ROMNYU 16

Kelu Keshü

1Ale Kenchrea nyu kehun lotho thyü kehü ngun lügi Foibe rüla pe hagun ka zoshü bin nyo. 2Npugü zan nyu a-zenlo, Sunggigü temi letse yatselo tsonlo mvulo shvu, lo a-le tha lihi-e sen mvuloshvu bin yatselo khipe a-tsüshü; kechamvule a-le temi kechon keche ryü, lo ako a cheshü le.

3Khrista Jisu lotho nyu azen kengüo lotho thyü kehü Priskila lo Aguila au kelushü lenye. 4Au le a genyu au phoue tepen mvu tseo, a nti mvu ai Judakemvunyu kehun aphu au chenno sa bin nyo. 5Lo au kanyu kehun kehü dan ko kelushü le nye.

A keso a pvü gü Epaineta, Asia nyu Khrista tenyenlo keritsin gü kelushü le nye. 6Maria kelushü le, a-le hagun genyu a-yhenthyü sa le. 7A kaminyu lo azen kengüo dothyü kethyü Andronika lo Junia au kelushü le, apostel nyu dan nyue mele au shasa, lo au le a mhundyü khristian thyülo laso.

8Khrista nyu kengü kehü a keso a pvügü Ampliata ko kelushü le. 9Khrista lotho nyu ngun kengüo lothyü kehü gü Urbano lo a keso a pvügü Staki ko kelushü le. 10Khrista sohü ketsin tse sha kela gü Apele kelushü le, Aristabulo nyu kaminyu dan ko kelushü le. 11Ngun temi Herodion lo Narcisus nyu kanyu khristian nyu dan kelushü le.

12Npugü lothyükehü Triphaena lo Trifosa hvu kelushü le, lo Npugü genyu thathyü sa keshü gü Persi kelushü le. 13Npugü lotho thyü sa kehü Rufu lo a-jvü au kelushü le; tsügi le a lope a-nyu hontse thyü hü le. 14Asikritos, Flegon, Hermis, Patrobas, Hermas lo anyugun zen kehü khristian nyu dan aphu kelushü le. 15Filologos lo Julia Nerius lo a-lügi, lo Olimpas lo tsüdan zen kehü Sunggigü temi dan aphu kelushü le.

16Tsasikezen nyu kekenbo jvü sen-o khinyunyu kelushülo. Khrista kehun aphu hagun kelushü bin nle nye.

Senthyü Keshü Jo Kekhin

17Apvünyu ju, senyu le hagun le himhundyü ki shalo kela ketenyen gü zen kentsun lo me pvükho-o me tson kekhin thyü hü yo le tsünyu tsü shabin lo, lo tsünyu nrhilo. 18Kechamvule tsühontse thyü kehünyu le Npugü Khrista lothyü bin mvu, ai a-npvü a-gin fü kehü gwünzin. Anyugun jo gwasa tse, lo jozo shünshvu shülao a-nyun kenjü nyu ju sala hünyo. 19Hagun le jolokegwa jo gü zen kehü temi ligühigüe nyülo laso, tsügenyu ale hagun rüla rüchün a sherhün le. Ale hagun no nyu le gwa yo tsükipon we thasha lo, ai gwakemvu kipon we rhumvu bin nyü. 20Lo nyu kebwen khishü kehü Sunggigü le thonsa mvutse satan boren pe hagun phasin shüla ti.

N gun Npugü Jisu Khrista shwikenjün gü no hagun zen bin kelo gü thyülo.

21Azen kengüo lotho thyü kehü gü Timothi le hagun kelushü le, lo Sosipater nyugun ai le nye.

22Lesü higü kethu gü, ale Tertios, ako Npugü zan nyu hagun kelushü le.

23Asin gü, Gayas, a-ka nyu kehun kehü ju le hagun kelushü le lo rünyi hinyu kenya kesen gü Erasta lo ngun sikezen gü Quartos ko hagun kelushü le. 24Ngun Npugü Jisu Khrista shwikenjün gü no hagun aphu zen bin kelo gü thyülo. Amen

Npugü Keshwen Kehikethyü

25Ngun Sunggigü zan shwenlo nu! Ale Jisu Khrista rüla jolokegwa jünzo kehü hontse lo ketsin gü ndukanyu kebu kenjü gü henshwi keshü hontse a-le ketenyen nyu hagun ntsen pe hagun no nnun mvu binlo gwa. 26Ai ntsoka we kethonthen Sunggigü jo gü genyu sidyükeshanyu ju lesü nyu ketsin gü tsü khinshye pe tsipwen aphu hishü laso, tson-o temi aphu no tenyenlo njüo zenlo nrün genyu. 27A-npvü tha aphu keshagü, Sunggigü no Jisu Khrista genyu kethonthen zankechwi gü thyülo! Amen.

Currently Selected:

ROMNYU 16: REGSBSI

Highlight

Copy