2 THESOLONIKAMEI 2
2
Riakdanv Twan Liammeipu
1Aniu Poubauhmei Jisu Khrista guang nimei lam khou khatni aniu kadaeng khou guang nimei lam khou, chanathiu, nangniw ramhthay khang aniw sa tuang e:#1 Th 4.15-17 2nangniw mi lam khou hei ning kaguakc bam nuangh riu. Ravmundinhmei rui pw ni, chamvdinhmei rui pw ni, aniw tuang tatdyn kumcna hy guangmei rui pw ni, Poubauhmei tuang Tingmik guang tangc the twna sa pwsini nangniw lung katuakc riu. 3Thow thow rui pw ni nangniw ta guatmei tei nangniw lwm riu. Kanuaymei Ravliammei guang rey puni khatni kamut kamaimei khou keylou nimei Simeipu kiu guang puni. Mi tangv rui mi Tingmik kiu guang khang de. 4Kamei rav twmei guay ta khatni meic nunc rui kalum bammei tuang guay ta nuh mak puni, kumna kamei hei daic liangmei e twna sa puni. Kamei Ravguangc tuang Ravkai khou nganvna gut dungc lana karana kata Ravguangc e twna sa puni.#Dan 11.36; Eze 28.2
5Mi guay hei ai nangniw lev bam nchamc bam khou nangniw khou salou kanmei tei nangniw ningtow mak nah cho? 6Ntaw mi pu kiu guang nimei ta thingc bammei akhat nai e. Hei tei tabui cho nangniw thay e. Kaganv tangc pwkhou, mi Simeipu kiu guang puni. 7Meic thay tangh makmei Simeipu kiu ntaw ni taanv taanc bam e; tiki kachaeng thingc bammeipu tei rui chaeng reilou ti mak saanv kamei guang ni tu hamh e. 8Kachaeng laanclou pwkhou, Simeipu kiu guang puni. Tiki Poubauhmei Jisu guang pwkhou kamwang khou rui mphiu patmei thiu rui kata swluai puni khatni katuang karangmei riw rui kata swmaan puni.#Isa 11.4 9Simeipu kiu Seitaan tuang pumtan phungcna guangna, guatmei tuang sw-nchinmei taanv khatni charynmei taanv zaat guayna taanclou puni.#Met 24.24 10Kumna maan kan nimei nunc ta tei karoucsina guat puni. Kaniw maan nimei thu nchumhmei ta tei ningthukna laalouna kanloumei laa mak khou rui e. 11Hei zaeng rui, nchumh makmei ta kaniw lwm khang kaniw khou taanv sw khang Ravguangc rui nchumh makmei tuang pumtan kaniw khou tiguang the. 12Mi thai kiu thu nchumhmei ta lwm makna, paapc ta kahaw bammei nunc ruc khou latzan keylou puni.
Ding Ntip bo
13Ravguangc rui nzianmei chanathiu, aniw nangniw khang rui Ravguangc ta thuancku tanh tan bam rap khang nai e. Kalam thu Bumaengh rui sw nthanloumei paan rui khatni nchumhmei khou lwmmei paan rui kanloumei laa khang Ravguangc rui nangniw ta thaurey khou rui kapahlou the.#thaurey khou rui kapahlou the; baanhhy baibal asaekc khou thu reymei swna kapahlou the twna hylou e. 14Aniw rui nangniw khou dincloumei gaychamv paan tei rui Ravguangc rui nangniw ta aniu Poubauhmei Jisu Khrista tuang tik-hym lay laa khang kawlou the. 15Hei zaeng rui, chanathiu, ding ntip bo khatni aniw mwang rui khatni tatdyn rui nangniw khou dinclou kanmei guay tei sin ntip bam o.
16Aniu Poubauhmei Jisu Khrista khatni aniu ta nzianna kazauzian paan rui tut dat makmei rambau khatni kachac dat makmei ramrigun tiiloumei aniu Pu Ravguangc rui, 17gaymei taanv taanh khang khatni gaymei lat sa khang bauhmei khatni pumtan tiilou pu diu.
Currently Selected:
2 THESOLONIKAMEI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
