1 KORINTHNYI 12

Kemetha Ghamu wi Ajuthu

1Khili nthu na zhükechi ti Kemetha Ghamu wi ajuthu cüki khi waden. Icünyuthu, hi nthu yala tsüthu cüki atsentsawa tsü chüya thsü mvuben. 2Nthu na Anyiza npi kechü tuwi alen kejon wi nthu ssi deja sen wa kahangli nkemi atsikezhüthu tsü kinyi thsüle kesa nthu na chüben. 3Tsalina hi nthu yala chüya thsü mvuben, anyi kesüla Anyiza Ghamu wina “Kishen-keshi na Jisu miwi benlo!” khi nben, nu thola Kemetha Ghamu wina nkenye tsü “Jisu na Apvüwa,” le khi nben.

4 # Rom 12.6-8 Aghamulen wi aju kepapa na ben, isala Aghamu kesütan na tsüthu khuchiden. 5Ciwi kekuli alen kepapa na ben, isala Apvüwa makesü kekuli saben. 6Ciwi kekuli kepapa saya kemehai na ben, isala Anyiza makesü na papa kekuli saya kemehai pi tsüdila cüden. 7Meshu kesüsü wi Aghamu pi ccüca kechi tsüna tsüdi ghena kemehaiwa. 8Aghamu wi kemetsa pi meshu kesü cüden, nu Aghamu makesü wi palakechü pi anyi kepawa cüden. 9Aghamu makesü wi kenondi pi meshu kesü cüden, nu kesakinaa sa pi mehaikeya kekhang pi anyi kepawa cüden. 10Aghamu na amankesa kekuli kekhang pi meshu kesü cü; Anyiza ketsijüh kekhi pi kepawa cü; nu Aghamu chü kepapa saya kemehai pi kepawa cüden. Ajüh kepapa khiya kemehai kekhang pi meshu kesü cü; nu tsü jjügi khiya kemehai kekhang pi anyi kepa wi kesü cüden. 11Isala hathu ha tsüdila Aghamu kesütan nu makesü wina saben; ma kenen kemeshen wina aju kepapa kesa pi meshu kesüsü cüben.

Agwo kesü wi Alen Kepapakesa

12 # Rom 12.4-5 Khrista na agwo kesütan ti kesa, ciwi alen kepapa kejonla ben; alen kepapa saben lela agwo kesütan. 13Kepaghenanye ithu tsüdila, Judah nyithu le Grik nyithu lela nssümaghathu le ahvuthu lela Aghamu kesü ithu tsüdi baptiz sapi agwo kesütan sa thsü nu tsüdi pi Aghamu kesü jjü thsüdha.

14Kepaghenanye agwo tsüna alen kesütan nye, isala alen kepapa kesa kejonla saghu pi sa theng. 15Keujüla accü na “Hi akwen kesü nkenye ghena hi agwo wi nye” tsüti khi lela tsüna tsü sa pi agwo wi alen kesü nkenye saya nben. 16Nu keujüla akhuna na “Hi anyon kesü nkenye ghena hi agwo wi nye” tsüti khi lela tsüna tsü sa pi agwo wi alen kesü nkenye saya nben. 17Keujüla agwo tsüdila anyon sa lethu, khati nu pala zaya nu? Nu keujüla agwo tsüdila akhuna sa lethu, khati nu pala hansaya nu? 18Isala hati nu Anyiza na ma kemeshen sa nu alen kepapa kesa pi agwo wi chi theng. 19Keujüla tsüdila alen kesütan sa lethu, khati nu agwo sa kesa nu? 20Hati nu ciwi alen kepapa kesa kejon na ben, isala agwo kesütan.

21Tsalina anyon na akwen wi “Hi no nsenla mehai,” tsüti khiya nben. Nyelela ali na accü wi “Hi no nsenla mehai,” tsüti khiya nben. 22Tsüti kesawa nye, ithu na agwo wi alen kepapa kesa kesü ma kezü nkemiwa tsü la pi nkechi tsü mangla saya nben; 23nu ithu na agwo wi nsenthu yishükhang kesa nmile meshen keten tsüthu ghena ithu na aghuti sala noncca den; nu ithu na ma nyan khi yishü kesathu tsü mehaitsü noncca ntsa saden; 24nu aghutiwa sa ketenthu tsü nonccakhang sa nten. Anyiza na ma ketanla hati nu agwo sachi nu agwo wi aghutiwa nkenyethu yala kekü keti muya thsüden. 25Tsalina agwo wi gishü kepapa kesa nmi, isala alen kepapa kesa tsüdila khokho ghena meshenden. 26Keujüla agwo wi alen kesü na ketizen sa ben lethu, alen kepapa kesa tsüdila tsü gweghe ketizen saden, keujüla alen kesü na keseng pvüya lethu, alen kepapa tsüdila tsü gweghe anongheden.

27Khili nthu tsüdila Khrista gwo sadha, nu nthu kesüsü ciwi alen kesü saben. 28#Efe 4.11 Anyiza na anyi tsüdi pi kemehu wi alen kesüsü sa thsü theng: atuwa apostelthu, keniwa atusenjüh — kechüthu, nu kechengwa kesansithu; tsaseng wi amankesa kekulithu, tsashiwa kesakinaa sa pi mehai keya kekhang pi cü kethengthu, nyu kekiqathu, nyu len ketsütsonthu, nu ajüh kepa wi kekhithu. 29Mathu tsüdila apostelthu nyelela atusenjüh-kechüthu nyelela kesansithu nye. Tsüdila amankesa kuliya, 30nyelela kesakinaa sa pi mehaiya nyelela ajüh kepapa khiya nyelela tsü jjügi khiya kemehai kekhang nmi. 31Isala tsü miwi kemihhi ketikithu tsü muyale meshen khvu satenlo. Hi khili tsüdi miwi kemehai ntsawa pi nthu ccücaden.

Currently Selected:

1 KORINTHNYI 12: RENGNBSI

Highlight

Copy