1 PITAR 5
5
Ravguangc tuang Lauziu pang
1Ai kahak ni gaanvthaih akhat swna nangniw phwamling gaanthaic guay khou zaenghuay e. Khrista ryanra khaengvmei tuang sakhi, khatni ndauh pat punimei hymdaihmei tei lay laa nimei ai rui nangniw khou zaenghuay e: 2Nangniw khou nsinloumei Ravguangc tuang lauziu pang ta tei gaengc o. Taanc zih zihna taanhmei hamhna, Ravguangc rui kahawpui thei layna taanc niina taanc o. Syan lanv khang rui hamhna, taanclou nii changhna taanc o.#Jhn 21.15-17 3Nangniw khou nsinloumei lauziu pang ruc khou tei nangniw kaipouc kumcna sw riu, tiki lauziu pang tei rui lay nzeic nuhpui lwnlung swna lungclou o. 4Kumna lauziu gaenghmei kapypu tei guang pwkhou, tuai dat lakmei hymdaihmei swanpyrun nangniw laa puni.
5Alaucthiu, nangniw ni gaanvthaih guay bangc khou bam o. Nangniw niamh keyna khat khat siamruai sw o. “Daihriw swmei ta Ravguangc nuh mak ge.”#Lkd 3.34 6Hei zaeng rui, ngammei Ravguangc baanc pwam bangc khou nangniw niamh key o. Kum e thei kamei rui nuhloupui ganv khou nangniw ta zay kauh thaulou puni.#Met 23.12; Luk 14.11; 18.14 7Nangniw tuang lungh geic kadanmei guay tei kakhou tiilou o; kamei nangniw khang kadanlou bam e.
8Nangniw ramhthayna ntak nrakna bam o! Nangniw ta zauczihmei ravsic hei rah bammei kamangliangpui kumcna thowkumhmei ta swluai tow puni cho twna rik tat bam e. 9Nangniw lwm ntip bo khatni ravsic ta ding akhaengv o. Lwmmei guay thu mbaanv kapwm khou nangniw ryanra bammei kumcna ryanramei ariw bam muay tuang de twmei nangniw thay e. 10Matak khat mi kumna ryanra khaengvloumei tangv, Khrista paan rui katuang tingsaeng hymdaihmei laa khang nangniw ta kanloumeipu, zauzian guay Racguangc kamei rui, nangniw ta ti-nthuihlou puni, sw ntiplou puni, titanclou puni, khatni tiding ntiplou puni. 11Ngamv hei kakhang e tingsaeng. Amen
Dwangay Kadymei
12Lwmnuhmei chana akhat re twna ai laa bammei Silbana paan rui mi duimei tatdyn hei ai hy tuang e. Mi hei rui ai nangniw ta katiuloupui tuang e khatni mi hei kalingmei Ravguangc zauzian the. Mi khou hei ding ntipna ding bam o.#Lat 15.22,40
13Ravguangc rui kapah patloumei, Babilon#Babilon: Ndauhloumei latrik khou kumcna mi hei Rom ta khuangh e. khou bammeipui rui nangniw khang dwan gay kady e. Anac mpouh Mark rui ni dwan gay kady#Lat 12.12,25; 13.13; 15.37-39; Kol 4.10; Phl 24 e. 14Nzianmei tuang khat khat ta kaputna dwan gay kady kary o.
Khristamei nunc nangniw khou chuzaenghmei nai diu.
Currently Selected:
1 PITAR 5: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
