TITA 3
3
Khristian Nyu Jvü.
1Nle n temi dan no sorkari kesen nyu lo kekvu kesen nyu khwenyülo lotse kethyü, lo tsünyu jo zen, lo thatho kegwa lihi-e thyü titse ndo bin lotse zoshü nye. 2Anyugun no temi nme-e zo nshvula nya, kega keseri nya, anyugun nyun bwenlo, lo temi aphu mhundyü nyu benshunlo lotse zoshülo. 3Kechamvule ngun ko gwüngwa nme ka me jo zenmvu, lo tson gwünzü hü, lo nkenyü yhüdyü dan do thyü ryü, lo me ge nra kepvü lo nyhükethyü, me shwirüchün lo meko nshwirüchün tseo yhun ryü laso. 4Ai nkenikelo Sunggigü le temi shwikenjün, lo keso gü le me yhühyu thyü keryü ka, 5n kenilo laso, tsüle nle n npvü thatho kegwa lihi-e thyü keshü genyu mvu, ai a-npvü n shwikenjün genyu keyhun keshün kethyü nyu nsülao Kenshün Kapu nyu nthyü keshün thyülo laso. 6A-le nkenikelo gü Jisu Khrista genyu Kenshün Kapu ja pe nkesü kela thyü shü laso. 7Tson-o a-le shwikenjün genyu nno kentsen nyu thyülo, lo kethonthen kerhün hyulo titse kethyü kipon njün kebin nyu thyü kelo le.
8Jo hidan hile ketsin lo ale nno hidan hile mvulo keshvu tsin letse zoshü nyü bin nyo, tson-o Sunggigü tenyen kelonyu dan no thatho kegwa dan yhen thyüo thyülo nrün genyu. Hidan hile gwasa lo temi genyu kechwi le bin nyo. 9Ai ketsozü kemvu ketso-o kenyi kethyü, lo pvübon zan swü kethyü, kega keseri kethyü, tejvü gü zo-o kenyi kethyü, dan nrhilo; kechamvule tsüle thame kechwi ndi lo a-kenrun kethyü genyu. 10Temi me pvükho titse kehünyu gwüngwa gwünhvu ge kesü keshü siki we zen-o thame thyü nya. 11Kechamvule temi tsühontse kethyü nyu le ketsin gü nrhio gwamvu laso, lo a-le thyüzü kehü a-npvü sha bin nyo tsekethyü shalo.
Tita Ka Zokeshü
12Ale Artema nmvue Tukika nipe nki shülo nle Nikopoli nyu aki gunryü titse nyhen thyülo nye, kechamvule ale tsangse gwünkho ka tsü nyu bin titse rhilo laso. 13Nle nyhen thyüo tejvü keshagü Zena lo Apolos au le njwen kegun ka au cheshü nye, au no thame rhodyüla nya. 14Lo ngun temi dan no a-sha nshalo nrün genyu lo nmvulo keshvu ketsin nyu keche shülo nrün genyu thatho kegwa kethyü jvü shalo.
15Azen kebin nyu dan le nkelu shü le. Ketenyen nyu ngun so kehünyu dan kelushü lo.
Shwikenjün no hagun aphu zen bin kelo gü thyülo.
Currently Selected:
TITA 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
