1 JAHON 2
2
Aniu ta Nkhavloumei Khrista
1Anacthiu, nangniw paapc taanh mak khang mi hei nangniw khang hy tuang e; tiki thowkumhmei paapc taanclou e thei, Pu khou aniu khang huayneylou khang nchumhmei, ravchaptatmei sungpouc Jisu Khrista nai e. 2Kapaan rui aniu paap guay kuaklou tuang e; aniu paap khang na hamh e; mbaanv kapwm paap khang kamei lynlou the.
3Aniu kalatdanv guay piu e thei, aniu kata thay the twmei nthan the. 4Thowkumhmei rui kamei kata thay the twna sa laki, kalatdanv guay thu piu makpui mei tei saraamhpui mei e, khatni kakhou nchumhmei maek ge. 5Tiki kalat piu bampui mei tei thu kamei Ravguangc ta nzianmei tei ti-nthuihlou bampui mei e. Aniu kakhou bam changh the twmei thay nimei kiu thu mi hei e, 6twmei thu: thow pw ni kamei Ravguangc khou bam the twna sapui mei tei Jisu Khrista kumcna lungc nina e.
Latdanv Kathanc
7Nzianmeithiu, mi ai rui nangniw khou hy bammei latdanv hei kathanc hamh e; mi hei thaurey khou na rui nangniw khou tiiloumei latdanv guangc tei de. Latdanv guangc kiu thu nangniw chu tang kanmei tei the.#Jhn 13.34 8Tiki ntaw ai nangniw khou hy bammei latdanv hei thu kathanc e. Kalam thu mi tuang kalingmei tei Khrista khou ni, nangniw khou ni how e, kumna gaanhmei ling tei gaanc bam the.
9Thow pw ni kamei gaanhmei khou bam the twna sa laki, kachana punav ta karaeng e thei, ntaw nganvna kamei zinghmei khou bam di he. 10Thow pw ni kachana punav ta nzianpui mei tei gaanhmei khou bam the, kumna kamei rui meickai ta#meickai ta ramh e thei aniu ta. tiphaysuy nipui tuang maek ge. 11Tiki thow pw ni kachana punav ta karaengpui mei tei zinghmei khou bam di he; kamei zinghmei khou tat bam e, kumna kamei tabui thangc tat bam tu cho twmei kamei thay mak ge. Kalam thu zinghmei rui kamik swtiat the.
12Anacthiu, ai nangniw khang hy tuang e, kalam thu Khrista paan rui nangniw paap guay kuaklou the. 13Puthiu, ai nangniw khang hy tuang e, kalam thu puakthau puaksiak khou rui nai bammeipu ta nangniw thay the. Chabwanthiu, ai nangniw khang hy tuang e, kalam thu nangniw Simeipu ta tei ngam kan the.
14Anacthiu, ai nangniw khang hy tuang e, kalam thu Pu ta nangniw thay the. Puthiu, ai nangniw khang hy tuang e, kalam thu puakthau puaksiak khou rui nai bammeipu ta nangniw thay the. Chabwanthiu ai nangniw khang hy tuang e, kalam thu nangniw tanc the; Ravguangc lat nangniw khou nai the, khatni nangniw rui Simeipu ta ngam the.
15Mbaanv khatni mbaanv tuang guay ta nzian rio. Nangniw mbaanv ta nzian e thei, nangniw Pu ta nzian mak ge. 16Mbaanv tuang guay twmei thu—meic pumc rui kahawmei, mik rui kahawmei, meic nunc rui gaengh sw bammei mbaanv tuang guay hei Pu khou rui guang tu hamh e; mbaanv khou rui de. 17Mbaanv khatni meic nunc rui kahawmei mi khou naimei guay hei ni maan kan ni de; tiki Ravguangc ningmei taanhpui mei na tei tingsaeng ringc bam e.
Khrista ta Zauczihmeipu
18Anacthiu, mi hei nkhamhmei ganvdak di the! Khrista ta zauczihmeipu guang puni twna nangniw khou dinclou kan the; kumna ntaw thu Khrista ta zauczihmei mei mpeyna pat the. Kumna ntaw thu nkhamhmei ganv ana the twmei aniu thay the. 19Kaniw aniu pang khou rui tat pat kanmei hei kaniw aniu pang khou kazauhmei hamh tina e. Aniu pang khou kazauhmei nunc khwan e thei, kaniw tat pat makna bam kan ni tuang de. Kaniw tat pat kanmei hei rui kaniw hei aniu pang khou kazauhmei hamh e twmei nthanna lyan the.
20Tiki nangniw thu Nthanmeipu rui bun keymei Bumaengh Nthanmei tei laatowmei nunc the, kumna nangniw thu nchumhmei tei thay the. 21Kum thena, nangniw nchumhmei tei thay mak ge twna ai hy bam tu hamh e; tiki nangniw thaypui zaeng rui hy tuang e, khatni nchumhmei khou rui saraamhmei pat mak ge twmei ni nangniw thay e.
22Kum e thei saraamhpui mei kiu thow tei cho? Jisu hei Khrista hamh e twna sapui mei tei e. Mi kumhpui mei tei Khrista ta zauczihmei the—kamei Pu ta ni, Kanac mpouh ta ni nuh mak ge. 23Nah Mpouh ta laalou makpui mei tei Pu ta ni laalou mak ge. Nah Mpouh ta laaloupui mei tei Pu ta ni laalou e.
24Nangniw thaurey khou rui chu kanmei latdyn tei nangniw lungc khou lou o. Hei tei nangniw lungc khou nai bam e thei, nangniw Nah Mpouh khatni Pu khou bam bam puni. 25Khrista rui aniu khang tii ni twna samei ringcsuangmei kiu mi hei the.
26Nangniw ta guat khang sw bammei nunc lam khou ai nangniw khou hy bam tuang e. 27Tiki nangniw thu Khrista rui tiimei Bumaengc tei laatowmei nunc di the. Bumaengh tei nangniw khou bam saanv, nangniw ta meic baihmei rui ncham dat bam khang kage maek khe. Kalam thu katuang Bumaengc rui nangniw ta ramh lam katana nchamlou bam tuang di the. Kamei rui nchamloumei tei nchumhmei e; saraamc dat mak khe. Hei zaeng rui, Bumaengh rui dincloumei tei piu o, kumna Khrista khou bam tanh tan o.
28Ngguay, anacthiu, Khrista guangpui Nungc kiu zakna nkamh makna, baucna kata ariw ngam khang kakhou bam tanh tan o. 29Khrista thu nchumhmei e; kumna nchumhmei taanhmei guay Ravguangc nac e twmei thay nina e.
Currently Selected:
1 JAHON 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
