ROMNYU 15

Khinyunyu Phin Kerüchün

1Ngun nko kebin nyu le n npvü nkenyü yhüdyü thyü tinla nyao kvu kemvunyu khvü nolo zü. 2Ngun ligühigüe n kazonkazin thyü ngwa kelo rüchün-o tsünyu kenyü thyülo nu. 3Tsühontse Khrista-e a-npvü a-kenyü yhüdyü thyü mvu; ai tsü rüla hihontse thu nnjü, “Mele nrho kethyü dan tsüle age chetsüryü la sele.” 4Kechamvule nduka thu pe bin kenjü ge nsenthyülo nrün genyu, tson-o ketsin lesü then-o kelukenyonla mvu, lo nnyun njüo n sidyü no binlo nrün genyu. 5Kelukenyon hükemvu lo nnyun thyü njüshü kehü Sunggigü no hagun khinyunyu nyun thyü kerhün pe Khrista Jisu nyun hontse shü kelo gü thyülo. 6Tson-o hagun no kenyunrhün lo kejorhün-o n gun Npugü Jisu Khrista a-pvü Sunggigü zankechwi thyülo nrün genyu.

Judakemvunyu Genyu Jolokegwa

7Sunggigü no zankechwi thyülo nrün genyu Khrista le hagun zenkelo hontse hagun ko khinyunyu zenlo. 8Lo Khrista le nduka nbon nyu juka tha zope bin kenjü dan tsüle a-ketsin tsekethyü nno sha, lo gikerü tho gü tsü thyüo Sunggigü joketsin gü pe me hishü. 9Tson-o Judakemvunyue no Sunggigü shwikenjü nyu a-shwenlo nrün genyu. Tsü rüla hihontse thu njü,

“Tsügenyu Judakemvunyu dan nyu

ale nshwe ti;

lo nzan nyu lüthyü ti.” 10Lo a-le zoni kethyü le;

“O hagun Judakemvunyu ju a temi dan

zen-o hagun sherhünlo!” 11Lo tsüsika ko,

“Hagun Judakemvunyu ju aphu, Npugü shwenlo;

lo temi aphu a-shwenlo!” 12Lo tsünyeki-e Isaya le zo-o,

“Judakemvunyu so keda thyü nrün güle;

Jesse jwi ge soryü ti,

lo Judakemvunyu ju le a-genyu sidyü le binlo ti.”

13Kenshün Kapu kekvu nyu hagun sidyü no chonsalo nrün genyu nsidyü füshü kehü Sunggigü no ketenyen genyu shekerhün lo nyun kebwen pe hagun kesü thyüshü kelo gü thyülo.

Paul Jo dan

14Lo a pvünyu ju, hagun jvü kegwa pe hagun süpvü kehü, lo thakesha aphu pe hagun süpvü kehü, lo khinyunyu senzhülo kegwa ale hagun rüla sha pe anyun bwen laso. 15Ai Sunggigü le shwikenjün khipe a ketsü honntse hagun no rüchün nilo nrün genyu thakon peha ka ale peche sa tse lesü higü thu pe hagun tsüshü bin nle. 16Kechamvule ale Judakemvunyu dan nyu Khrista Jisu lotho thyülo Sunggigü peshükeda thyüo Judakemvunyu khipe Sunggigü tsüo Kenshün Kapu no thyü nshün pe lolo kekü thyülo nrün genyu. 17Lo Khrista Jisu genyu ale Sunggigü lotho kethyü genyu ketekholo kegwa kon le bin nyo. 18Lo Judakemvunyu dan no ajo zenlo nrün genyu Khrista le age bin-o thyükeshü dan nyeki ale thakecha nme-e zoshü nshvu laso. 19Lo tsüle jokezo nyu lo thatho nyu, tha zansü nyu lo ndunkethyü tho kekvu nyu, lo Kenshün Kapu kekvu nyu thyü kelo le; tson-o Jerusalem lo tsü temhun gü Illirikum keti Khrista jolokegwa gü pe jünzo keshü. 20Lo ale me kechanyu le khwen kenjü bin ge ka thyü mvu nrün genyu himhundyü Khrista zan shamvu hü kethyü bin ki jolokegwa gü pe jünzo shü nyü bin nyo. 21Tsü rüla hihontse thu njü,

“A-rüla pe anyugun ka zoshü mvu shü

kethyü ju no a-hyuti,

lo anyugun le a-rüla nyülo hümvu shü

kethyü gü tsü shalo ti.”

Paul Le Rom nyu Gun Nyü Kethyü

22Higenyu ale hagun ki keryü tson khinla la tse zin hünyo. 23Ai ntsoka we ale hiden zin tha kethyüi bin kendi si genyu lo chen kethon ki hagun ki ryü nyü bin kehü genyu. 24Ale Spain ki gunkejü ka hagun ka nsen-o hagun hyushü nyü bin nyo, tson-o jon keshanyu hagun zen kengüo asherhünlo nyü bin nyo. 25Ai nthu gwün we ale kenshün nyu ju keche shü nrün tho gü tsü sen-o Jerusalem ki nsin jü laso. 26Kechamvule Makedonia lo Akaya nyu kebin nyu dan le tha khipe Jerusalem nyu kebin kenshün nyu dan rhokedyü ju tsüshü nyü kela genyu. 27Anyugun le tsühontse kethyü tsüle anyugun kenyüla ketsin le, anyugun le tsüdan pupvü bin nyo, kechamvule Judakemvunyu jule anyugun zen-o Kapu jochü kenjünlo yatselo anyugun ko kazü kanyü kenya dan kecheshü mvulo shvu kethyü genyu. 28Tsügenyu anyugun le kequen penlo yatselo ale khipe tsüshüla njüo ale hagun ka ryüo Spain ki gunti. 29Lo ale hagun ki ryülo Khrista jochü kesükela kethyü nyu ryü titse kethyü ale shabin nyo.

30Apvünyu ju, ngun Npugü Jisu Khrista lo Kapu gü le khikeshü keso gü nyu hagun no azen kengüo agenyu Sunggigü ka kehithyü tenge binlo tse ale hagun ka hishü bin nyo. 31Lo Judia nyu kebin tenyen kemvu ju ben nyu a kenishülo tsekethyü lo Jerusalem nyu Sunggigü temi dan no atho genyu anyugun sherhünlo nrün genyu hagun kehithyü binlo. 32Tson-o Sunggigü kendo yatselo ale a sherhün sa tse hagun ki ryü ti lo hagun zen-o anyun bwenye lo nrün genyu. 33Nyun kebwe khishü kehü Sunggigü no hagun aphu zen bin kelo gü thyülo. Amen.

Currently Selected:

ROMNYU 15: REGSBSI

Highlight

Copy