TSIPWESWÜ 13
13
Kanan Kazü Rüzü Lotse Keshü
(Tej 1:19-33)
1Npugü le Mosa ka zoshü, 2“Israel tsipwe tseryü kenyhun dan kami nme ka sharhi nyu nmeme kejü lo-o rüzü nyu thyüo gü ale pe Israel nyu tsü kebin kazü rhi nrün genyu nishülo.” 3-15Mosa le Npugü jozen-o Paran tehenyhunkemvu nyu sharhinyu ni keshü le hihontse:
| Tsipwe | Sharhi |
|---|---|
| Reuben | Zakur nyugü Shammua |
| Simeon | Hori nyugü Shaphat |
| Juda | Jephunneh nyugü Kaleb |
| Isakar | Josef nyugü Igal |
| Efraim | Nun nyugü Hoshea |
| Benjamin | Raphu nyugü Palti |
| Zebulun | Sodi nyugü Gaddiel |
| Manasseh | Susi nyugü Gaddi |
| Dan | Gemalli nyugü Ammiel |
| Asher | Mikail nyugü Sethur |
| Naftali | Vophsi nyugü Nahbi |
| Gad | Machi nyugü Geuel |
16Kazü gü rhi lotse Mosa le nikeshü rüzü nyu dan le hidan hi. A-le Nun nyugü Hoshea zan tho kela pe Joshua thyüla.
17Mosa le anyugun ni keshü ka hihontse zoshü, “Tesozin nsin-o Kanan kazü tesinzin güo tsüsika rincho ki külo. 18Tson-o kazü le dihontse yo, temi dikho le tsünyu yhun bin nyo, lo anyugun le nko bin le. 19Kazü güle gwa le shvuyo, tsünyu keyhun nyu le chwida khwen pe nyida dan hun le kendonyu bin nyo. 20Kazü le bwe le mvuyo lo tesen le yhun bin le mvuyo shalo lo. Lo tsünyu kebin terasha peha senryü lo.” (Tsüle vain le nyen so kela gwenkho.)
21Tsügenyu temi dan le tesozin nsin gü Zin tehenyhunkemvu tesinzin Hamath kazü kenchon tesozin khoka Rehob ki kegü tson aphu rhishü. 22Anyugun le kazü tesin kipon gürio Hebron ka ryülo, tsünyu thungin nyu Anakim tsipwe Ahiman, Sheshai lo Talmai kami dan le yhun bin. (Ijipt nyu Zoan thyükelo mhundyü chen tsenyü ka Hebron rünyi thyülo.) 23Anyugun le Eshkol ketejon ka ryüo Vainsha chwe nme duthülo, tsüle nsu sao sento pe rhishüo mihvu le pen. Anyugun le Kheratyü lo kherosha ko peha senryü. 24(Israel nyu le tsüka vainsha chweme düthü kelo genyu bin tsügü pe Eshkol ketejon thola.)
25Jon henzi kazü gü rhi tseo rüzü nyu le ranio 26Paran tehenyhunkemvu Kadesh ka Mosa, Aaron lo Israel nyu apentha kiryü. Anyugun le nyu hyuyo zoshü lo terasha gü pe temi da hishü. 27Anyugun le Mosa ka zoshü, “Agun le kazü gü rhi kegun ka tsüle kazü gwasa kethyü hyulo, lo tsünyu terasha peha le hile. 28Ai tsünyu keyhun nyu le kvusa, anyu rünyi le gon sasa lo chwida gwasa pe hun. Tsünyeki temi thungin nyu tsipwe le tsünyu bin le. 29Kazü gü tesinzin le Amelek nyu le bin; lo Kanan nyu le Mediterranean zida kho lo Jordan ri seki yhun bin nle.”
30Kaleb le Mosa ka kenya kebin dan no nramvu la njüo, “Ngun whütse gü kazü tsügü lo lola tile nu; ngun le tsü lolo la wa le,” tson zoshü.
31Ai Kaleb zen-o gü kethyü dan le zoshü, “Nmvu, ngun le anyugun hülo kemvui; tsünyu kebin temi dan le ngun nyeki kvu le.” 32Tson-o anyugun le rhi kethyü kazü gü rüla zo nshvu pe Israel nyu dan nyu shüla. Anyugun le zo, “Kazü tsügü le tsünyu keyhun nyu genyue tyükekü nyhunshü bin mvu lo agun le kehyu nyu aphu kethonkedada le, tson zoshü, 33lo agun le Anak tsipwe temi thungin nyu le tsünyu kebin hyu. Anyugun nrishüo ngun rüchün keshüle tsekhvu honla gwenzin le.”
Currently Selected:
TSIPWESWÜ 13: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
