FILIPINYU 3
3
Kentsen Ketsingü
1Tsüselo apvünyu ju, Npugü no shekerhün pe hagun tsü salo. Thu keshü si nme thu nipe hagun ka shü yatse-e aketekhi mvule, hagun le tsügenyu gwakvu kethyü gwünzin. 2Tehidan genyu hagun petsü binlo chi, hagun nsü nshvu kehünyu genyue hagun petsü binlo a-gikerü rokethyü nyu genyue hagun petsü lo. 3Ngun hile gikerünyu ketsin, ngun we Kapu günyu Sunggigü rüshvu hünyo, lo Khrista Jisu genyu nsherhün hünyo, nthyü gü we tenyen hümvu. 4Peha le nthyü ge kethyü gü tenyen hü züle tse yatselo, awe tsünye ki ketekho kvu kethyüi. 5Nnyukelo jon tetsenyü agirü kelonyu, ale Israel nyu, Benjamin tsipwen nyu, ale Ibri ketsin nyu; tejvü kipon rüchün solo ale Farisinyu. 6Yhen kethyü kipon rüchün solo ale kehun kenshwen nyu; tejvü nyu kebin ju kezen genyu ntsen nshün lo tsekethyü kipon rüchün solo temi nme a nkhinlo ho. 7Tson yatse-e tha tsü aphu a mhundyü ka gwa letse kehü ju tsü ale ntsoka we Khrista genyu tha tsüdan tsüle gwa letse hümvu laso. 8Tsünyeki ale Npugü Jisu Khrista thakesha kegwa tsingü zen kendyü solo tha lihie ale tsü no tha letse bin mvu so; ale a-genyu thatsü aphu nmhen kü laso. 9Ale Khrista hyulo lo a-no a-nyun ki ahyulo nrün genyu ale tsüdan tsü pe kerhu khekela hontse laso; tson-o tejvü nyu kehü ju kezen genyu ale ntsen nshün kelo chünlo mvule, Khrista ketenyen genyu tsügü tsüle ketenyen sen-o Sunggigü kanyu kentsen nme hyu kelo le. 10Ale Khrista zenkeshalo njüo a-le rhünni keso kekvu gü shalo, lo a-le kenjün kethyü ka a-zen-o kenjün thyülo njüo a-kesi ka jvü hontse loti tsekethyü genyu. 11Tson-o ako kesinyu rünni solo titse ketenyen genyu.
Mhundyü hü Gunkejü
12Ale ntsoka tsüdan tilo la so nmvue gwa tilo sele tse zobin mvu; tsü tilo titseo hü gun jü nyo; tsüle Khrista Jisu le ryüo a tenlo kela genyu. 13Apv"nyu ju, ale tsü tilo laso tsekethyü rüchün bin mvu; ai a kerüchün gü le asikipon kehü rüchün mvuo a mhundyü ki kehü gü hü tenge tse hünyo. 14Khrista Jisu nyu Sunggigü le tesoki tha nme pe atsü titseo ako bin, ale tsügü hü gun zhü nyo.
15N gun kapu denzin peshü kelanyu aphu n nyun le tsühontse rüchün külo nu; lo hagun peha le thakecha rüchün binlo Sunggigü le higühi tsin pe hagun hishü ti. 16Tson yatse-e ngun le then gun ryüo hiti kelo jvü nyu tsonchü nishü nu.
17Apvünyu ju, hagun ko azen-o kesithen lo chi, lo agun le hagun mhundyü rio tsin pe hagun hikeshü dan nriryü binlo. 18Temi kechon ki rüla ale gwün kechon ki hagun ka zoshü so, lo ntsoka-e ale chüo hagun ka zoni shü titse bin nle, temi tsüdan keyhun le Khrista krus gü shwikerüchün nyu thyü laso. 19Temi tsüdan le hisiki nkela ti, anyugun ginda le anyugun terogü, anyugun kekejo tsüle anyugun kenyü gü, lo anyugun le kazü hinyu rüla fü kehü gwüzin. 20Ngun we tsangge temi le. Tsügenyu nne nkenikelo Npugü Jisu Khrista keryü khwen bin nyo. 21A-le a-npvü a-kendo thyüo tha aphu thyü pe a-hensin shülo kegwa kekvu gü sen-o nmin tenrenla lo kegwa higü hi thyü kelu pe a-min gigvü kethyü gü hontse loti.
Currently Selected:
FILIPINYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
