TSIPWESWÜ 14
14
Temidan Le Kenyo Kethyü
1Khensin temi dan le anyugun sheseo chü. 2Anyugun le Mosa lo Aaron ge kenyao zoshü, “Ijipt ki nmvue hika tehen nyu sikela we gwakvu le! 3Nyuthyüo Npugü le agun zen-o kazü tsü gü ki gü jü nla? Mele terinyu agun dushvu lao agun nunyu lo agun nyenyu tün lo kelai. Ijipt ki rani kela le gwakvu mvu ti ole?” 4Tson-o anyugun le khinyunyu ka, “Ngun sharhi nme kejü lo-o Ijipt ki rani la tinu!” tson sola.
5Tsüselo Mosa lo Aaron au le temi aphu mhundyü nyu kazü nyu nkhün tsüla. 6Lo rüzü nyu dan nyu Nun nyugü Joshua lo Jephunneh nyugü Kaleb au le nyungwa mvuo au phi sürhen-o 7temi dan ka zoshü, “Agun le rhi kethyü kazü gü le gwaritsin. 8Npugü le ngun shwi a-kenyü yatselo, a-le ngun zen tsüki gü kenya kazü lo kazü kebwe tsü pe ngun tsüti. 9Npugü ntsun nya lo tsünyu yhun kebin nyu nshvunya. Ngun le nnesa tse anyugun so kvu loti. Npugü le ngun zen hü nyo lo a-le anyugun ntsen kehü terodan nyeki kvulo laso, tsügenyu nshvunya.” 10Süda apentha tso pe au jon shvula titse so, ai whütse temi dan le Phika gü soge Npugü kehü keben gü hyula.
Mosa Le Temidan Genyu Kehi
11Npugü le Mosa ka zoshü, “Temi hidan le dithen ki a-keni bin tila? Ale anyugun dan nyu nduntho kechon thyüshüe anyugun le dithen ki atenyen mvu bin tila? 12Ale kenpen nme nipe anyugun nke lati, ai ale nlope anyugun nyeki gonkvu lo kvu kvu kethyü tsipwe nme thyü shü lati!”
13Ai Mosa le Npugü ka zoshü, “Nle nkekvu ka Ijipt nyu temi hidan zenchwiryü laso. Nle ntemi ge nyuthyü shüyo Ijipt nyu le nyülo lo, 14anyugun le tsüpe kazü higü nyu keyhun nyu ka zoshüti. Npugü nle agun zen kehü temi hidan le nyülo, lo n nmhu le agun soge sun kebin nle nhennyu nmhu chwe nyu lo kheje ki mah chwe nyu agun mhundyü rikehü hyu tsentsü laso. 15Ntso ka nle ntemi aphu boshvu layatselo nzan kechwi rüla nyülo kela tsipwe dan le, 16nle temi dan zen chwigü nle pe anyugun tsü titse zo kenjü gü tiloho lao tehen nyu anyugun boshvula le tse ti. 17Tsügenyu Npugü ntsoka nle zokenjü nkekvu pe agun hio thatho thyüshülo tse hibin nle. 18‘Ale, Npugü, ale anyunta whütse la hümvu, Ale meso njün rio kemu lo gwakemvu kethyü nyu kemu jüshü hü. Tson yatse-e a-pvübon nyu kemu shaja pe a-nyenyu ju nyenyu phushen phuzi ki-e tsümvula hümvu.’ 19Ale nka hi hü nle Npugü, anyugun le Ijipt nken keshü ka ryü ntsoka keti nle anyugun kemu jüpe anyugun tsü keryü hontse kelula hü kemvu nkeso keda nyu temi hidan kemu jüpe tsülo.”
