FILEMON 1
1
Kelukeshü
1Jisu Khrista genyu dothyü kebin gü Paul lo nsikezen gü Timothi au le thu pe npvügü kengü lotho thyü kehügü Filemon, 2n lügi Afia, lo n gun kengüo Khrista shüpahü thyü kehü gü Arkipa lo a-kanyu kequen kehü kehun gü ka keshü:
3Npvü Sunggigü lo n Npugü Jisu Khrista ka nyu shwikenjün gü lo nyun kebwen gü no hagun zen bin kelo gü thyülo.
Filemon Keso Lo Ketenyen
4Ale akehi kethyü nyu nrüla rüchün-o Sunggigü cheno bin hünyo. 5Kechamvule ale Jisu Khrista kipon n ketenyen rüla lo nle kenshün nyu aphu so kehü nrüla nyü kelo genyu. 6Akehi gü le nketenyen tho genyu Khrista nyu ngun hon tha kegwa dan aphu sha ntsenlo nrün genyu. 7Kechamvule asikezen gü n keso genyu kenshün nyu dan nyun gwün nrhün keshü rüla nyü pe akenyü lo anyun bwenlo kethyü genyu.
Paul Le Onesimus Genyu Filemon Ka Thakehi
8Tsügenyu, ale Jisu Khrista kipon we peche sa tse nno thyü kezü gü we thyülo lotse ahza pe ntsülo gwa. 9Ai keso genyu tsühontse kethyü gü mvule ale nka hishü bin nyo. Ale Paul, Khrista Jisu lothyü kehü güle, lo ntsoka-e a-genyu dothyü bin nyo. 10Ale dothyü ketseka a-pvü thyü kelogü anyugü Onesimus genyu ale nka hi hünyo. 11A-le himhundyü ki we nno a-genyu n kechwi ndi ryü, ai ntsoka we n-e lo a-e tse a-genyu kechwi le bin laso.
12Ale a-ni nipe nki shü bin, lo a npvü anyun nishü bin nyo. 13Ale jolokegwa gü genyu dothyü kebin ka a-no n sunka a lothyü bin nrün genyu a-no a zen bin tin kela le a kenyü bin nyo. 14Ai nka shün mvu tse ale thame thyüla nyü mvu, tson-o n kegwa gü no tenge tselo kela ge nyu mvule n npvü n kendo thyülo nrün genyu.
15Lo a-le gwüngwa nme nzen kekhola kethyü le nno kethonthen a-zen nilo nrün genyu ado. 16Donyu nme hontse mvu, ai tsünyeki keso asikezen nyu nme hontse laso, agenyu we, ayi thyümin kipon-e lo Npugü kipon-e ditsüki thyü nkho nni kvula sela!
17Tsügenyu nle arüchün pe ano nzen-o logwa nme thyü kehü nyu letse yatselo azen kelo hontse a-zenlo lo. 18Keshanyu laka a-le nge tha lihi thyüzü njü nmvue npu pvü bin yatselo azan nyu thu pe bin njülo. 19Ale Paul, a npvü aben pe hi thu shü le, ale gunryülo thola tile, ale nka zomvue nle nphou-e pe aketsüi le bin nyo. 20Ketsin le, asikezen gü, ale Npugü nyu nka kechwi peha lonyü bin nyo. Khrista nyu anyun gwün nrhün shülo.
21Nle akhwe nyüti lo ale zokeshü nyeki-e thyüshü titse kethyü ale tenyen tsentsüo thu pe ntsüshü bin nyo. 22Tsüntimvule agenyu ka tsenme ndo pe bin njü nye; kechamvule ale a kerüchün le hagun kehi nyu Sunggigü le akhipe hagun ki shü ti.
Kelukeshü
23Khrista Jisu genyu azen-o dothyü kebin gü Epafra le nkelushü le. 24Lo azen kengüo lotho thyükebin dan Mark, Aristerka, Dema lo Luk nyugun ko nkelushüle. 25Npugü Jisu Khrista kanyu chwikeryü shwikenjün gü no hagun kapu zen bin kelo gü thyülo.
Currently Selected:
FILEMON 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
