1 TIMOTHI 2
2
Ravguangc Kalummei khou Sw Nimei Riak
1Rey liangmei khou ai rui katiu e: nangniw huayneymei khou meic guayna khang huayneylou o khatni thuanckulou o. 2Aniu nchu nrina lungc simh simna, ravning chuyna khatni khat khat ta chakhwang swna lungc nuh khang rui guangh nunc khang khatni ngamv sinmei nunc khang huayneylou o. 3-4Mi hei, meic guayna kanloumei laa kanmei khatni nchumhmei ta thay kanmei ta laa niimeipu, aniu ta kanloumeipu Ravguangc mikzuat khou gaymei e khatni kamei rui kahawmei e. 5Kalam thu Ravguangc akhat nai e, khatni maansei ta Ravguangc khou zaykariulou datmeipu gaanv khat nai e. Kamei kiu maansei Khrista Jisu, 6maansei ta thuakpatlou khang karana kata tiipatloumeipu hei e. Ravguangc rui meic katana kanloumei laa kanmei ta laa nii e twmei kaganv chamei khou ndauhloumei kiu mi hei the. 7Hei zaeng rui, lwmmei khatni nchumhmei tuang chamv hei dinh khang ata Zentelmei khang latdiutatmei khatni dinhpouc swna ndiulou the. Ai saraamh mak ge; kaling sa bammei tuang e!#2 Ti 1.11
8Nggaanvmei guay kabamv kathuic khou agay agimei khatni lunghpuamc zawzinghmei maekna nthanmei baanc zaythauna huayneymei ta ai kahaw e.
9Ntumei guay ni pwanpiu khou howsi how gay thayna how manimpui tuang pwanpiu piumei ta kahaw e. Sam kasiamhmei rui, kachaekc kaphut rui, khatni kamanv kunghmei pheybaan rui karuhmei hamhna,#1 Pi 3.3 10ravningmeipui khang ziapmei gaymei taanv rui karuh o. 11Ntumei guay thu nchamloumei tei reih reina, niamhna nking kan diu. 12Kaniw nggaanvmei ta ncham khang hamh e, hamh e thei nggaanvmei ruc khou ngamv sin khang ai kaniw ta nuhlou mak ge. Kaniw reih reina bam nina de. 13Kalam thu Adam ta damclou rey lana Ev ta damc datpui tuang e.#Tha 2.7,21-22 14Guat kanmei tei Adam ta hamh e; mi ntumei ta tei de; kumna kamei rui Ravguangc latdanv liam the.#Tha 3.1-6 15Tiki ntumei guay ta ni lwmmei khou, nzianmei khou, nthanmei khou khatni kachangc siph sipmei khou ntipna bam e thei, nah puanhmei khou tei rui kaniw ta kanlou puni.
Currently Selected:
1 TIMOTHI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
