ROMNYU 9
9
Sunggigü Lo A-le Kejülo Kela Temi dan
1Ale Khrista nyu joketsin zo hünyo, ale nku bin mvu, tsekethyü anyun gü le Kenshün Kapu gü nyu ajün zo bin nyo. 2Ale anyun gwamvu sa, lo anyun kenjün thyü zin bin hünyo. 3Kechamvule thyülo gwa yatse kethyü we thyümin kipon a tsasikezen nyu lo a tsipwen dan kenilo nrün genyu Khrista no a swe tsülao a khela lotse lati atale tson keloi kemvu. 4Anyugun le Israel nyu, tsüdan le a-nyenyu dan, a-zankechwi kethyü, kejozenkelo dan, tejvü gü khikeshü, Sunggigü kerüshvu, lo Sunggigü le zope bin kenjü dan-e, tsüdan hon. 5Lo bon nyu dan ai anyugun bon nyu, lo thyümin kipon rüchün gunlo anyugun ge Khrista le yhun ryü le. A-le aphu so Npugü, lo kethonthen kengvü ketsin Sunggigü le! Amen
6Ai Sunggigü jo gü le a-kenrun thyüla titse kethyü kon mvu. kechamvule Israel ge yhun chwikeryü dan aphu Israel nyu kü kemvu genyu. 7Lo Abraham tsipwen aphu Abraham nyenyu kemvu, “Ai Isak ge n tsipwen letse koti,” tsekethyü genyu. 8Tsügü tsüle a-kon le thyümin nyenyu dan le Sunggigü nyenyu dan mvu; ai zope bin kenjü gü nyenyu dan we a-tsipwen letse la. 9Kechamvule zope bin kenjü güle: “Higwünkho ka ale ryü ti, lo Sara le tsükatsü pechenyu nme nnyu zen bin ti,” tson kethyü thu pe bin njü.
10Lo tsüntimvule Rebeka ko temi nme tsügü tsüle nbon Isak nyuphou pvülo. 11Tsükatsü Sunggigü le nchwenyu me kejükelo a-kendo le thatho dan genyu mvule, nkokelo gü kendo titse kethyü genyu, a-nyu hvu nnyu kelo mhundyü kegwa keshvu thyüla kemvu kanyu; 12tenu tsügi ka peshügü no nchegü lothyüti tse kethyü zo njü. 13Lo a-le, “Jakob we so, ai Esau we nrhi,” tse kethyü thu njü.
14Tsonlo nle nyu zo mon? Sunggigü kipon njü kemvu le bin le? tsonmvu shü. 15Kechamvule a-le Mosa ka, “Ale shwi njün kehünyu shwinjün ti, lo ale so kehünyu soti,” tse zo njün nyo. 16Tsügenyu temi kendo nyue mvu, nmvu ai nyhen kethyü genyue mvu, ai Sunggigü nshwikenjün genyu. 17Tsühontse ketsinlesü le Faro ka, “Ale nge a kekvu khipe me tesha shü nrün lo a zan pe kazü aphu nyu sha gunlo nrün genyu a kendo tsügü tsü thyülo titseo ale n penso keshü le,” tson njü. 18Tsühontse Sunggigü le shwi njün kenyünyu shwi njün shü hünyo, lo senyu nyun thyü pe rü nyü yo tsünyu nyun thyü rüla hünyo.
Sunggigü Nyun Kekhü Lo Shwikenjün
19Ai nle aka hon zo so ti ado, “Tsonlo Sunggigü le nyu thyüo me nmu hü nla? Kechamvule temi segü le a-kendo nkenlo tila?” 20Ai nle temi, Sunggigü zen kenyon kehü hile nle segü la? Kanyü thyü kelo dan le a-thyü keshü gü ka, “Nle nyuthyüo a thyü pe hihontse lala, tson ti ole?” 21La kethyü gü le gin thün nme ge peha lope a-min ketsen kanyü thyü, lo peha lope a-min kenne kanyü thyülo kegwa gin ge kekvu ndi ole?
22Lo Sunggigü le nyunkekhü lo akekvu pe me hishü nyü bin yatse ai nkela kekü a-nyun kekhü hyula lokekü dan ge-e a-nyun thonsao nyhenhi bin mvu ole? 23Tsüle kechamvule nchweki nyu nno zankechwi thyü nrün kejü sen kehü shwikenjün fü kehü dan ge a-kegwa kebin pe me teshashü titse kethyü genyu. 24A-le Judanyu dan nyu nti mvule Juda kemvunyu dan nyu ai anyugun kolo laso. 25A-le Hosea lesü nyu zo kenjü le hihontse:
“Nduka a temi kemvu dan
Ale tsüdan lope ‘A temi’ letse koti.
Lo nduka ale so hü kemvugi ka
‘keso gi’ tse ko ti.
26Lo nduka ‘hagun le a temi kemvu le,’ tse so
kehü bin nyu ai
anyugun no rhün bin kehü Sunggigü
nyenyu le tse koti.” 27Lo Isaya le Israel nyu rüla zo-o: “Israel nyu nyenyu le chon pe züda nyu hachon hontse bin yatse ai kenikelo hyulo nrün dan we a-sen keshanyu nti ti. 28Kechamvule Npugü le kazü higü jün pen whütse lao a-jo thyüpenlo nrün genyu.” 29Isaya le nchweki nyu, “Danda dan Npugü le ntsipwen peha nsen pe ntsi thyüshü kemvu we, nle Sodom hontsela tsentsü lo nthyü pe Gomora hontse kelai,” tse zope bin njü.
Israel Lo Jolokegwa gü
30Tsonlo nle nyu zo mon? Juda kemvunyu dan le Sunggigü mhundyü nyu ntsenkelo fü mvutse ntsenkelo hyulo, tsügü tsüle ketenyen genyu hyukelo kentsen. 31Ai Israel nyu dan le tejvü nyu ntsenkelo fü anyugun nyun kenkhi thyü tseo gü tejvü tsü tilo mvu laso. 32Nyu genyu la? Anyugun le ketenyen sen mvuo anyugun tho sen-o fülo nrün hontse kethyü genyu anyugun le, “Me pha kensü tsogü,”ge anyugun pha nsü laso. 33Tsü rüla hihontse thu njü,
“Hire, ale phakensü tso nme khipe Sion
ge shü njü nyo,
anyugun no tso tsügü ge
pe kerheo nto ti.
Ai temi ligühigüe a tenyen kelo gü
we kejopvüla loho.”
Currently Selected:
ROMNYU 9: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