20Npugü le a-jokenishü, “N kehi hontse ale anyugun kemu jüpe tsüti. 21Ai ale rhün hü lo kazü sübin ketsin kethyü hontse ale zoshwishü bin nyo, 22temi hidan nme no yhun bin-o kazü ligü nyu yü loho. Anyugun le ale kehü kebengü hyu, ai anyugun le aseme nini tse lo a-jo zenmvu laso. 23Anyugun no thame kae ale zo pe anyu pvübon nyu tsü kenjü kazü gü nyu yü loho. 24Ai ago gü Kaleb le a-kerüchün kecha thyü lo asithen pen kelo genyu ale a-zen gü a-le rhi kethyü kazü gü nyu shüti, lo a-tsipwe no kazü gü lolo ti, 25Ameleknyu lo Kanan nyu le ntsoka yhun kebin ketejon nyu. Sendu ki ranio kazü zü le hunkenthün kesa kebin Aqaba den zin tehenyhunkemvu nyu gun lo.”
Kenya Kethyü Genyu Npugü le Shaja Pe Temi Dan Ketsü
26Npugü le Mosa lo Aaron au ka zoshü; 27“Temi serikemvu hidan le dithenki age kenya bin tila? Kenya kethyü kechon ale nyülo laso! 28Anyugun ka zoshülo: ‘Ale rhün ketsin thyü kehü hontse ale sweo zobin nle, hagun kehi hontse thyü pe hagun tsüti. Ale Npugü ale zoshü laso. 29Hagun no sio hagun simi no tehen yhunkemvu nyu nrenru lati. Hagun le age kenya kethyü senyu hagun chen nki so nyu nme no kazü ligü nyu yü loha. 30Ale hagun no tsünyu yhun titse zo njü, ai Kaleb lo Joshua au nti a-me hagun nme no yü loho. 31Hagun le mele hagun nyenyu tünlo kelai le tsezo ai ale anyugun zen gü hagun le kenikela kazü günyu shüti lo tsüle anyugun bin thyüti. 32Hagun we tehenyhunkemvu higü nyu si lati. 33Hagun kemu genyu hagun le sibula kemvuthen hagun nyenyu dan no tehenyhunkemvu nyu nmho-o chen henzi kenjün thyüti. 34Hagun le jon henzi kazü gü rhi kethyü khenyüme genyu chen meme thyüo hagun kemu chün hagun no chen henzi kenjün thyüti. Hagun no a ntsun kethyü kon le nyu yo sha loti! 35Kequen-o a ntsun kebin temi serikemvu dan ge ale hi thyü shüti tse swe bin nyo. Tehenyhunkemvu hika hagun aphu si lati. Ale Npugü, ale zoshü laso.’ ”
36-37Kazü gü rhi lotse Mosa le nikeshü temi dan le kenku jo sen keryü genyu temi dan le Npugü ntsun la. Tsügenyu Npugü le kenpen pe anyugun ge shüo anyu le sila. 38Rüzü nyu tseryü kenyhun dan nyu Joshua lo Kaleb au nti rhünlo.
Kazü Gü Hü Titse Ndo Kerigü
(Tej 1:41-46)
39Npugü le nyuzo shüyo Mosa le pe Israel nyu ka zo keshü ka, anyugun nyungwamvuo chüsa. 40Anyugun le lonyü nshwe rincho ki rünyi dan hüchwi titseo, “Npugü le ngun ka zo keshü bin gü ki gü titse nda lo laso. Agun le mu la sele,” tsonzo.
41Ai Mosa le zoshü, “Tsonlo hagun le nyuthyüo ntsoka Npugü jozenmvu hü nla? Hagun le kvulo kemvui le! 42Gü nya. Npugü le hagun zen hümvu, hagun shwikerüchün nyu le hagun nye kvu kelai. 43Hagun le Ameleknyu lo Kanan nyu teno lo hagun le terinyu sikelai, hagun le Npugü jozenmvu kela genyu a-le hagun zen hümvu laso.”
44Npugü zen Kejozenkelo Khinpha gü lo Mosa le kensenbin nken mvue, anyugun le nshvumvuo rincho ge küla. 45Tsontsin tsünyu yhun kebin Ameleknyu lo Kanan nyu le anyugun nye kvu lao anyugun hü gü Hormah tila.
Currently Selected:
TSIPWESWÜ 14: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
