2 PITAR 1
1
1Jisu Khrista bangc khatni katuang latdiutatmei Simon Pitar rui —
Aniu Racguangc khatni Jisu Khrista ramgai paan rui kunghmei aniu lwmmei tei laatow nchamcmei nunc khou hymei:
2Ravguangc khatni Jisu Khrista ta thaymei paan rui zauzian khatni chuzaenghmei nangniw khou mbu hay hay thau bam di tho.
Ravguangc rui Kapahloumei khatni Kawloumei
3Aniu kalingna-ravchaptatmei panty khou lungc ngam khang kage naimei guay Ravguangc tuang pumtan rui aniu khang tiilou the. Mi hei kahym khatni karamgai lay laa khang#|kahym khatni karam gai lay laa khang: hamh e thei kahym khatni karamgai paan rui. aniu ta kawloumeipu ta thaymei paan rui laatow tuang e. 4Mi kumcna kamei rui aniu khang tii ni twna nrianhloumei daihmei khatni kunghmei kaipat tei aniu khang tiilou the. Aniu ta sw kasic nimei mbaanv tuang simei ta kahawmei khou rui mi paan rui aniu duak patna, Ravguangc tuang lwnlung lay laa ngam khang e. 5Mi zaeng rui nangniw khou naimei lwmmei ruc khou kheiliak gaymei; kheiliak gaymei ruc khou thaymei; 6thaymei ruc khou pumh sinriapmei; pumh sinriapmei ruc khou khaengvthaymei; khaengvthaymei ruc khou ravningchuymei; 7ravningchuymei ruc khou chana punav ta nzianmei; chana punav ta nzianmei ruc khou nzianmei nkimlou khang karamc o. 8Mi gunc guay hei nangniw khou nai ni tuang e, kumna mi guay hei nangniw khou mbu thaupui thei layna, nangniw Jisu Khrista ta thaymei tuang thai, mi guay hei rui nangniw khou ti-nthailou ni tuang e. 9Tiki mi gunc guay hei nai makpui mei tei thu how duc ngam makpui mei e khatni mik tiatmei e, kumna katuang tat kanmei ganv tuang paap guay tei sw nthanlou kan the twmei kamei ningtow dat mak khe.
10Mi zaeng rui, achanathiu, nangniw ta kawloumei khatni kadahloumei tei kiuc dyng the twmei lyan khang karamc ranv o. Mi kum pwkhou, nangniw bow dat zat lak khe.#bow dat zat lak khe: hamh e thei nangniw lwmmei mpat zat lak ge; hamh e thei nangniw paapc khou keylou zat lak ge. 11Kumna aniu Poubauhmei Guloumeipu Jisu Khrista tuang tingsaeng guangcdic khou gut khang giuga dat lak khe.
12Mi zaeng rui, mi guay hei nangniw thay tangna, nangniw laaloumei nchumhmei khou tei ntipna ding bam sini, mi guay hei ai nangniw ta tining tow dat dat bam puni. 13Ai ringc bamv saanv, mi guay hei nangniw ta tining tow bammei hei athouc e twna ai ning e. 14Aniu Poubauhmei Jisu Khrista rui akhou dincloumei thei layna, ai mi mbaanv pumc hei mpatlou nimei ganv asaanh mak khe twmei ai thay the. 15Ai theic kan sini nangniw mi guay hei amuc makna ningtow bam nuh khang ai swlou puni.
Mik rui How Kahakmei Khrista tuang Hymdaihmei
16Aniw rui nangniw khou dincloumei hymdaicna Poubauhmei Jisu Khrista guang nimei latdyn hei maansei lungning khou rui patmei damc duancpui pary hamh e. Katuang hymdaihmei tei aniw mik kahak rui how the. 17Kamei kapu khou rui champouhmei khatni hymdaihmei laapui ganv khou, Kauh Liangmei Hymdaihmei khou rui, “Mi hei alung kwnmei, ai nzianmei Nac Mpouh e!” twna kauc key khou aniw bam khwan e. 18Aniw kamei lev nthanmei chyngbut khou bam khou, mi tingkauh thangc rui kauc keymei khwan tei aniw chu the.#Met 17.1-5; Mrk 9.2-7; Luk 9.28-35 19Mi zaeng rui, muhzwng nunc rui dincloumei lat hei aniu lwm ntip hay hay khang nai the. Nangniw mi khou tei lungh louna bam e thei, nangniw gay puni. Kalam thu mi hei, nangniw khang lauthwan gaanphiu pat mak saanv, tinggaanh mak saanv zinghmei khou gaanc bammei maibungc tei kumh tuang e. 20Rey liangmei khou nangniw thay nimei thu, Nthanmei latrik khou naimei dinc kasuakcloumei guay tuang kabac hei meic gaanv khat na sini karana rui hanc nina hamh e. 21Kalam thu muhzwng nunc rui saloumei lat hei maansei lungning khou rui pat tu hamh e; tiki Ravguangc khou rui patmei lat tei Bumaengh Nthanmei rui maansei ta tisa tuang e.
Currently Selected:
2 PITAR 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
