1 TIMOTHI 1
1
Chaengriw Lat
1Aniu ta kanloumeipu Ravguangc khatni aniu lwmmei Khrista Jisu tuang latdanv thei layna Khrista Jisu tuang latdiutatmei swmei Paul rui—
2Lwmmei khou kunghmei anac mpouh swmei Timothi khang hymei:#|Lat 16.1
Pu Ravguangc khatni aniu Poubauhmei Khrista Jisu rui nang khou nzianmei, zauzian khatni chuzaenghmei tiilou pu diu!
Dinc Mbianghmei nunc khou rui Ramhthay o
3Ai Makidonia thangc tat ni khou nang khou kadylou kanmei tei kumcna, nang Ephisia khou tei bam o. Riakdyn laanhmei dinc bammei nunc ta tei hei tei dinc nthaekc tho twna sa o. 4Damc duancpui pary khatni kanganv thay makmei pouh peih kin pary khou lungh gut bammei tei nthaekc tho twna sa o. Hei tei rui mpangmei tuang agay agimei tipat re; lwmpui paan na rui thay nimei Ravguangc tuang raeng tei thay khang hei tei rui ramhkhat sini gaeng tuang maek ge. 5Mi kumna nang ta katiu bammei kabac kiu thu lungh nthanmei, lungning nthanmei, khatni kalingna lwmmei khou rui guangmei nzianmei tei kaniw khou nai khang e. 6Meic gaanvsaekc thu mi guay khou hei rui gaeng makmei lat agimei khou tei tat mpi pat kan the. 7Kaniw riakdanv dinhpouc nunc sw nii e, tiki kaniw sa bammei tei tabui sa bam tu cho twmei, hamh e thei kaniw thaymei kumcna sa bammei lam tei kaniw kabah thay mak ge.
8Kalam chana sinsw ti thei Riakdanv hei gaymei de twmei aniu thay e 9Mi hei thay o, twmei thu riakdanv kasiamhmei hei meicgaymei nunc khang hamh e; tiki kariak tat makmei nunc, latliammei nunc, ravchap tat makmei nunc, paapcmei nunc, ravchap ravriak ngaek makmei nunc, kapui kapu ta swluaimei nunc, meicdowmei nunc, 10lungcmaanv lungcmowmei nunc, meicriak twanna nthah boulahmei taanv taanhmei nunc, meic zuanhmei nunc, saraamhmei nunc, saraamhmei liang lianghmei nunc, khatni nchumhmei riakdyn tat makmei nunc khang e. 11Mi riakdyn kiu thu, dinc ndauh khang akhou nsinloumei hymdaihmei Racguangc tuang tikgunc daihmei Gaychamv hei e.
Ravguangc Zauzian ta Thuanckumei
12-13Ai taanc bammei taanv hei taanc ngam khang pumtan tiiloumei aniu Poubauhmei Khrista Jisu ta thuancku e. Tat kanmei ganv khou ai kata sakasicna khatni rairiuna kata sw kasic khang swlou khwan sini, lwmnuhmei swna chaklouna kasiamruai sw khang ata laaloumei khang ta thuancku e. Ai lwmlou makmei douc tei thay makpui zaeng rui hei tei taanh tuang e twna Ravguangc rui ata zauc-nzianlou the.#Lat 8.3; 9.4-5 14Kumna aniu Poubauhmei rui karyan kadath maekna ata zauc-nzianlouna, Khrista Jisu khou naimei lwmmei khatni nzianmei tei akhou tiilou the. 15Paapcmei nunc ta kanlou khang Khrista Jisu mbaanv khou guang the twna samei hei kalingpui lat dyng the, mi hei meic guayna rui laalou nipui lat re. Paapcmei nunc pang khou ai hei siliangmei mei e; 16tiki thei thangc kakhou lwmlouna ringcsuangmei laa nimei nunc khang kanganv maekmei Khrista Jisu tuang nzianna khaengvloumei tei lyanlou khang, siliangmei paapcmei ata Ravguangc rui zauc-nzianlou the. 17Nganvmei nai dat makmei Guangc, theih makmei, mik rui how makmei, akhat namei Racguangc khang tingsaengzaeng chakhwang champouhmei khatni tikguncdaihmei sw diu! Amen
18Anac Timothile, tat kanmei ganv khou ravmundinhmei nunc rui nang khou salou kanmei tei kumcna ai rui nang khou mi latdyn hei tii tuang e. Mi lat guay tei nang piuna adow chuyna adow o, 19lwmmei ntip bam o, khatni nkhuaimei taanv taanh makna lungc o. Kaniw lungning rui simei e twna samei tei piu mak khou rui meic gaanvsaekc thu lwmmei rungc bak kanmei nai the. 20Ravguangc ta ramh sak makna swmei tei sw dat mak khang ai rui Seitaan baanc khou tii patlou kanmei Himanaia lev Alekzandar ni mi nunc pang khou tei kazauh the.
Currently Selected:
1 TIMOTHI 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
