ROMNYU 8

Kapu Nyu Keyhun

1Tsügenyu ntsoka we Khrista Jisu kipon kehünyu nmu kethyü ndi so. 2Kechamvule Khrista Jisu nyu kehü kerhünronzin Kapu jvü gü le kemu lo kesi jvü gü nyu a hoshü kela genyu. 3Lo tejvü gü le thyümin genyu kvumvuo thyü loho kela gü Sunggigü le thyü laso. Tsügü tsüle a-npvü a-nyugü nipe a-no kemu thyü ngwao kemu rüla denzin a-thyü ge kemu gü nmu laso. 4Kechamvule nle thyü min kipon hü mvule Kapu gü denzin hü kelanyu dan no tejvü nyu thyü mvulo keshvü kenjü dan thyü penlo nrün genyu. 5Kechamvule thyümin kipon yhun kehü nyu le thyümin phin rüchün bin hünyo; ai Kapu kipon yhun kehünyu le Kapu gü phin gü rüchün bin kehü genyu. 6Thyümin phin kendo kerüchün gü tsüle kesi, ai Kapu phin kerüchün gü le kerhün lo nyun kebwen kipon. 7Kechamvule thyümin kenyü yhüdyü le Sunggigü shwinyü kemvu thyüla kehü genyu; lo tsüle Sunggigü jvü hensin bin hü mvu lo bin-e loho. 8Lo thyümin kipon kehünyu le Sunggigü kenyü thyü lo nrün ndi.

9Ai Sunggigü Kapu le hagun nyun nyu bin yatselo, hagun le thyümin kipon mvule Kapu gü kipon bin laso; lo temi ligü higüe Khrista Kapu gü kendi nyu le a-hon mvu. 10Ai Khrista le hagun nyun nyu bin yatselo, kemu genyu hagun min le kesi yatse ai kentsen genyu hagun kapu le kerhün kipon bin laso. 11Keshanyu laka kesinyu dan nyu Jisu thyü nrhün kelo Kapu gü le hagun nyun nyu binlo, kesinyu dan nyu Jisu thyü nrhün kelo gü npvü, hagun nyun nyu kebin a-kapu gü genyu kerhünronzin khipe sila lo kegwa hagun min ge shüti.

12Tsügenyu a pvünyu dan, nle nthyü min kendo thyü yhun tile tseo thyümin pu pvü bin mvu. 13Hagun le thyümin kendo zen-o yhun hü yatselo siti, ai hagun le Kapu gü pe thyümin tho dan boshvula yatselo hagun le rhünlo ti. 14Kechamvule Sunggigü Kapu gü le a-tsontsin zen hü kela dan aphu, tsüdan le Sunggigü nyenyu thyü kelasi genyu. 15Lo hagun le nshvu nrün kipon do kethyü kapu hyulo mvu, ai Sunggigü nyu thyükelo kapu hyulo laso; tsügenyu nle nrao, “Abba! Apvü!” tse ko hünyo. 16Nle Sunggigü nyenyu thyülo laso tsekethyü Kapu gü le a-npvü n kapu gü zen-o jünzo bin hünyo. 17Lo nle a-nyenyu thyülo yatselo, a-kenya gwenlo tiso, lo tsügü tsüle Sunggigü kenya dan Jisu zen kerhün-o tsü gwen ti, nle a-zen kenjünthyülo yatselo a-zen-o zankechwi ai thyü ti.

