ROMNYI 2

Anyiza na Ghankenan

1 # Mat 7.1; Luk 6.37 Ipvüshangwa, no nyu ghan-nan ten kwe? Isathu, no anyi katsüha saben lela no kemeshon khikeya nmi. Kepaghenanye no nyu ghan-nan lethu mathu la no ghan-nan ben, tsüti kesa wina no ketanla no meshensah ben. 2Nu Anyiza na tsüthu ghan-nan lela tsüna saji le kesa ithu na chüben. 3Isathu ipvüshangwa, no kekuli tsüthu ghena nyu ghan-nan ketenwa no la tsüthu kuliden! No kemeshen tsü no Anyiza na nyu ghankenan tsü ghüya benle ben kwe? 4Nyelela no ma keccaketssü, kethankehi, lebenkesie tsü nkhichi laten kwe? No Anyiza na no ssi wa leben khapeghekeya wi chicü le keben ghena ma ccatssü le kesa no chüben. 5Isala no nleben-dhu sen nu ben, tsalina no ketanla Anyiza leben kekha nu kemeshon wina ghan-nan keten tsathangwa ghena no kemeten sa pi di kayi thsüle saben. 6#Zak 62.12; Kem 24.12 Kepaghenanye Anyiza na tsü tsathang wi meshu kesüsü kekuli kutimen pi cüden. 7Anyi pahan na kemehai kuli, nu anyankethang, kenyuwakü, nu anuphan kahang bha keten tsüti Anyiza na anuphan kahang pi mathu cüben. 8Anyi kepathu na achoghe nmehai nu kemehaiwa tsü meya mvula nkemehaiwa tsü nieden; Anyiza na mathu miwi ma leben kekha nu keminu pi chiben. 9Ciwi nkemehai kesa nyi tsüdila agüccü nu ketizen saben, tsüna Judah nyi atuwa nu Judah nyi nkenyethu ghena la. 10Isala Anyiza na anyankethang, kenyuwakü, nu kecca pi kemehai sa ketenthu tsüdi cüben, tsüna Judah nyi atuwa nu Judah nyi nkenyethu ghena la. 11#Aye 10.17 Kepaghenanye Anyiza na ayen makesü pi anyi tsüdila ghan-nan den. 12Judah nyi nkenyethu na Mosa Yenwa tsü nmi; mathu sami nu Ayenwa nkemi wina bhatagha ben. Judah nyithu na Ayenwa tsü ben; mathu sami nu Ayenwa wina mathu ghangnan ben. 13Kepaghenanye Ayenwa tsü kekina ghena anyi pi Anyiza tuwi meshonya nten, isala Ayenwa tsüna salo kekhi tsü kekuli wina. 14Judah nyi nkenyethu na Ayenwa nkemi ghena mathu kahang wi Ayenwa wina katsüha kuli lela tsüna mathu yen, kepaghenanye mathu na Ayenwa tsü nmi. 15Mathu yencüki wina Ayenwa na khi keben tsü pi mathu leben wi zhütheng kesa pi ccücaben. Mathu kemeshenwa la tsüna atsentsale kesa pi ccücaben, kepaghenanye mathu kemeshenwa tsüna kuti tsü mathu kimenni nu kuti tsü mathu sheipiden. 16Tsalina hi Jühtheü Kemehaiwa pi kesansi kenie wi Anyiza na Jisu Khrista wina anyi tsüdi kekuthi kemeshenthu ghan-nan keten tsathang wi hati saben.

Judah Nyithu Nu Ayenwa

17No ketanla no pi Judah nyile khiden. No Ayenwa tsü nondiden, nu no Anyiza nyile kesa meshen pi kapvüden. 18No Anyiza na no ya mangwa sa thsü mvu ben khe chüben, nu no Ayenwa wina kemehai keteshü kessikeya yen chüyadha. 19No anyon nkemuthu len ketsütsonwa, kejang wi kebenthu kewegüwa, 20kejüphonthu nu ghanyithu kesansiwa le kesa no nondiben. Kepaghenanye no Ayenwa wi tsü palakechü nu atsentsawa cüki tsüdila benle kesa chütiben. 21No nyu sansiden, isathu mangkesa na no ketanla no sansi meya nu? No “N-ghanfü lalo” nyu sansiden, isala no ghanfüten kwe? 22No “Nqheza lalo” khiden, isala no qhezaten kwe? No atsikezhüthu nanqanan den — isala no tsü kekinyijjen wi pala ghanfüten kwe? 23No Anyiza Yenwa tsü keben ghena kapvüden, isala no Ayenwa tsü kepakhhi ghena kejüghekeya sengho Anyiza miwi chiten kwe? 24#Isa 52.5Ntsawajüh wi khiben, “No Judah nyithu ghena Judah nyi nkenyethu na Anyiza nyan khimeshü den.”

25Keujüla no Ayenwa tsü nie lethu, no ahyukahan tsüna ma men ben, isala Keujüla no Ayenwa tsü n-nie lethu, no ahyu nkahanwa la mehai. 26Keujüla Judah nyi nkenye ahyu nkahan nyi kesü na Ayenwa kekhi tsü nieten lethu, Anyiza na ma pi ahyukahan nyi ti sa nben kwe? 27Tsalina Judah nyi nkenyethu na Judah nyi pi ma men nkemi saben, kepaghenanye no Ayenwa tsü ben nu ahyuhan lela no Ayenwa tsü pakhhi, isani mathu tsü ahyu nhan lela Ayenwa tsü nieden. 28Kepaghenanye Judah nyi atsentsawa tsüna amei kemu nu asajjü wi ahyukahan tsü nyele! 29#Aye 30.6 Isala Judah nyi atsentsawa tsüna anon wi ma leben wi ahyukahanwa tsü, tsüna Anyiza Ghamu kekuli khe zhüketheng Yenwa ghena nye. Anyi tsüwa tsüna Anyiza wina khe anyi wi keseng pvüya nten.

Currently Selected:

ROMNYI 2: RENGNBSI

Highlight

Copy