1 JAHON 5
5
Aniu rui Mbaanv ta Ngammei
1Thow pw ni Jisu hei Khrista e twna lwmpui mei tei Ravguangc nac the. Pu ta nzianpui mei tei kanac ta ni nzian e. 2Aniu Ravguangc nac nunc ta nzian e twmei aniu thaymei kiu thu: Ravguangc ta nzianmei khatni kalatdanv guay piumei khou nai the. 3Kalam thu aniu rui Ravguangc ta nzianmei twmei hei kalatdanv piumei hei the. Kalatdanv guay hei aniu piu ngam lakpui tuang hamh e.#Jhn 14.15 4Kalam thu Ravguangc nac guay thu mbaanv ta ngam the. Kumna lwmmei paan rui aniu mbaanv ta ngam the. 5Mbaanv ta ngammei kiu thow tei cho? Jisu hei Ravguangc Nac Mpouh e twna lwmmei nunc tei e.
Jisu Khrista tuang Sakhi
6Jisu Khrista hei dui lev zei rui sakhi swna guang tuang e. Dui na rui hamh e; dui lev zei mi kanei rui e. Mi hei kaling the twmei Bumaengh kahak rui sa the. Bumaengh hei thu nchumhmei e. 7Sakhi kathumh nai e. 8Mi kiu thu: Bumaengh, dui khatni zei e. Mi kathumh tuang sakhi hei nchamc e. 9Aniu maansei tuang sakhi ta lwm e; tiki Ravguangc tuang sakhi thu tanc ran e, kumna kamei rui Kanac Mpouh lam khou katuang sakhi tiilou the. 10Ravguangc Nac Mpouh khou lwmloumei kathuic lung khou mi sakhi hei nai the; tiki Ravguangc ta lwm makmei guay rui kata saraamhmei tiswlou the. Kalam thu Ravguangc rui Kanac Mpouh lam khou samei ta tei kamei lwm mak ge. 11Sakhi kiu thu mi hei e: Ravguangc rui aniu khang ringcsuangmei tiilou the, kumna mi ringcsuangmei hei Kanac Mpouh khou nai e.#Jhn 3.36 12Kanac Mpouh ta laatowmei guay tei mi ringcsuangmei hei laatow the; tiki Ravguangc Nac Mpouh ta laatow makmei guay tei ringcsuangmei laatow mak ge.
Ringcsuangmei
13Ravguangc Nac Mpouh khou lwmmei nangniw khou ringcsuangmei nai the twmei nangniw thay khang ai hypui tuang e. 14Aniu Ravguangc hu khou aniu lam khou lwmsi tuang nai dat mak khe, kalam thu aniu rui tabui pw ni kamei ningmei thei layna kakhou ney pwkhou kamei chulou the. 15Aniu neymei kathuic kamei rui chulou e twmei aniu thaypui zaeng rui, kakhou aniu rui neymei guay tiilou e twmei ni aniu thay e.
16Nang chana punav rui paapc taanc bammei ta how e thei, kumna hei tei theic nimei paap hamh e thei, kakhang huayneylou nina e. Kum pwkhou kapaap tei theic nimei paap hamh mei khang tei ringhmei tiilou puni. Theic nimei paap nai e; mi khang tei huayney o twna ai sa mak ge. 17Taanc maanvmei guay paapc e; tiki theic nimei paap hamhmei nai e.
18Ravguangc nac nunc thu paapc taancna bam mak ge twmei aniu thay e. Kalam thu Ravguangc Nac Mpouh rui kaniw ta gaeklou bam e, kumna simeipu rui kaniw ta sw kasic ngam mak ge.
19Mbaanv kapwm Simeipu baanc bangc khou bam sini, aniu thu Ravguangc tuang e twmei aniu thay e.
20Ravguangc Nac Mpouh lungc guang the, kumna kalingmei Racguangc ta thay khang, aniu khou kabah thaymei tiilou the twmei aniu thay e. Kanac Mpouh Jisu Khrista khou bammei paan rui aniu kalingmei Racguangc khou bam the. Kalingmei Racguangc kiu mi hei the, khatni ringcsuangmei kiu mi hei the.
21Anacthiu, ravmaengc khou rui rei pat ro!
Currently Selected:
1 JAHON 5: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
