1 KORINTHIANYU 1
1
Kelu Keshü
1Sunggigü kendo ka Jisu Khrista kipon apostel tha thyülo tseo kolo kela gü Paul, lo ngun sikezen gü Sosthini-
2Au le khipe Korinth nyu kebin Sunggigü kehun gü, kenshün nyu thyü titseo kolo kela Khrista Jisu nyu keni kecha thyülo kela ju, lo tsüntimvule lika hika ai Jisu Khrista le anyugun Npugü lo n gun Npugü letseo a-ka hibin kehü dan ka shü shü le:
3Npvü Sunggigü lo Npugü Jisu Khrista ka nyu chwikeryü shwikenjün lo nyun kebwen gü no hagun ge ryü kelo gü thyülo.
Khrista Nyu Jochü dan
4Sunggigü le Jisu Khrista nyu shwikenjün gü khipe hagun tsükela genyu, ale hagun genyu Sunggigü shwen zin bin hünyo. 5Kechamvule hagun le jokezo aphu ka lo thakesha aphu ka ai a-genyu tha aphu ka nnya bin kelasi genyu. 6Tsühontse Khrista rüla kezo gü le hagun nyunka bin kegwa thyülo laso. 7Tsügenyu hagun le Npugü Jisu Khrista le me yhühyu thyü keryü khwen kebin hontse hagun le jochü nme ai hyulo mvu tse gwünzü kela nme thyü mvu. 8A-le hagun no Npugü Jisu Khrista jon nyü nmulo keho thyülo nrün genyu hagun ntsen pe nnu mvu bin-o kekhin gü tilo ti. 9Sunggigü le me no a-tenyenlo kekü gü a-le hagun kope hagun no Npugü Jisu Khrista zen-o kepvüshen loso.
Kehun dan Nyu Kechacha Kethyü
10Apvünyu ju, ale n gun Npugü Jisu Khrista zan nyu hagun ka zoshü bin nyo, hagun dan nyu kepvükho mvulo nrün genyu hagun aphu jo nme zolo, lo hagun kendo kerüchün no nme thyülo. 11Kechamvule a sikezen nyu dan, Kloenyu kaminyu peha le aka kezo le hagun dan nyu kega bin hü nle tse kebin tsüle. 12Lo a-le zo kebin gü le nme me tse a-jo kechacha thyüo nme le, “Ale Paul kipon,” tse; kechagü le, “Ale Apola kipon,” lo peha le, “Ale Kefa kipon,” lo peha we, “Ale Khrista kipon,” tse bin n yale. 13Khrista kenjünlo la sele? Paul le hagun genyu krus ge hü le? Nmvu ai Paul zan nyu hagun le baptaiz thyü ole?
14Ale Krispa lo Gaya hvu nyeki hagun temi nme ai baptaiz thyü kemvu genyu ale Sunggigü cheno. 15Kechamvule hagun le azan nyu baptaiz thyülo letse zo solo kenshvu genyu. 16E, ale Stefanas nyu kaminyu ko baptaiz thyü; tsünyeki ale kechanyu nme ai baptaiz kethyü shamvu. 17Kechamvule Khrista le ano me baptaiz thyülo tseo a nishü mvu, ai jolokegwa gü zope me hi lotseo a nishü kethyü genyu. Ai Khrista krus gü no lihi kemvu thyüla lo kenshvu genyu thakesha jo sen-o zomvu.
Khrista Le Sunggigü Kekvugü Lo Thakeshagü
18Kechamvule krus jo gü le nmhen kelanyu dan mhunndyü nyu we kemonkennu jo ai kenilo kela n gun mhundyü nyu we jo tsügü tsüle Sunggigü kekvu gü genyu. 19Tsügü rüla thu kenjü le hihontse,
“Ale thakeshanyu dan thakesha nkela ti
lo tedo keshanyu dan do thyü pe a-kenrun
thyü lati.” 20Thakeshanyu le dikipon bin nla? Lesü keshatsin nyu le dikipon bin nla? Sunggigü le kazü hi nyu thakesha thyü pe kemonkennu thyüla mvu ole!
21Kechamvule Sunggigü le a-thakesha khipe me hi keshü ka kazü nyu temi le anyugun thakesha sen-o Sunggigü shalo mvu kela genyu tha shakemvu jo hontse kethyü nme pe me senthyüo tenyen kelonyu dan kenilo titse kethyü le Sunggigü kendo kela genyu. 22Judanyu dan le ndun kethyü tho hyunyü lo Griknyu dan le thakesha fü tse hünyo. 23Ai awe Khrista pe krus ge hü kela rüla pe me ka zo hünyo; lo tsügü tsüle Judanyu dan genyu pha kensü nme lo Griknyu mhundyü nyu kemonkennu jo. 24Ai Sunggigü le kolo kelanyu we Judanyu metse lo Griknyu metse Khrista rüla hile Sunggigü kekvu gü lo Sunggigü thakesha gü le. 25Kechamvule Sunggigü ka nyu thashakemvu jo hontse kethyü gü ai temi thakesha nyeki thashakvu, lo Sunggigü kanyu kvukemvu hontse kethyü gü ai temi kekvu gü nyeki kvu kethyü genyu.
26Lo apvünyu ju, hagun ko hagun dan nyu kolo kelanyu dan rüla rüchün shülo; thyümin kipon we thakeshanyue chon mvu, kekvunyue chonmvu, lo kegwanyu kechon-e kolo mvu. 27Sunggigü le thakeshanyu dan no kejopvülo nrün genyu kazü hinyu thasha kemvunyu kejülo laso, lo kekvunyu dan no kejopvülo nrün genyu kvu kemvugü kejülo laso. 28Tsüntimvule Sunggigü le mele rüchün nshen kehünyu lo mele sa kehünyu dan kejülo laso, lo kebin nyu no thakon kemvu thyüla nrün genyu kendinyu hontse kethyü nyu kejülo laso. 29Kechamvule temi nme-e no Sunggigü mhundyü ka ketekho mvulo nrün genyu. 30Ai a genyu hagun le Jisu Khrista kipon bin loso; lo Sunggigü le Khrista no n gun thakesha, lo n gun kentsen, lo n gun thyü n shün kelo, lo n gun rhinhi kelo thyülo laso. 31Tsügenyu hihontse thu njü, “Temi ligühigüe ketekho nyülo Npugü rüla zo ketekho lo.”
Currently Selected:
1 KORINTHIANYU 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