Hisiki Zankechwi Kethyü

18Lo ale kesha le hizonka kenjün thyü kebin dan rüchün pe siki ntesha shün nrün zankechwi kethyü dan zen-o kendyülo kümvu letse bin nyo. 19Kechamvule nyhun keshü dan aphu Sunggigü nyenyu dan tesha shü nrün gü khwen-o nrin nnyun bin nyo. 20Nyhun keshü dan nmu pe thakon thani kemvu thyüla, anyugun npvü anyugun kendo genyu mvu, ai tsühontse kethyü Sunggigü kendo kela genyu, tson ai anyugun sidyü higü le bin. 21Tsügü tsüle nyhun keshü dan ko shvula lo kegwa dogü nyu anyugun süshwi pe Sunggigü nyenyu dan le a-kendo thyü zankechwi kethyü tsü kenjünlo nrün genyu. 22Lo ntsoka-e nyhun keshü dan aphu a-kethyü pvüo kengüo ayaya tse bin kehü nne shabin nyo. 23Lo tsühontse kethyü ntimvule Kapu sha keri n gun hi ai nleyi pe a-nyenyu thyülo nrün gü khwen-o nnyun nyu ayaya tse bin hünyo. 24Kechamvule sidyü le bin tse kethyü ketenyen genyu kenikelo gwünzin; tson ai hyulo kelagü tsü lope sidyü letse hü mvu. Lo segü le hyulo kelagü hyulo titse nrin bin hü nla? 25Ai nle hyulo mvu zun kethyü gü hyulo nrün tenyen bin yatselo, nle nyhenhio tsügü khwen binlo hünyo.

26Tsühontse Kapu gü ai nle kvu kemvu ka n kecheshü hünyo; kechamvule nle hilo mvulo keshvu ka ai hilo sha hü kemvu genyu; ai Kapu gü le a-npvü nsun thyüo ayaya tse bin hünyo; tsüle temi khwen jo nyu zoshwilo nrün ndi. 27Tsüntimvule nnyun kese kehü gü Sunggigü le kapu gü kerüchün sha hünyo, a-le Sunggigü kendo hontse kenshün nyu genyu hibin kehü genyu.

28Lo Sunggigü so lo rühvu kehü , a-le ndukanyu rhinhi pe bin kela gü genyu ko kelo dan genyu we tha lihi thyü yatse ai anyugun genyu kegwa tsekethyü nle shabin nyo. 29Kechamvule a-le ndukanyu tsüdan shao tsüdan no a-nyugü hontselo nrün genyu a-le nchwenyu tsüdan ndo sen bin laso; tson-o a-nyugü no a-pvü nyu kechon dan nyu nyuri gü thyülo nrün genyu. 30A-le nchwenyu rhinhi sen bin kela dan, tsüdan kolo, lo a-le kolo kela dan; tsüdan thyü pe ntsen-e lola, lo a-le thyü ntsenlo kela dan, tsüdan no zankechwi-e thyülo laso.

Khrista Nyu Sunggigü Keso

31Tsonlo nle tha higü rüla nyu zo mon? Sunggigü le nkipon yatselo, segü le n ntsunlo gwa tila? 32A-npvü a-nyugü ai khishü tepen mvutse n gun aphu genyu khishü kelagü, a-le tha aphu pe a-nyugü sin-o kenrun nyu pe ntsüshü mvu ti ole? 33Segü le Sunggigü le kejülo kelanyu dan nmu logwa ti la? Anyugun le njü letse kezo gü tsüle Sunggigü. 34Segü le n nmulo gwa tila? Tsügü tsüle silao kesinyu dan nyu rhünnilo, tson-o gungü Sunggigü ben njüzin bin-o ngenyu hizin bin kehü gü Khrista Jisu. 35Lo segü le Khrista le nkeso nyu nsükho sen tinlo gwa tila? Kenjün kethyü, nmvue shekese, nmvue n nshwen kethyü, nmvue chenda, mvue rhokedyü, nmvue kenshvu, nmvue zhethon le thyülo gwa ti ole? 36Ketsinlesü nyu thu kenjü le hihontse:

“Ngenyu meno jongwün agun

dushvu;

mele agun khipe tanyü dushvu

gü kezhü hontse thyü.” 37Nmvu, tha hidan hi aphu nyu ai nso kehü gü genyu nle kvukelo soki ai kvulo hünyo. 38Tson-o kesie kerhün-e, tsangge jolonyu-e, Npu kethyü dan-e, hizonka kebin dan-e, hisiki ryü nrün dan-e, kekvu dan-e, 39ketetso-e, kentsun-e, nmvu ai nyhun keshü kecha lihi-e n Npugü Khrista Jisu nyu ntesha keshü Sunggigü keso nyu tsü nsükholo nrün ndi tsekethyü ale sha tsentsü laso.

Currently Selected:

ROMNYU 8: REGSBSI

Highlight

Copy