ROMNYI 3

1Isathu Judah nyithu na Judah nyi nkenyethu miwi kekiyi ben kwe? Nyelela ahyukahan ghena ma men ben kwe? 2Anle, alen kejon wi la kekiyi ben. Atuwa, Anyiza na ma ketsijüh pi Judah nyithu nondi chi. 3Isala keujüla mathu pahan na ajühtsentsa nsala lethu, tsüna Anyiza la ajühtsentsa nsalaya mehai kwe? 4#Zak 51.4 Nyele, tsüti saya nben! Anyi tsüdi milimesa lela Anyiza tsü ajühtsentsa senden. Ntsawajüh na khiben,

“Njüh kekhi wi nyu yala

njüh wina atsentsa chüya thsü,

nu no ajühkaghakhi wi khang meyathu yishü.”

5Isala keujüla ithu nketsatan tsüna Anyiza ketsatan tsü tsütson metha chi lethu, ithu na khatile khi nu? Anyiza na ithu meten cüthu, ithu na ma sazzi benle khiya mehai kwe? (Hati kekeü-u na ben.) 6Khiela tsüti saya nben! Keujüla Anyiza na ntsatan lethu, ma khati nu anyi jühkaghakhiya mehai nu?

7Isala keujüla hi nketsatanwa tsüna Anyiza nyankethang nu ma ketsatanwa tsü sa pi ji kayi chiben lethu, mangkesa na hi pi khili la kesami nyi kesü ti meshensa ben nu? 8Isathu, mangkesa na “Ithu nkemehai kuli nu kemehaiwa ya gho thsü nalo” isa nkhi nu? Ntsakhiwa anyi pahan na hi ha kekhi ghena khi pi hi metsimeni le! Mathu nmeshensathu keyishü wina meshensah ben.

Ketsatan Kesüla Nmi

9Isathu, ikhang Judah nyithu na Judah nyi nkenyethu miwi mehaiki ben kwe? Tsüti nsa le! Hi Judah nyithu nu Judah nyi nkenyethu tsüdila makesü nu kesami kekhu wi benle kesa pi ccüca chidha. 10#Zak 14.1-3; Zak 53.1-3 Ntsawajüh wi kekhi ti,

“Ciwi anyi kesüla ketsatan nyi nmi,

11ciwi kemetsa nyi kesüla nmi,

nyelela Anyiza kekinyi nyi kesüla nmi.

12Anyi tsüdila Anyiza wina kheneng bvüdha;

mathu tsüdila sazzidha,

nu thola kemeshonwa nsa ladha, kesüla nmi.

13 # Zak 5.9; 140.3 Mathu pang na ashüjjen

nkejüphonla ketheng tsüti;

mathu mili pi milikemesa tsü khiden,

nu keshü jüh mathu pang wina keshhugho

tsüna amaghang ji nkemehai tsüti shhughoden;

14mathu pang na nyu kishenkecü

kekha jüh pi pongben.

15 # Isa 59.7-8 Mathu na wan nyu patena nu pathiden;

16mathu len wi ketizen kesa

nu keyasa ketan.

17Mathu na leben kecca lenwa tsü nchü,

18 # Zak 36.1 nyelela mathu na Anyiza kemessikü yen nchü.”

19Khilitsü Ayenwa tsüna anyi Ayenwa kekhu wi kebenthu ghena khiben le kesa ithu na chüben. Isanu anyi mabenla kemeshon khikeya nmila ayyi nyi tsüdila Anyiza jühkaghakhi keten wi tsü gho thsüle kesalina. 20#Zak 143.2; Gal 2.16 Kepaghenanye anyi kesütanla Ayenwa tsü nie nu kekuli wina Anyiza tuwi meshon yadha le khikeya nmi. Ayenwa kekuli tsüna anyi na samidha le kesa chüya thsü ketenwa tsü.

Anyiza Na Ithu Pi Ma Tuwi Meshonkeya thsü

21Isala Anyiza na khilitsü ma khati nu anyi pi ma tuwi meshonya thsüten khe pi ccüca chidha. Mosa Yenwa nu atusenjüh-kechüthu na tsü shei khiben lela tsüna Ayenwa wina mangla sa keya nmi. 22#Gal 2.16 Anyiza na anyithu ya Jisu Khrista kenondi ghena pi ma tuwi meshonya thsüden. Anyiza na Khrista kenondithu tsüdi wila hati saden, kepaghenanye ciwi kepapa kesa mangla nmi: 23Anyi tsüdila samidha nu Anyiza kekhang na hangshaya keten tsü temeja bvüdha. 24Isala Anyiza nanketizen kekila wina khukechi Jisu Khrista mathu lisha kecüwa ghena mathu pi ma tuwi meshon yadha. 25Anyiza na ma khuchi cü, nu ma ahhansha sa keshü wina anyithu na ma kenondi ghena mathu kesami teshi pi kecüwa saya thsüa. Anyiza na Khrista khukechi tsüna ma khati nu anyi pi ma tuwi meshonya thsüten khe pi ccüca kechi. Anyiza na kheni anyi kesami ghena lebensie nu mula nkemu ti saghodha. 26Isala khili tsü wi tsü Anyiza na anyi pi ma kitsantan tsü chüya thsüle kesalina ma anyi kesami ghena kuli bendha. Anyiza na hati nu ma ketsatan nu anyi Jisu Khrista kenondiwa pi ma tuwi meshon yaden kesa pi ccüca chiden.

27Isathu, ithu mangwa ghena kapvü nu? Mangla nmi! Isathu ma jjügi mangwa ghena nu? Anyi kesü Ayenwa niekeya ghena kwe? Nye le, isala ma kenondi ghena le! 28Tsalina anyi Anyiza tuwi meshonkeya tsüna kenondi ghena ketan khe Ayenwa kekhi tsü kenie wina nye le kesa ithu na chütiben. 29Nyelela Anyiza tsüna Judah nyi Nyiza ketan kwe? Ma Judah nyi nkenyethu Nyiza la nye kwe? Anle, ma Judah nyi nkenyethu Nyiza la le! 30#Aye 6.4; Gal 3.20 Anyiza na kesütan, nu ma Judah nyithu tsü mathu kenondi miwi pi ma tuwi meshon yaden, nu Judah nyi nkenyethu tsü mathu kenondi wina pi meshon yaden. 31Ha ma jjügi ithu kenondi ghena Ayenwa tsü yasa ben kwe? Nye le! Ithu na Ayenwa tsü satezü benden.

Currently Selected:

ROMNYI 3: RENGNBSI

Highlight

Copy