1 TIMOTHI 3
3
Phwamling khou Taanvpy Sinmei nunc
1Thowkumhmei rui phwamling tuang taanvpy sinmei taanv hei kahaw e thei, kamei taanv gaymei kahaw tuang e twna samei hei suai makpui lat re. 2Phwamling tuang taanvpy sinpui mei hei khanvbamv maekpui mei sw nina e: kanow akhat namei,#kanow akhat namei; hamh e thei nowkaw guai namei. kalung nniapcmei, si gay kakhanh thaymei, chakhwang swlou nuhmei, gin ga laalouthaymei sw nina e; nchamlou thaypui mei sw nina e;#Tit 1.6-9 3zouh mba makpui mei, khatni kalungrat sipui mei hamhna kalung nzaenghpui mei nina e; syan agaamv makpui mei nina e; 4kakai kaikhunc ta sin chuyna kanac nunc kata chakhwang swna latpiuna lunghpui mei nina e. 5Kalam thu kakai kaikhunc ta sini sin thay makpui mei tei rui akumhna Ravguangc tuang phwamling ta makav nina cho? 6Lungh laic pat thanhpui mei rui sw lak nina e, kalam thu kamei daihriw sw thauna Diabol rui taanc kanmei khuay kahak tei kamei ni taanc nuh e. 7Kata tizaklouna Diabol phac khou keylou mak khang, kamei tei phwamling paengc thangc bammei guay rui ni ningchuy bampui mei nina e.
Diken Nunc
8Mi hei kumcna Diken guay ni, changh siph sipmei khatni kabaley kanei makmei nina e; kaniw zouh mba makmei khatni syandui agaamv makpui mei nina e; 9khatni karam lum tei lwmsipui tuang maekna lwm changh siph sippui mei nina e. 10Kaniw ta tei nchanv zauc rey nina e, kumna nuh the tw pwkhou rui diken tei tisw nina e.
11Kaniw now#kaniw now; hamh e thei ntumei diken. guay tei ni kheiliak gaymei, meickai ta nsuc nrauc makmei, lungh nzaenghmei khatni ramh lam guayna khou lwmnuhpui mei nina e.
12Diken nunc tei kanow akhat namei,#kanow akhat namei; hamh e thei nowkaw guai namei. khatni kanac nunc khatni kakai kaikhunc ta sin chuyna sin ngammei nina e. 13Kaniw tuang taanv taanc chuyna taanc bammei diken nunc ta tei meic nunc rui ningchuylou puni, kumna kaniw lwmmei lam khou baucna sa ngam puni.
Daic Liangmei Ravchap
14Ai mi tatdyn hei hyna hyna asaanh makmei lungc khou nang daeng khou guang khang lwmgayna bam e. 15Tiki ai guang nyanmei tuang nai e thei, aniu Racguangc kaikhunc khou akumhna tat nina cho twmei mi tatdyn khou hei rui thay khang e. Ravguangc tuang kaikhunc twmei kiu thu, ringhmei Racguangc tuang phwamling nchumhmei tiangdaic ta e. 16Aniu lwmmei ravchap hei nchumhmei, daic liangmei ravchap be. Mi ti hei meic gaanv khat na rui sini khiat dat ngam mak khe:
Kamei maansei swna lungc guang e,
kiuc e twmei Bumaengh rui lyanlou e,
kumna kauh baanchara guay rui how e.
Kata zaatc guay khou dinc ndauh the,
mbaanv kapwm khou lwm the,
kumna tingkauh thangc laa thau kan the.
Currently Selected:
1 TIMOTHI 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
