FILIPINYU 4
4
Senkethyü jo
1Tsügenyu apvünyu ju, aso kegwa ju, ale nnyü kehü ju, akenyü ju lo akeda perün ju hagun Npugü nyu tsekho binlo nye.
2Ale Iuodia lo Suntuki au no Npugü zan nyu kenyun rhün binlo tseo au ka zoshü hünyo. 3Lo ketsin gunda kekhen kerhün kethyü gü, ale n-kono tenunyu tsühvu keche shü kethyü le asherhün; kechamvule au le jolokegwa lotho nyu Klement sin-o azen lotho thyü kehü kerhün tsü lesü nyu zan thulo kela kecha ju zen-o yhenthyü gun keryü genyu.
4Hagun Npugü nyu sherhün zinlo. Ale kezosi zoni-e hagun sherhünlo.
5Hagun nyun kenzhü temi lihigüe no shalo chi. Npugü kho nni bin laso. 6Thame rüchün pe hagun nyun leho nya, ai tha lihikae kehithyü lo hagun kapu rüshvu lo Sunggigü shwen-o hagun kehi tsü Sunggigü no shalo chi. 7Lo nyun kebwen Sunggigü, nle sha tilo keho gü le Khrista Jisu nyu hagun nyun lo hagun kerüchün dan ntsen sen binlo ti.
8Tsüselo apvünyu ju, ketsin, teshwen, kenjü, kenshün, nkenyü ho kethyü lo rühvulo kekü thakegwa hihontse kethyü pe hagun nyun kesü thyülo. 9Hagun le aka sha kelo lo nyü kelo dan, ajo nyue lo atho nyue kehyu dan tsü thyü hü yatselo nyun kebwen khipe ngun tsüshü kehü Sunggigü le hagun zen bin loti.
Chenkeno Jo
10Hagun le aphin rüchün kehü genyu Npugü nyu asherhün sa bin laso; hagun le ketsin thyü aphin rüchün ai gwükho hyulo mvu hü. 11Ale jo hi kezo le arhodyü kebin genyu zomvu, kechamvule awe lihi thyü yatse-e kekenyo ndi. 12Ale rhodyü kethyü lo kesükela kethyü jvü sha, lithyü hithyüe, lihi gwünkho ka-e ale shabin nyo; kechon bin-e lo nnyon-e nnya-e lo ndi-e ale tedo tsüdan sha laso. 13Athyü nkvu shü kehü gü nyu ale tha aphu thyülo gwa.
14Ai hagun le a rhokedyü nyu a keche keshü hi gwa sale. 15Lo hagun Filipinyu le ale jolokegwa jün zo sokerika, ale Makedonia nken tin kezhü ka kehun kecha nme-e azen-o tha hoshü lo khilo-e mvu ai hagun nti tsekethyü hagun ko shabin nyo. 16Ale Thesalonia nyu kehü ka-e rhodyü kebin ka hagun le gwüngwa nme nti tha nipe atsümvu. 17Ale kenrunnyu tha lokenyü genyu mvu ai hagun no kechwi hyulo kenyü genyu. 18Hagun le nipe atsükeshü ale aphu hyulo laso, agenyu chonsa so, Epaphroditus le agenyu sen mvulo keshvu hagun le khikeshü tsü aphu sen ryüo atsü shü laso. Tha hidan hile Sunggigü mhundyü nyu tha rünkegwa kerüshvu Sunggigü le lolo kekü gü le. 19A Sunggigü le Khrista Jisu zankechwi kenya nyu hagun genyu mvulo keshvu aphu pe hagun tsüti. 20Ngun Sunggigü, ngun Pvügü no kethonthen zankechwi gü thyülo. Amen.
Kelu Keshü Jo.
21Khrista Jisu nyu kenshünnyu aphu kelushü le. A pvünyu azen kebin ju le hagun kelu shüle. 22Kenshün nyu ju aphu hagun kelu shü le, tsüdan nyu Kaisarnyu kaminyu le hagun kelu sa shü le.
23Npugü Jisu Khrista shwikenjün gü no hagun aphu zen bin kelo gü thyülo.
Currently Selected:
FILIPINYU 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
