ROMNYU 11
11
Sunggigü Le Israel nyu Shwikenjün
1Lo ale zoti: Sunggigü le a-npvü a-temi dan khela se ole? Nmvu shü! Kechamvule ako Abraham tsipwen Benjamin kami nyu yhun chwikeryü nme le. 2Sunggigü le a-temi a-le nduka sha kehü dan khela mvu. Nmvu ai ketsinlesü le Elijaj rüla zope bin kenjü hagun le shamvu ole? A-le Sunggigü ka Israel nyu genyu kenyo kethyü le hihontse: 3“Npugü, anyugun le nle nikeshü sidyükeshanyu dushvu bu laso, a npvü a nsen gwünzin laso; lo anyugun le a dushvula titse a fü bin nyo.” 4Ai tsüka Sunggigü le dihontse a-jo kenishü la? “Nkhün tsügü Baal rüshvu kemvu ale temi yie tsenyü ntsen pe bin njü zun, tson amon!” 5Tsühontse hijonka ai shwikenjün genyu kejükelo temi dan me nsen bin zun. 6Lo shwikenjün genyu, tselo thatho genyu mvula so; tson kemvu we shwikenjün lope shwikenjün letse mvu lati.
7Tsonlo nyuthyü mon? Israel nyu le fü kehü gü anyugun le tsügü hyulo mvu laso; ai kejükelonyu dan le tsügü tsü hyulo laso. Lo a-sen dan nyun thyü pe rü laso. 8Tsüdan rüla thu pe bin kenjü le hihontse, “Sunggigü le anyugun nyun thyü npin laso, ryü nthu keti ai anyugun yhütyü no tha hyu nya lotse lo anyugun nyetin no tha khwen nyü nya lotse laso.” 9Lo David ai zo kethyü le hihontse,
“Anyugun keho no anyugun nse kenjü
lo anyugun kebin thyülo;
anyugun no chela, anyugun shaja hyulo!
10Anyugun yhütyü no zünla, tson-o tha
hyu nyalo;
anyugun sen no kethonthen teren
tse tinla lo.”
11Lo ale ketso shü kebin gü le: anyugun le anyugun pha nsü kela hontse che kelai se ole? Nmvu shü! Ai anyugun kemu genyu kenikelo khipe Judakemvunyu tsü kela gwünzin, tson-o Judanyu no anyugun yhüthyü lo nrün genyu. 12Anyugun le mu kela genyu kazü temi aphu thyü pe nnya shü lo anyugun le che kela genyu Juda kemvunyu thyü pe nnya shü, tsonlo Judanyu aphu sinlo yatselo ditsülaki thyü jochü hyu chon kvulo mon!
Judakemvunyu Kenikelo
13Lo ale hagun Judakemvunyu dan ka zo hünyo: Ale Judakemvunyu kipon apostel thyü kebin hontse, ale higü thyü ngonshü hünyo. 14Tsügü tsü le a npvü a temi dan rhikeyhun pe anyugun peha no a-yhüthyü lo njüo kenikelo hyulo nrün genyu. 15Kechamvule anyugun khe kela genyu kazü aphu no Sunggigü zen kengü gwalo yatselo, anyugun zen nikelo we kesinyu thyü nrhünni kethyü gwünzin mvu ti ole?
16Dan me nyu keridan keni kecha thyü pe Sunggigü kipon shülo gwala yatselo tsügü dan aphu tsühontse logwa; lo senbin nme a-me gü keni kecha thyü pe Sunggigü kipon shülo gwala yatselo a-ro dan ai tsühontse logwa. 17Ai a-ro peha boryüla njüo, hagun tehen oliv sen ryüo a-bin nyu queshü, tson-o oliv zü a-me nyu hyukelo gü kenjün kelo gwünzin. 18A-ro boryü kela dan ge ketekho nya; nle ketekho tiya tselo nle n npvü njwi gü le npvü bin mvule, a-jwi gü le npvü kebin rüchünlo nye.
19Lo nle a khisen gü quenlo nrün genyu a-ro peha boryü laso, tson zo soti. 20Tsüle a-ketsin, tsüdan le tenyen kemvu genyu boryü laso, lo nwe ketenyen genyu binlo so, tsügenyu n we ketekho nya, ai nrün ho tselo. 21Kechamvule Sunggigü le a-ge senchwikeryü a-ro dan ai gwenla tepen mvu tse gwenla yatselo, a-le nwe ntepen ti ole? 22Lo Sunggigü le me shwikenjün ai lo a-jo kerü ai shalo nye, chekela dan genyu we a-jo rü; ai nkipon we nle Sunggigü shwikenjün nyu bin yatselo, nwe nshwi njün ti; nmvu yatselo nko ngwenla ti. 23Lo kechanyu ai ketenyen gü nyu binlo yatselo pe queni loti; kechamvule Sunggigü le anyugun pe quenikelo kekvu le kebin genyu. 24Lo nwe oliv bin ge n nti sen gü nle bin kenye hü kemvu oliv bin kegwa ge quenlo la yatselo, kecha dan hi mhundyü a-ro thyü keryü dan we sen gü anyugun bin ketsin gü ge quenlo gwa kvu mvu ti ole.
Sunggigü Le Temi Aphu Shwikenjün
25Apvünyu ju, ale hagun no hagun npvü hagun rüchün ketekho mvulo nrün genyu, ale jo ketsin nme zope hagun hinyü bin nyo; lo tsügü tsüle Judakemvunyu dan aphu no chonsa chwiryülo kemvuthen Israelnyu dan peha nyun thyü pe rü laso. 26Tsühontse Israel nyu aphu kenilo ti. Tsü rüla hihontse thu njü,
“Kenikelogü le Sion ge chwiryü ti
a-le Jakob tsipwen ge serikemvu tho dan
tsü khi lati.
27Lo a-le anyugun kemu dan khi kela siki
a-le anyugun zen-o kejozen kelo le higü hile.” 28Jolokegwa kipon yatselo anyugun le hagun genyu Sunggigü shwikerüchün nyu dan. Ai kejükelo kipon yatselo anyugun le anyugun bon nyu dan genyu Sunggigü kesonyu dan le. 29Kechamvule Sunggigü le kenrun nyu tha pe me ketsü lo me ko kethyü a-nyun kelula hü kemvu genyu. 30Nduka hagun le Sunggigü jo zenmvu hü ai ntsoka we Judanyu dan le a-jo zenmvu kela genyu hagun le a-keso pvü kelo hontse. 31Tsühontse hagun shwi njün keshü gü genyu tsüdan ai no shwikenjün hyulo nrün genyu anyugun le ntsoka a-jo zenmvu bin nyo. 32Kechamvule Sunggigü le temi aphu shwi njün keti shülo nrün genyu temi aphu khipe a-jo zen kemvu nyu shüla so.
Sunggigü Keshwe
33Hei Sunggigü kenya, a-thakesha lo a-kerüchün le ditsülaki ntsun yo no! A-le pe me nmu kehü lo a-tho dan segü le sha tilo gwa tila? 34Ketsinlesü le hihontse zo hünyo,
“Segü le Npugü nyu shalo la?
Nmvue segü le tsin pe a-hilo gwa la?
35Nmvue segü le a-no pe kethun ni nrün
genyu pe a-tsü ri shüla?” 36Kechamvule a-genyu lo a-le lo a-kipon tha aphu thyü külo. A-no kethonthen zankechwi gü thyülo! Amen
Currently Selected:
ROMNYU 11: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
