ROMNYU 12

Sunggigü Lothonyu Keyhun

1Tsügenyu a pvünyu dan, Sunggigü nshwikenjün genyu; ale hagun no hagun min pe kerhün rora, kenshün Sunggigü no lolo kekü thyü pe a-tsülo tse hagun thu keyhun shübin nyo; tsüle Kapu nyu a-rüshvu kethyü gü. 2Lo kazü gü jvü hontse la nyao hagun nyun thyü kenshün pe hagun jvü ai thyü kecha thyülo-o Sunggigü kendo gü, tsügü tsüle kegwa lo a-le lolo kekü lo gwapen kethyü gü rüchün-o tsühontse lonye.

3Lo shwikenjün khipe atsü kelagü genyu ale hagun dan nyu kebin ligühigüe no a-rüchün n gon kenyela nyao Sunggigü le ketenyen ndo pe temi ligü higü tsü kü keshü hontse sen-o tha rüchün petsü hülo tse hagun aphu ka zoshü bin nyo. 4Kechamvule nle min nme ge a-zan ketho kechacha kechon le bin, lo tsüdan le a-tho kechacha kü kethyü hontse. 5Tsühontse n gun ko kechon ai Khrista ge min nme, lo nmeme tse khinyu nyu ge sen bin nyo. 6Lo shwikenjün gü le khipe ntsü keshü hontse ngun ligühigüe sidyükesha jochü kebin gü, a-no a-ketenyen kho sen-o sidyü jo zolo. 7Nmvue lotho nyu yatselo a-no lotho tsügü thyü petsülo, nmvue senkethyünyu yatselo a-no senthyü petsülo. 8Nmvue me thukeyhun kehünyu yatselo a-no me thu keyhun kegwa thyülo, lo tha hoshü kehünyu ko no nhosa tseo hoshülo; lo tha khipe me keche kehünyu ko no ketsin thyüo thyülo; lo shwikenjün tho thyü kehünyu ko no a-mhun ben-o thyülo. 9Kerokon nyao me solo tinu; gwakemvu gü ntsülo, lo kegwa gü sen tsekho tse binlo. 10Tsasikezen nyu khinyunyu keso kehü hontse hagun khinyu nyu solo; hagun khinyu nyu rühvu rüno nyü keri kehi lo. 11Hagun ketseri no tesenla nya, hagun nyun nyenbün bin lo, Npugü lothyü binlo. 12Hagun sidyü rüchün hagun sherhün binlo, kenjün kethyü nyu ai nyhenhi binlo, kehi thyüzin binlo. 13Kenshün nyu dan rhokedyü keche zin binlo; me nsin nyü sa binlo.

14Jochü pe mele hagun nshwen nyhün kehünyu tsülo; me swetsü mvule jochü pe me tsülo. 15A-sherhün kehünyu zen-o hagun sherhünlo; chü kehünyu zen-o chülo. 16Hagun khinyunyu zen-o kenyun rhünlo, keda nyun pvüla nyao mizonyu ai zen-o kengü gwalo, hagun npvü hagun rüchün ngwa la nya.

17Me le hagun ge tha gwakemvu thyüshü ai hagun khün zoni nya, temi aphu mhundyü ka gwa letse kethyü gü hagun yhen thyüo thyülo. 18Hagun denzin thyülo kegwathen temi aphu zen kengü gwao yhunlo. 19Hire, a pvünyu dan, me ge hagun khün zoni nyao pe Sunggigü nyunkekhü nyu shüla chi. Kechamvule ketsinlesü nyu zo kenjü le, “Ale mekhün zoti, ale anyugun gwakemvu chün lope tsüti tse Npugü le zo.” 20Tsonkethyü mvule, “N shwikerüchünyu le nnyon binlo tha pe a-gin thyüshü chi, lo teri binlo a-no tsülo. Nle tsonshü yatselo nle mahgi kenhon khüpe a-pe ge keshü hontse ti.” 21Gwakemvu no nnyeki kvula nya, ai tsonkethyü gü mvule thakegwa sen-o gwakemvu gü nye kvulo.

Currently Selected:

ROMNYU 12: REGSBSI

Highlight

Copy