ROMNYU 13

Nso ge Kekvu kesen Nyu Jo Zenmvulo Keshvu

1Temi ligühigüe a-so ge kekvu kesenyu jo zenlo mvulo shvu, kechamvule Sunggigü ka nyu kemvu we temi nme-e me nye gon loho; lo me so ge gon kebin nyu le Sunggigü kendo genyu. 2Temi ligühigüe keda thyü kebin nyu shwirüchün yatselo, Sunggigü jo shwirüchün kehü gwünzin, lo tson kehünyu le a-npvü a-gwakemvu chün hyulo ti. 3Kechamvule tha kegwa thyü kehü nyu mvule gwakemvu thyü kehünyu no anyugun nshvu nrün dan me kethyü genyu. Nle kekvu kesen nyu kenshvu tsügü nrhilo nyülo tha kegwa thyülo; tsonlo yatselo kekvu kesen gü mhundyü nyu nle teshwe pvülo ti. 4Kechamvule nno gwalo titseo a-le Sunggigü lothyü kebin genyu, ai nle tha gwakemvu thyü hü yatselo nshvulo chi, a-le shaja pe me tsüti tsekethyü tsüle ketsin, a-le Sunggigü lo thyüo Sunggigü nyun kekhü pe gwakemvu thyü kehünyu tsüti. 5Lo hagun Sunggigü nyun kekhü genyu ntimvule hagun nyun nyu kegwa keshvu shalo kehü genyu a-jo zenlo mvulo shvu.

6Tsükon ka hagun le khajana-e shü hünyo, lo tson-o kekvu kesen dan le Sunggigü lo thyüo anyugun tho thyü hünyo. 7N khajana-e lo n kanyü kecha-e anyugun ketsü kho pe tsülo, lo nshvu kezü gü nshvulo, lo rühvu kezü gü rühvulo.

Khinyunyu Ge Thyüshü kezü

8Khinyunyu keso kethyü nyeki temi nme-e pu pvünya; a-kazon kazin so kehü nyu le tejvü gü zen penlo hünyo. 9Kechamvule, “Keyüla nya, me dushvu nya, rühu nya, tha tepen nya,” jo hidan hi aphu, lo kecha le kebin dan-e sin tseo jo nme nyu chwiryü kethyü gwünzin; lo tsügü tsüle, “N kazon kazin so pe n npvü nkeso hontselo.” 10Ligühigüe a-kazonkazin so kehünyu le thyüzüla hümvu. Tsügenyu keso le tejvü gü zen pen shü hü nyo.

11Hagun le gwünkho higü hi shabin ti, tsügütsü le hagun le zhü kebin nyu chonkelo gwünkho so. Kechamvule nle ntsoka we tenyenlo kerika nyeki kenikelo kho nni kvu kelasi genyu. 12Kezün jon kechon gü le güla so, lo tsangkeben ti güzhü laso, tsügenyu ngun kezün tho dan khelao keben ronye thyü pvülo nu. 13Ngun nzeü, nmvue kega, nmvue me shwi pe nyhüthyü mvuo keben nyu yhun kehünyu hontse njüo yhunlo nu. 14Ai hagun Npugü Jisu Khrista teri ronye dan khipvülo, lo hagun thyümin kenyü yhüdyü kipon thyü titseo rüchün kehü khela lo.

Currently Selected:

ROMNYU 13: REGSBSI

Highlight

Copy