ROMNYU 14

N sikezen gü Nmu Nya

1Ketenyen nyu kvu kemvunyu nkhin nyao a-zenlo. 2Temi nme le a-le tha aphu tyülo gwa tse tenyen bin ai ketenyen nyu kvu kemvu gü we hen nti tyü hü ti. 3Tsügenyu thyü, lo tha lihi-e tyü kehügü no tyü hü kemvugü sala nya, lo tyü hü kemvu güe tyü kehügü nkhin nya, kechamvule Sunggigü le a-zenlo kela genyu. 4Nle segü letseo me gonyu nmu hü nla? A-le solo metse chela metse Npugü le ti. Ele, a-le solo ti; kechamvule Npugü le a-senthyülo kegwa kekvu le kebin genyu.

5Temi nme le tsangkeben jon nme nyeki tsangkeben jon kecha nme rühvu kvu hü nyo; lo kechanyu nme le tsangkeben jon aphu rühvu ketunkü hü. Temi ligühigüe no a-nyu ki a-kezü gü thyü binlo. 6Temi ligühigüe a-le tsangkeben jon rühvu kehü tsüle Npugü genyu rühvu kehü gwünzin; lo ligühigüe thyü tyü kehünyu le Npugü genyu tyü kehü gwünzin, kechamvule a-le Npugü shwe kehü genyu. Lo ligühigü ai a-le tsü tyü hü kemvu gü le Npugü genyu tyü hü mvu; lo a-ko Npugü shwen hünyo. 7Lo ngun aphu ngun le ngun npvü n genyu rhün bin hü mvu, lo ngun npvü sila hü mvu. 8Tsühontse nle rhün bin ai Npugü genyu rhün bin hünyo; lo nle sila ai Npugü genyu sila hünyo. Tsügenyu nle rhün-e sie Npugü hon le. 9Kechamvule Khrista no kerhün nyu lo kesinyu metse Npugü thyü titseo a-no sila ai rhünnilo laso. 10Ai nwe nyuthyüo n sikezen gü nmu hü nla? Lo nko nyuthyüo n sikezen gü sa hü nla? Ngun aphu Sunggigü le ketso kethyü bin mhundyü nyu so küti. 11Tsü rüla hihontse thu njü nyo,

“Ale rhün kehü hontse temi ligühigüe

a mhundyü nyu khosen küti,

lo temi aphu a-mün pe Sunggigü

shwen küti.” 12Tson-o ngun nme me tsekethyü Sunggigü mhundyü nyu nnpvü nrüla henshwi küti.

N sikezen gü Tsonkekhin Thyü Nya

13Ngun khinyunyu nmu nya, tsonkethyü gü mvule n sikezengü phakensü nmvue tsonkekhin thyüla mvu titse kethyü rüchün tonlo tinu. 14Tha nme-e a-npvü nshünmvu kethyü ndi, ai temi ligühigüe tsüle nshün mvu tse rüchün kehü gü genyu nshü mvu laso tsekethyü ale Npugü nyu tsü sha laso. 15Keshanyulaka n ketyüketsü genyu n sikezen gü no a-nyun gwamvula yatselo nle keso jvü gü nyu bin mvu laso. N ketyüketsü genyu Khrista le a-genyu si kenjü gü bonshvu laso. 16Tsügenyu ngenyu kegwa gü tsü zo nshvula nya. 17Sunggigü keda le ketyüketsü gü mvule Kenshün Kapu nyu kentsen keseri lo nyun kebwen lo nkenyü kethyü gü genyu. 18Tsühontseo Khrista lothyü kehünyu le Sunggigü mhundyü nyu a-zü lo temi-e tsünyu tenyen ngwa hünyo.

19Tsügenyu ngun dihontselo kengü gwalo tiyo lo khinyunyu thyü ngwalo tiyo tsü fü tenge lo tinu. 20N ketyüketsü genyu Sunggigü tho bonshvula nya. Ketsin, tha aphu nshün le, ai ketyüketsü genyu me tsonkekhin thyü kela tsüle a-zümvu. 21Thyü tyü kemvu nmvue zu tsü kemvu nmvue tha lihi thyüe n sikezen nyu no a-pha nsü kemvu tsüle njü le. 22N ketenyen gü tsüpe Sunggigü hai jaka shü sen binlo; ligühigüe a-le njü letse kebin gü tsü rüchün pe a-npvü a-nmu kemvu nyu le jochü kepvü ketsin le. 23Ai temi ligühigüe kenyun hvuo tyülo tsüle mula hünyo. Kechamvule a-le ketenyen nyu tyü kemvu genyu, lo tha lihi-e ketenyen nyu kemvu tsüle kemu.

Currently Selected:

ROMNYU 14: REGSBSI

Highlight

Copy