1 TIMOTHI 4
4
Dinc Mbianghpui Mei nunc
1Nkhamhpui ganv khou meic gaanvsaekc thu lwmmei mpatlouna guatmei bumaengc nunc lat khou khatni ravsic nunc tuang riakdyn khou lunghgut tat kan puni twna Bumaengh rui nthanna salou the. 2Mi kumhmei latdyn guay hei, kaniw tuang nkhuai nzih thaymei lungning tei mai raw haenghmei ntanc rui kabic ndyloumei, saraamhmei, meicguatmei nunc tei rui dinc the. 3Kaniw rui nowkawmei nchumh mak ge twna nchamlou e khatni nchumhmei ta thaymei lwmmei nunc rui thuanckuna tu khang Ravguangc rui damcloumei taektw asaekc ta tu nuh mak ge twna nchamlou e. 4Kalam thu Ravguangc rui damcloumei puat guay gaymei rana de, ganc pat khang ramhkhat sini maek ge, tiki ramh guayna tei thuanckulouna tu nina e. 5Kalam thu Ravguangc lat khatni huayneymei rui hei tei nthanmei taektw sw the.
Khrista tuang Gaymei Siamruaimei
6Nang mi latdyn guay hei lwmmei chana guay khou nchamlou bam e thei, khatni nchumhmei lat khatni nang piu bammei riakdyn tei rui nang ta taektw kumcna makuat thau bam e thei, nang Khrista Jisu tuang gaymei siamruaimei sw puni. 7Tiki Ravguangc tuang hamhmei damc duancpui tuang pary khou tei rui nang thu ducna bam o. Hei tei gaengmei tuang hamh e; tiki nang thu ravning chuyna lungh khang karamc o. 8Meic pumc gay khang swmei hei gaengmei tuang asaekc nai e; tiki ravning chuy khang swmei thu kalam katana khou gaengmei nai e. Hei tei rui ntaw panty khang ni, thei thangc panty khang ni gaeng e. 9Mi hei kalingmei lat re, laalou rap nipui lat re. 10Mi khang rui aniu karamc ranvna taanc e, kalam thu meic guayna khang, nkunna lwmmei nunc khang kanloumeipu ringhmei Racguangc khou rui aniu rigwnna bam e.
11Mi guay hei piu nina e twna sa o khatni nchamlou tio. 12Nang ta alauc de twna meic nunc rui mala mak khang sw o. Nang latsav khou, kheiliak khou, lwmmei khou khatni nthanmei khou lwmmei guay lay nzeic nuhpui lwnlung khou lungc o. 13Ai guang mak saanv Nthanmei Latrik mathiuc khou pacloumei, chamvdinhmei khatni nchamloumei khou lungh gutna sw bam o. 14Gaanvthaih nunc rui nang ruc khou baanh sungclou khou tei ravmundincna salou kanmei nang khou naimei kaipat tei nang ntaamv riu. 15Nang khou mbu thaumei tei meic guayna how khang mi guay hei nang lungh gutna taanc bam o. 16Nang rana nang ta ni, nang rui nchamlou bammei latdyn ta ni zauc chuy o. Nang mi kumna sw bam e thei, nang rui nang ta ni, nang lat nking bammei nunc ta ni kanlou puni.
Currently Selected:
1 TIMOTHI 4: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
