ROMNYU 10

1Apvünyu dan, Israel nyu dan genyu anyun leho lo Sunggigü ka hikehügü tsüle, anyugun no kenilo nda tsekethyü genyu le! 2Kechamvule anyugun le Sunggigü kipon anyugun nyun rhünsa kehü ale anyugun sha bin nyo, ai anyugun le ketsin gü tsü sha tolo mvu laso. 3Kechamvule anyugun le Sunggigü kipon keryü kentsen gü tsü shamvu lo anyugun npvü anyugun hon gü thyü pe nko binlo titseo anyugun le Sunggigü kentsen gü hensin bin mvukela genyu. 4Kechamvule temi ligühigüe tenyen kelogü no ntsenlo nrün genyu Khrista le tejvü gü thyüpen keshü gü so.

Kenikelo Le Temi Aphu Genyu

5Tsühontse Mosa ai thu pe bin njü, “Temi ligühigüe tejvü nyu thu pe bin kenjü kentsen keseri jo dan thyülo zen kehünyu le tsügü genyu rhünlo ti.” 6Ai ketenyen genyu chwikeryü kentsen gü le hihontse zo hünyo: “Nle n npvü nnyun ki, segü le tsangge külo gwa tila?” (a-kon le segü le Khrista zen tsenryü mon). 7Nmvu ai, “Segü le tekhwün kentsun gü nyu yü mon?” (a-kon le segü le kesinyu dan nyu Khrista zen soryü mon), tsonkethyü zo nyalo. 8Ai kentsen tsügü le nyu zoni hü nla? Jo tsügü le nkhoka bin, nmün nyu bin, lo nnyun ki bin nyo, tsüle ale sen-o me senthyü kehü ketenyen jo gü le. 9Tsüle, “Jisu lope Npugü,” letse kethyü nmün nyu zoshwilo, lo Sunggigü le kesinyu dan nyu a-thyü nrhünnilo la tsekethyü nnyun nyu tenyenlo yatselo nle kenikelo hyu loti. 10Kechamvule ntsenlo nrün genyu temi le anyun pe tenyenlo hü, lo kenikelo hyulo nrün genyu a-mün pe zoshwilo kehü genyu. 11Ketsinlesü le hihontse zo hünyo: “Temi ligühigüe a-tenyen kelogü le kejopvüla loho.” 12Judanyue lo Juda kemvunyue kecha thyülo ho, kechamvule Sunggigü le temi aphu so Npugü lo a-le kenya khipe a-ka hi kehü dan aphu tsü kehü genyu. 13Ketsinlesü le hihontse zo hünyo, “Temi ligühigüe Npugü zen sen-o hi kehü gü le kenilo ti.”

14Ai anyugun le dihontse tenyen kemvu gü ka hilo mon? Lo anyugun le dihontse a-khwen nyülo kemvugü tenyenlo mon? Lo mele zope nsenthyü shü mvu yatselo dihontse a-khwen nyülo mon? 15Lo lilonyu nishü mvu yatselo dihontse jolo gü pe senthyü shü lo mon? Tsüdan rüla thu pe bin kenjü le hihontse, “Jolokegwa sen keryü nyu pha le ditsüki thyü zegwa la?” 16Ai temi aphu Jolokegwa tsügü tsü senlo mvu laso. Kechamvule Isaya ko zo, “Npugü segü le agun jo tenyenlo la?” 17Tsühontse senkethyü jo kenyü nyu ketenyen le chwiryü hü lo senkethyü jo kenyü tsüle Khrista rüla jün kezo.

18Ai ale shünshü kebin le, anyugun le nyülo mvu le? Anyugun le nyülo laso- kechamvule ketsinlesü le hihontse zo:

“Anyugun khwen le kazü aphu

sha gun laso;

lo anyugun jo le kazü keni keti nyu

sha gun laso.”

19Lo ale shüni ti, Israel nyu le tsü shamvule? Mosa le zoni shü:

“Ale hagun no a-keda kendi temi dan me

shwipe hagun yhüthyü ti;

lo temi thasha kemvu dan me genyu hagun

no hagun nyun kenta thyüti.” 20Lo Isaya ai peche sao hihontse zo,

“Nduka a fü hü kemvunyu le

a hyulo laso;

nduka a rüla ketsonyü hü kemvu

dan ale akhi pe hishü laso.”

21Ai Israel nyu dan genyu we a-le hihontse zo njü, “Me jo zen hü kemvu, lo me nyhen zin kehü temi dan ka we jon gwün tse aben shwen pen-o anyugun khwe zin bin nyo.”

Currently Selected:

ROMNYU 10: REGSBSI

Highlight

Copy