KOLOSINYU 1
1
Kelukeshü
1Sunggigü kendo nyu Khrista Jisu apostel gü Paul lo asikezen gü Timothi hvule-
2Khipe Kolosinyu kebin Khrista genyu nshün lo joketsin nyu tsasikezen thyü kebin dan tsü shüle. Npvü Sunggigü kanyu chwikeryü keso lo nyun kebwen güno hagun zen bin kelo gü thyülo.
Sunggigü Keshwen Kehi
3Ayi le hagun genyu hikethyü ka Npugü Jisu Khrista A-pvü Sunggigü shwen bin hünyo. 4Kechamvule hagun le Khrista Jisu tenyen kehü lo Sunggigü temi dan aphu so kehü agun le nyü kelo genyu. 5Sidyü tsügü tsüle jolokegwa le ryü hagun tilo kerikanyu ketsin jo tsügü tsü hagun le nyülo laso. 6Jolokegwa tsügü le kazü aphu nyu a-sha nshao minkenye ryüo hagun tilo, tson-o hagun dan nyu Sunggigü shwikenjün sha tsentsü kelo nyü ryüo nthu keti hihontse bin nyo. 7Jo tsügü tsü hagun le ngun kengüo lotho thyü kehü ngun keso gü Epafra ka shalo. A-le n gun sunka ketsin thyüo Khrista lothyü hünyo. 8Lo a-le Kapugü le khipe hagun ketsü keso gü rüla-e pe agun ka zoshü.
9Hi genyu ayi le hagun rüla shakelo nyü ryüo nthu keti hagun genyu hibin hü nle. Kapu gü le khikeshü thakesha lo keka kepe sen-o Sunggigü kendo thakesha gü no hagun kesü thyü lolo tse hibin nyo. 10Tson loyatselo hagun le Npugü kendo gü lo a-kenyü gü thyü zin-o yhunlo ti; tson-o hagun keyhun le thatho kegwa aphu nyu hagun sha no bin loti, lo Sunggigü rüla kesha nyu min kenye loti. 11Hagun no a-zankechwi kekvunyu, kekvu aphu pe hagun thyü nkolo-o, shekerhün thyü nyhenhi binlo nda. 12Shekerhün thyüo Sunggigü nthyü pe nno a-temi dan zen-o keben raja phen nyu njün hyulo kekü thyü keshü Pvügü shwenlo. 13Kechamvule a-le kazü kenke günyu n zen chwiryülo-o n khipe a-nyu a-sogü raja nyu shü kelo genyu. 14A-genyu nhoshü laso, lo n kemu dan jüshü laso.
Khrista Lo A-tho
15Khrista le nyhütyü pe hyulo keho Sunggigü hontse kethyü gü, tha aphu n yhun keshü mhundyü n nyulo kela nyuri gü. 16Kechamvule a-genyu tha aphu n yhunlo, tsangge-e kazü nyue, kehyu dan-e hyu kemvu dan-e, kekvu dan-e lo Npu dan-e lo kekvu kesen nyu aphu a-le, lo a-genyu nyhun külo. 17A-le tha aphu mhundyü ki nyu hü lo a-genyu tsüdan aphu a-pepvü pvü a-bin ka bin lo le. 18A-le a-min, kehun gü tsügü pe gü, a-no tha aphu nyu keda tsin gü thyü nrün genyu, binzen gü lo kesinyu dan nyu n nyulo keri gü thyü. 19Kechamvule Sunggigü le a-jvü tsü aphu no Khrista ge bin titse kethyü le a-kendo kela genyu. 20Lo krus ge chwikeryü Khrista zipe gwatho lao tha aphu no a-zen kengü gwa kü lati tsekethyü genyu; a-genyu kazü nyu nmvue tsangge-e zen a-ki ryü ti.
21Hagun ko nduka we, tha gwakemvu thyüo hagun nyun ki Sunggigü shwinyü kemvu nyu thyü hü. 22Ai ntsoka we hagun no a-mhundyü nyu nshün, rhumvu lo mu lokeho thyü titseo Khrista min lo a-zi genyu hagun zen kengü gwalolaso. 23Hagun sidyü kegwa le kebin jolokegwa nyülo kelagü nyu tsü kelukenyon la mvutse, tsekho binlo yatselo tsühontse loti; jolokegwa tsügü pe kazü nyu temi aphu ka jünzo shü laso, ale Paul ako jolokegwa lotho higü hi thyü tin laso.
Kehun Nyu Paul Tho
24Ale n tsoka hagun genyu kenjün thyü bin-e a sherhün bin nyo; kechamvule Khrista le a-min gü, tsüle kehun gü sunka kenjünthyü kebin kon gü a thyü min kenjün kethyü nyu tsü thyü pen shü bin nyo. 25Sunggigü jo gü meno sha kegwa thyülo titseo hagun genyu Sunggigü lotho keda hinyu ano lotho nyu nme thyü laso. 26Ketsin jo kentsun tsügü pe nduka yhunkeri nyu dan kebu njüo henshwi pe a-temi dan hishü laso. 27Sunggigü le Juda kemvunyu dan nyu kenya zan kechwi kethyü jo kentsun higü hi pe me tesha shü titse kethyü a-kenyü la. Jo kentsun tsügü tsüle hagun nyu kebin Khrista gü, nsidyü zankechwi kethyü gü. 28Tsügenyu a hile Khrista rüla pe temi aphu ka zo hünyo, lo ahile temi lihigüe no Khrista nyu peshülo-o khipe Sunggigü tsülo titseo thakesha aphu sen-o meno petsü lolo tse me senthyü hü nle. 29Tsühontselo titseo anyun nyu kebin Khrista le khikeshü kekvu gü sen a hokeli lo ayhen thyü hünyo.
Currently Selected:
KOLOSINYU 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
