammei nunc nangniw pang khou nai e twna aniw chu the. 12Aniw rui mi kumhmei nunc khang tei Poubauhmei Jisu Khrista zanc khou latdanv swna sa tuang e: kaniw reih reina kaniw bung khang taanc kan diu.
13Tiki, chanathiu, nangniw gaytaanv taanh khang liat lak riu. 14Aniw rui mi tatdyn khou hyloumei lat guay hei thowkumhmei piu zihmei nai e thei, mi kumhmei mei ta tei kalwn thaylou o. Kamei zak kan khang kakhou rui mpaanna bam o. 15Kata zauczihmei e twna thu laa riu; tiki chana e twna mphut luhlou o.
Kady Kanavmei
16Chuzaenghmei kaipouc Poubauhmei kamei rui, nangniw khou kaganv kathuic khatni kalam kathuic khou chuzaenghmei tiilou pu dio. Poubauhmei rui nangniw guayna ta bam nduanghlou pu dio. 17Mi hei abaanc kahak rui hy tuang e: Paul rui nangniw khang dwan gay kady e. Atuang e twmei thay khang atuang tatdyn guay khou ai mi hei kumcna azanc hylou raph rap the. 18Aniu Poubauhmei Jisu Khrista zauzian rui nangniw ta bam duanghlou pu dio.
Currently Selected:
2 THESOLONIKAMEI 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
