IBRINYU 1
1
Sunggigü le A-nyugü Ge Bin-o Kezo
1Nduka kerika we Sunggigü le sidyükeshanyu ge gwün kechon tson kechacha kethyü kechon nyu nbon nyu nthon gunryü. 2Ai jon kekhin hidan ki we a-le kejü pe tha aphu sen kelo gü lo a-genyu kazü thyü kelogü Nyu nme ge n nthon shü laso. 3A-le Sunggigü keben kenyeni keshü gü, lo a-jo kekvu genyu tsang kazü aphu tezen sen bin nyo.A-le temi kemu thyü kenshün kethyü thyülao teso ge kekvu keda tsin gü njüzin bin laso.
Nyugü Le Tsangge Jolonyu Nyeki Gonkvu
4Tson-o a-le tsangge jolonyu nyeki zan kegwa tsingü hyu kelo hontse a-le anyugun nyeki gwakvu bin laso. 5Kechamvule Sunggigü le thame ka-e tsangge jolonyu nme ka,
“Nle Anyu le;
nthu ale n nnyulo laso.” Nmvue Sunggigü le tsangge jolonyu nme ka,
“Ale a-pvü thyüti,
lo a-le anyu thyü ti,” tson zo shwimvu.
6Sunggigü le a-nyuri gü nipe kazü nyu shünrün ka zo keshü le,
“Sunggigü jolonyu aphu no a-rüshvulo.”
7Tsangge jolonyu rüla we a-le kezo le,
“A-le a-jolonyu thyü pe tsangkenbu thyü lahü,
lo a-gonyu thyü pe mah kenyü thyüla hünyo.”
8Ai Nyugü ka kezo le,
“O Sunggigü, N Raja bin,
kethonthen bin ti!
Nle jo ketsin thün gü sen-o
Raja thyü ti.
9Nle kentsen so hü lo serikemvu shwi
ntsüla.
Tsügenyu Sunggigü n Sunggigü le
shekerhün terzü lope nyün pe nno
npvünyu nyeki gon kvu laso.”
10Lo a-le zoni,
“Npugü, NLe sokeri kanyu kazü gü
thyü shülaso,
lo nle n npvü nben lope tsang dan
thyü shü.
11Tsüdan we ndila ti, ai nwe
bin zin ti;
lo tsüdan aphu phi nya hontse
a-ren thyü lati.
12Tson-o phi hontse nle sükeryü lati,
lo phi hontse anyugun le kelu lati.
Ai nwe keme zin bin ti,
lo nchen dan le thame ka-e a-keni thyüla loho.”
13Lo Sunggigü le thame ka-e a-jolonyu nme ka-e:
“Ale n shwikerüchün nyu khipe
nphabin thyüla kemvu then
nle a njüzin binlo,” tse thu njü mvu shü.
14Tsüdan tsü aphu kenikelo hyulo nrün nyu dan genyu lothyü lotse nikeshü lotho kethyü Kapu dan mvu ole?
Currently Selected:
IBRINYU 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
