2 PITAR 3
3
Poubauhmei Guang Nimei
1Nzianmeithiu, mi hei ai rui nangniw khou hymei kaneimei tatdyn the. Mi tatdyn kanei khou hei, mi guay hei tiningtowlouna nangniw tuang lungning nchyang thaulou khang karamh tuang e. 2Nthanmei muhzwng nunc rui dinc kasuakcloumei lat guay khatni latdiutatmei nunc rui dincloumei Poubauhmei Guloumeipu tuang latdanv guay tei ningtow o.
3Rey liangmei khou mi hei thay o, twmei thu nkhamhpui ganv khou, kaniw pumc rui kahawmei khou lunghmei sinnui sinnumei nunc guang puni. Kaniw rui sinnuina,#Jud 18 4“Kamei guang puni twna salou tu hamh nah cho? Aniu pupouc nunc theic ngam kan the. Mbaanv damclourap khou rui thauna ramh guayna kiuc likna tat key bam de. Kamei guang nimei kiu tabui tei tha?” twna sa puni. 5Ravguangc lat rui tingpuk kandih hei damh tuang e twmei kaniw thay zihna thay mak tuang e. Mbaanv hei dui khou rui khatni dui rui kasiamh tuang e,#Tha 1.6-9 6khatni reydouc mbaanv tei dui rui, twmei thu duidai rui sw maan kanmei tuang e.#Tha 7.11 7Tiki ntaw nai bammei tingpuk khatni kandih hei mai rui swmaan khang Ravguangc tuang latdanv thei layna nai bam tuang e. Rav ta thay makmei nunc ta latzan swna swmaan nimei nungc khang mi hei lou bam tuang e.
8Nzianmeithiu, nangniw mi hei thaylou o: Poubauhmei khang thu zaeng neih khat hei tingkwm ching khat kumh tuang de, khatni tingkwm ching khat hei zaeng neih khat kumh tuang de.#Kal 90.4 9Poubauhmei hei kalatryan taanc pat khang nzaeng the twna meic gaanvsaekc rui ningmei kumcna kamei thu nzaeng mak ge. Kamei nangniw ta nkhwan bam tuang e. Kalam thu meic gaanv khat na ta sini swmaan kanmei ta kamei laa nii mak ge; meic katana lungh laihmei ta laa nii e.
10Tiki Poubauhmei tuang Tingmik hei thu kaihouhmei guang kumc guang puni. Mi nungc kiu tingpuk hei khwan ranvna maanv kan puni; tingpuk khou nai bammei guay hei chaengc maan kan puni, khatni kandih lev mi khou naimei guay hei raw maan kan puni.#Met 24.43; Luk 12.39; 1 Th 5.2; Nda 16.15 11Ramh guayna hei mi kumna maan kan puni. Kum e thei, aniw thu akumh kho cho? 12Nangniw Ravguangc tuang tingmik—tingpuk raw maan nimei tingmik khatni tingpuk khou nai bammei guay chaenghmei rui nungc maan nimei tingmik ta nkhwanna, mi tingmik tei tiguang zaih khang nangniw ngammei kasang karamc bam khou hei; ravningchuyna khatni panty nthanna lungc nina e. 13Aniu thu Ravguangc rui aniu khang nrianhloumei, ravchaptatmei bamv, tingpuk kathanc khatni kandih kathanc ta nkhwan bam e.#Isa 65.17; 66.22; Nda 21.1 14Nzianmeithiu, nangniw mi Tingmik ta tei nkhwan bampui zaeng rui, nangniw ta Ravguangc mikzaw khou nthanmei khatni khuay maekmei swna khatni chuzaenghna ariw khang ngammei kasang karamc o. 15Poubauhmei rui khaengvlou bammei ti hei zauc o. Mi hei nangniw kanloumei laa kan khang rui e twmei chak go. Aniu chana Paul rui Ravguangc rui kakhou tiiloumei ningting thei layna mi kahak hei nangniw khang hy kanmei tei the. 16Kamei rui katuang tatdyn guay khou mi lam khou hy pwkhou, kamei rui sa bammei kiu mi hei the. Katuang tatdyn khou kabah thay kunghmei bamv asaekc nai e. Mi kumhmei khou tei thay makmei khatni kadyng ding makmei nunc rui, baihmei Nthanmei Latrik bamv guay khou ni sw bammei kumcna, kabah hanc kadatna kaniw rana kaniw ta maanmei khou tikeylou the.
17Tiki nzianmeithiu, nangniw thu mi hei thay rey the. Kum thena kariak tat makmei nunc tuang nchumh makmei latdyn tei rui nangniw ta zay mbiangh patna nangniw tuang ntipmei phaydyng tei tikachac mak khang ramhthay o. 18Ravguangc zauzian khou khatni aniu Poubauhmei Guloumeipu Jisu Khrista ta thaymei khou daicthau bam o. Hymdaihmei hei ntaw khatni tingsaeng kakhang e! Amen
Currently Selected:
2 PITAR 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
