1 JAHON 1
1
1Puakthau puaksiak khou rui nai bammei ringhmei Lat lam khou aniw rui nangniw khou hy tuang e. Kamei rui sa kahakmei aniw chu the; aniw mik kahak rui kata how the. Ngguay, aniw how the khatni aniw baanc rui kata kahitow the.#|Jhn 1.1 2Mi ringhmei hei mik rui howmei khou ndauh pat the, kumna aniw kata how the. Hei zaeng rui aniw kalam khou sa bam tuang e khatni Pu khou naimei aniw khou ndauhloumei ringcsuangmei lam hei nangniw khou dinclou tuang e.#Jhn 1.14 3Aniw rui howmei khatni chumei guay tei aniw rui nangniw khou dinclou tuang e. Mi hei aniu Pu khatni Kanac Mpouh Jisu Khrista khou akhatna swna bammei khou hei nangniw ni lay bam muay khang rui e. 4Aniw#aniw: Baanhhy baibal asaekc khou thu nangniw twna hylou e. neihla nthuih khang, mi hei hypui tuang e.
Ravguangc Thu Gaanhmei e.
5Aniw kakhou rui chuna dinc ndauh bammei chamv kiu mi hei e: Ravguangc thu gaanhmei e, kumna kakhou zinghmei khat sini maek ge. 6Aniu kakhou bam the twna sa laki, zinghmei khou lungc bam e thei, aniu lat khou ni, taanv khou ni saraamhmei e. 7Kamei gaanhmei khou bammei kumcna aniu ni gaanhmei khou bam e thei, aniu akhatna di the, khatni Kanac Mpouh Jisu zei rui aniu ta paapc guay khou rui sw nthanlou the.
8Aniu rui aniu paap maek ge twna sa e thei, aniu rana aniu ta guat tuang e, khatni aniu khou nchumhmei maek ge. 9Tiki aniu rui aniu paap Ravguangc khou kalauh ti thei, kamei thu kalat suai makmeipu e, khatni nchumhmei taanhmeipu e; kumna kamei rui aniu paap guay kuaklou puni khatni aniu khuay guay sw nthanlou puni. 10Aniu paapc taanh mak ge twna sa e thei, aniu rui Ravguangc ta saraamhmei tiswlou the, kumna kalat aniu khou maek ge.
Currently Selected:
1 JAHON 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
