1 KORINTHNYI 11

1 # 1 Kor 4.16; Fil 3.17 Hi Khrista ti sa keten tsü makesü nthu la hi ti sa yalo.

Kekinyi wi Alishan Kepvü

2Hi nthu seng ben, kepaghenanye nthu na keshüthangla hi meshen nu hi pi nthu kesansijüh tsü nie benden. 3Isala hi nthu yala Khrista na anyi tsüdi miwi aliwa, awuba na awubvü miwi aliwa, nu Anyiza na Khrista miwi aliwa le kesa chüya thsü mvu ben. 4Tsalina npvüza kesü na ma lishan pvü nu kekhie sa nyelela nyu jawi Anyiza jüh khi lethu, ma Khrista nkülaben. 5Nu nza kesü le kesü lela ma li nshanla kekhie sa nyelela nyu jawi Anyiza jüh khi lethu, ma ma liwa tsü nkülaben; tsüna ma lica kesa makesü sadha. 6Keujüla nza na ma lishan npvü lethu, tsüna ma lica kesawala mehai; isala nza kesü na alica kesa tsüna kejüghe kesü ghena ma ma li shan pvü kesa-u. 7Npvüza na ali nshan pvüla mehai, kepaghenanye ma Anyiza tsi nu ma nyankethang tsü pi mu thsüben. Isala nza na npvüza nyankethang tsü pi mu thsüben; 8#Ade 2.18-23 kepaghenanye nza wina npvüza nsachi, isala npvüza wina nza sachi. 9Nyelela nza ghena npvüza nsachi, isala npvüza ghena nza sachi. 10Tsalina tangnyilothu ghena nza kesü ma wuba kekhang kekhu wi keben zensu ali shan npvüthu yishü. 11Isala ithu Apvüwa wi kahang wi tsü, nza na npvüza nsen nyelela npvüza na nza nsen saya nben. 12Kepaghenanye npvüza wina nza sachi ketheng tsüti nza wina npvüza pvüghayaden; nu Anyiza na pala tsüdila pi hangya thsüden.

13Nthu ketanla ghan-nanlo, nza kesü ma li nshan pvüla nyu jawi Anyiza wi kekhie-u la nye khe. 14Kahang yenwa ketanla npvüza kesü alissen kesie kepvü tsüna ma nyankenyen benle kesa pi nthu sansiben. 15Isala keujüla nza kesü na alissen kesie pvü lethu tsüna ma tsikemehai. Alissen kesie pi ma cü ketheng tsüna tsü shan pvü thsüle kesalina. 16Isala keujüla anyi pahan ha ghena keccücanli mvu ben lethu, hi khi kebenwa na ithu nyelela Anyiza kemehuthu wi lela kekinyi wi ayen kepa sa ntenle.

Apvüwa Kemishukesa

(Mat 26.26-29; Mrk 14.22-25; Luk 22.14-20)

17Isala hi kecükegwe hathu wi nthu seng nben, kepaghenanye nthu saghu nu kekinyi wi kemehaiwa nyela nkemehaiwa saden. 18Atuwa wi, nthu ghola saghukeya wi akhang kepapa saben kesa nyu na hi kizadha; nu hi kenondi tsü pahan ntsakhiwa. 19((Nthu jawi akhang kepapa sabenla metsi, isanu kemeshon wi kebenthu tsü mechanshu mushiyadha.) 20Nthu na ghola saghu keya wi Apvüwa kemeshentsse tsü dsale gho nten. 21Kepaghenanye nthu na tsü kedsa wi nthu tsüdila anün kedsa ti dsaden, isanu pahan na ghamathu, kepathu na adina den. 22Nthu na kedsakejjü pen nthu jjen nmi kwe? Nyelela nthu na Anyiza kemehuwa tsü nkhichi nu mangla nkemithu kejügheya thsüle saten kwe? Hi ha cüki ghena nthu wi mangwa kekiza ghang ben nu? Hi nthu seng kwe? Nyele, hi nthu sengya nben.

23Kepaghenanye hi Apvüwa wi kesansi mukeya tsü pi nthu cüdha: Apvüwa Jisu na nyu ma matsa keten ghaja wi amesa be kesü tsü khuya, 24keseng pi Anyiza cü, pakhhiya, nu khi, “Hawa ha igwo, nthu ghena khukechi. Hi kemeshen zensu wina ha satenlo.” 25#Bvü 24.6-8; Jer 31.31-34 Tsü makesü, anün dsakeya seng wi ma ahyi pieya nu khi, “Ahyi hawa ha Anyiza na ijjü wi cenkethenjüh ketheü kesawa tsü. Nthu na tsü kejjü kaghapeng wi hi kemeshen zensu ha satenlo.”

26Kepaghenanye Apvüwa npi kegho chu nthu na amesa ha dsa nu ahyi ha kejjü wi ma keshü cüki tsü khiben. 27Anyi thowa na nküla Apvüwa mesa ha dsa nu ma hyi ha jjü khe ma Apvüwa gwo nu ma jjü shunla kesami saben. 28Tsalina anyi tsüdila atuwa sala ma ketanla ma cüki meshen kaketsü ntsa chi nu ciwi ccüna amesa ha dsa nu ahyi ha jjülo. 29Kepaghenanye anyi thowa na ma jjügi nchüla Apvüwa gwo amesa tsü dsa nu ahyi tsü jjü khe ma tsü dsa nu jjü keben wi ma ketanla ajühkekaghakhiwa tsü sen nu ma miwi ghoben. 30Tsalina nthu kejon na naa nu nzüla ben, nu pahan na shüdha. 31Keujüla ithu na atuwa sa ithu ghan-nan lethu, ithu na Anyiza jühkekaghakhi wi tsü gho nkesa. 32Isala ithu yala ayyi nyithu gweghe nmeshensa thsüle kesalina Apvüwa na ithu jühkekaghakhi nu ithu metenben.

33Tsalina icünyuthu, nthu na Apvüwa kemeshentsse dsale saghu keya wi khokho kehieli nu dsalo. 34Nthu na Anyiza jühkekaghakhi wi tsü nghole kesalina nthu saghu keya wi keujüla anyi kesü na ghama ben lethu, ma yala ajjen wi dsaya thsülo. Ajjügi kepathu ghena hi gho ccüla khi pi kiza ben.

Currently Selected:

1 KORINTHNYI 11: RENGNBSI

Highlight

Copy