1 JAHON 3
3
Ravguangc Nac nunc
1Zauclo, Pu rui aniu ta adih nzian cho! Kamei rui aniu ta heidikamv nzianna aniu ta Ravguangc nac nunc twna kawlou the— aniu Kanac nunc changh the! Hei zaeng rui Ravguangc ta thay makmei mbaanv rui aniu ta thay mak ge.#Jhn 1.12 2Nzianmeithiu, aniu hei Ravguangc nac nunc the; tiki aniu tabui kumc puni cho twmei ntaw nthanna thay mak he. Tiki Khrista guang pwkhou kiu, aniu kakumc puni the twmei aniu thay e. Kalam thu kalwnlung kahak tei aniu how puni the. 3Mi kumcna Khrista khou rigwnmei naimei kathuic tei, Khrista nthanmei kumcna nthanna bam puni.
4Thow pw ni paapc taanhpui mei tei Ravguangc Latdanv piu makmei e, kalam thu paapc hei thu latdanv piu makmei e. 5Paapc guay#paapc guay: baanhhy baibal asaekc khou thu aniu paap guay twna hylou e. laa ganclou khang Khrista guang tuang e, kumna kakhou paapc maek ge twmei nangniw thay e.#Jhn 1.29 6Hei zaeng rui, Khrista khou bampui mei rui paapc taancna bam mak ge; paapc taanc bampui mei tei thu kata how mak ge, kata thay ni thay mak ge.
7Anacthiu, nangniw ta tiguat rio! Thow pw ni nchumhmei taanhpui mei tei, Khrista ravchaptatmei kumcna kamei ni ravchaptatmei e. 8Paapc taanc bampui mei tei thu ravsic tuang de. Kalam thu ravsic hei thaurey khou na rui paapc taanc the. Hei zaeng rui, ravsic tuang taanv guay swmaan khang Ravguangc Nac Mpouh guang tuang e.
9Ravguangc nac swna puanc kanmei guay thu paapc taanc bam dat mak khe. Kalam thu Ravguangc lwnlung kakhou nai the. Kamei Ravguangc nac lapui zaeng rui paapc taanc bam ngam mak ge. 10Thow tei Ravguangc nac cho, thow tei ravsic nac cho twmei thay nimei kiu mi hei e. Nchumhmei taanh makpui mei khatni kachana punav ta nzian makpui mei tei Ravguangc nac hamh e.
Khat Khat ta Nzian o
11Thaurey khou na rui nangniw chu kanmei latdyn kiu thu: niu khat khat ta nzian nina e twmei hei e.#Jhn 13.34 12Aniu Kain kumc nina hamh e. kamei Simeipu tuang mei swna kakainac kahak Abel ta swluai kan e. Tabui zaeng rui Kain kakainac ta dowluai tu cho? Kalam thu kataanv tei si khwan e; kakainac tuang taanv rui nchumhmei khwan e.#Tha 4.8
13Chana punavthiu, mbaanv rui nangniw ta karaeng pwkhou ngak rio. 14Aniu thu theihmei ta ganclouna ringhmei khou kaan pat tuang di the twmei aniu thay e. Kalam thu aniu chana punav ta nzian the. Nzian makpui mei tei thu theihmei pumtan bangc khou bam di he.#Jhn 5.24 15Kachana punav ta karaengpui mei tei meicdowmei e; kumna meicdowpui mei khou ringcsuangmei maek ge twmei nangniw thay e. 16Nzianmei kiu mi hei e: Khrista rui aniu khang kapanty tii pat the. Hei tei kumcna aniu ni aniu chana punav guay khang aniu panty tii pat nipui thouc e! 17Naimeipu gaanv khat rui kachana punav lungc ryanrana bammei ta how sini kakhou nzianmei pat mak ge thei, kamei Ravguangc ta nzian e twna akumhna sa ngam nina cho? 18Anacthiu, aniu lat na rui nzian ri kho; tiki nzian changhmei tei taanv rui lyan kho.
Ravguangc hu khou Bauc Ngammei
19Aniu nchumhmei khou bam the twmei thay nimei kiu mi hei the; aniu rouh tuang maekna Ravguangc hu khou guang ngammei kiu mi hei the. 20Aniu lungning rui aniu ta nkhuai e twna sa pwsini, Ravguangc thu aniu lungning khang suangc mbumei de, kumna kamei ramh guayna thay e. 21Hei zaeng rui, nzianmeithiu, aniu lungning rui aniu ta nkhuai e twna salou mak ge, aniu Ravguangc hu khou rouh dat khang maek khe. 22Aniu katuang latdanv guay piu tipui zaeng rui khatni kamei ningmei taanc tipui zaeng rui aniu kakhou ney neymei laatow e. 23Katuang latdanv kiu thu Kanac Mpouh ta lwm o khatni Khrista tuang latdanv kumcna khat khat ta nzian o twmei hei e.#Jhn 13.34; 15.12,17 24Ravguangc latdanv piumei guay tei Ravguangc khou bam the khatni Ravguangc kakhou bam the. Ravguangc aniu khou bam the twmei kamei rui aniu khou tiiloumei Bumaengc paan tei rui aniu thay e.
Currently Selected:
1 JAHON 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
