2 PITAR 2
2
1Kachangc hamhmei muczwng nunc tat kanmei ganv khou meic nunc pang khou nai kan the. Hei tei kumcna nangniw pang khou ni kachangc hamhmei dinhpouc nunc nai puni. Kaniw rui meic nunc ta sw kasic nimei, nchumh makmei riakdyn phungc guang puni, kumna kaniw ta thuakloumeipu Kaipouc ta kaniw nuh mak puni. Hei tei rui kaniw rana kaniw ruc khou katumcna maanmei phungc guang puni. 2Kumna kaniw tuang nthah boulahmei chaeng khou tei meic mpeyna lay tat puni. Kaniw zaeng rui nchumhmei Chaeng ti hei sakasic puni. 3Mi kumna kaniw rui damc duancmei pary nangniw khou racloumei khou rui agaamvna nangniw khou rui kuat tu puni. Kaniw ta latzan sw khang kahunungc rui chamdaanv guang kanmei tei nsa taan ni tu hamh e, kumna kaniw ta nsa mpatlou ni tu hamh e.
4Paapc taanhmei kauh baanchara guay ta tei Ravguangc rui nsa mpatlou mak ge; kaniw ta taruaihram khou phaiclou kan the, kumna latzan tingmik tangh mak saanv kaniw ta mi zinghmei khou tei kangriang rui bangclou bam e.#zinghmei khou tei kangriang rui bangclou bam e: baanhhy baibal asaekc khou zinghmei khunc khou lou bam e twna hylou e. 5Ravguangc rui reydouc mbaanv ta tei nsa mpatlou kan mak ge; ravning makmei mei nunc kandic khou tei duidai tiguang khwan e. Khoutei ravchaptatmei lat dinhmei Nouha khatni baihmei gaanv chanei na ta kanlou khwan e.#Tha 6.1—7.24 6Ravguangc latzan Sodom khatni Gomorra ruc khou keylouna mi kaidai kanei tei mai rui swmaan kan the; kumna mi hei rav ta thay makmei nunc khang sw-nchinloupui tuang sw bam e.#Tha 19.24 7Mi khou tei mi kariak tat makmei nunc tuang nthah boulahmei kheiliak ta tei kalung kabiuna bammei ravchaptatmeipu Lot ta kanlou khwan e.#Tha 19.1-16 8Meic nunc tuang simei taanv guay tei chu pwkhou khatni how pw khou, kaniw pang khou lungc bammei, mi meicgaymeipu tei tingmik pum kalung ryanrana bam khwan e. 9Kumna Poubauhmei thu ravningmei nunc ta simei khou rui kanlou e khatni meicsimei nunc ta latzan tingmik tangh mak saanv dandi tiina bangclou e. 10Mi hei nkunna pumh rui kahawmei, mphuammei panty khou lungc bammei khatni kapyswmei ngamv ta ramh sak makmei nunc ta e.
Mi dinc mbianghmei nunc hei bauc e khatni ramhkhe sw e; kumna kauh thangc bammei hymdaihmei nunc ta nganv sakasic khang ping mak ge. 11Tiki kaniw khang suangc tanhmei khatni ngammei kauh baanchara nunc rui nganv kaniw khuay Poubauhmei hu khou kalauhna kaniw ta tizaklou kan mak ge. 12Kaniw hei swluai swtiat khang na puancloumei, si gay kakhanh makna kamei taanc nii niimei na taanc bammei khouringh nunc tei kumc the. Kaniw khang kabah thay makmei guay ta tei kaniw sakasicna athwng the. Nwmbangc khouringc nunc ta kumcna kaniw ta ni swmaan puni. 13Kaniw rui meic nunc ta sw kasicloumei khang tei kaniw ta ni sw kasic puni. Kalaanv boulahna chakin swmei hei kaniw khang pianmei e. Kaniw nangniw tu zangv kariumei khou kazauh e; tiki kaniw kheiliak tei zakpui tuang e, khatni malapui tuang e. Mi kumna nangniw ta guatmei hei kaniw khang neihlamei e. 14Kaniw mikzaw khou lungcmaanv lungcmowmei rui padik ge, kaniw paapc taanc niimei kiu pianmei nai dat mak khe. Kadyng ntip makmei nunc ta kaniw phac khou timanc e. Agaamvmei hei kaniw chav swlou the. Kaniw ruc khou Ravguangc syang nai the! 15Kaniw hei nchumhmei chaeng gaanclouna chaeng maanv tat kanmei nunc the. Syan kahawpui zaeng rui nkhuaimei taanv taanh khang tat kanmei Beor nac mpouh Balaam chaeng tei kaniw lay tat kan the. 16Tiki Balaam ta tei thu katuang twan lyammei khang tei luh khwan e, khatni katuang kuanniam rui maansei khwan rui lat sana mi muhzwngpu ta tei katuang mbamei taanv tei titaanc kan mak ge.#Sin 22.4-35
17Mi mei nunc hei dui maekmei duipuakckai e, khatni puanzingh rui phungc tat bammei muangc e. Ravguangc rui kaniw khang zinghmei bamv chamdaanvlou the. 18Kaniw mpangmei lat rui gaenghsw e; simei panty khou lungc bammei pang khou rui duak pat chanahna bammei nunc ta manh khang meic pumc tuang boulahmei rui nthiam e. 19Nyngswmei tiilou puni twna kaniw rui meic nunc khou sa e, tiki kaniw kahak kaniw ta swmaan nimei kheiliak tuang bangc sw bam e. Kalam thu meic gaanv khat hei kata ngam bammei tuang bangc tei e. 20Kalam thu thowkumhmei aniu Poubauhmei khatni Guloumeipu Jisu Khrista ta thaymei paan rui mbaanv tuang mphuammei khou rui duak pat tang lana, mi khou tei manclou datna mi guay tei rui kata ngam datna bam e thei; mi kumhmei nunc hei thu kaniw tuang lwnlung tei kahunungc suangc nkhamhmei tei rui si diangc the. 21Kaniw nchumhmei chaeng tei thayna kaniw khang tiiloumei nthanmei latdanv tei laalou makna mi khou tei rui tat patmei suangc, nchumhmei chaeng tei thay mak khammei rui kaniw khang gay ni tuang e. 22“Si thu kamei rui nruy patloumei tei tu dat re,” khatni “guak ta duilowlou tiki bih niangc dat re,” twna samei latchap hei kaniw khou guang tangh tuang the.#Lkd 26.11
Currently Selected:
2 PITAR 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
