TSIPWESWÜ 12
12
Miriam Le Shaja Hyukelo
1Mosa le Kushnyu tenunyu lo, tsügenyu Aaron lo Miriam au le a-kenkhin jo zola. 2Au le zo, “Npugü le Mosa nti ge bin-o tha zo ole? A-le ngun ge ko bin-o tha zomvu ole?” Npugü le tsü nyü lola. 3(Mosa le temi a-jvu kebwe nme, kazü nyu temi aphu nyeki a-jvu bwe.)
4Npugü le whütse Mosa, Aaron lo Miriam tse ka zoshü, “Ale hagun mishen no ale kehü Phika günyu chwiryü lanyü bin nyo. Anyugun le chwi, 5lo Npugü le n mhuchwe nme ka tsenryüo Phika gü khenpvü ka so lo-o Aaron lo Miriam au koshü!” tson-o au le chwi, 6Npugü le zoshü, “Ale nyu zo tiyo nyülo! Sidyükeshanyu le hagun dan nyu kehü ka ale tsemi ki lo mizhü ki anyugun nthon. 7Ale ago gü Mosa zen kenthon le a-kecha; Ale atemi Israel nyu aphu pe a-tenyen laso. 8Tsügenyu ale mhuntsun a-zen kenthon hü, jokerhon zomvu ai shünshvu tse; a-le ajoja ai hyu laso! Hai le ago gü Mosa kentsun jo zo nshvu mvula?”
9Npugü le au ge anyuntao tinla 10lo n mhugü le Phika gü kheo tinla ntsin nyu le Miriam tyüo a-gi le chon pe khütso hontsela. Aaron le tsügi shwishü laryü keho le a-ge bin kela hyulo, 11a-le Mosa ka zoshü, “Kedagü, ncheno-e ayi le kephanyu hontse kemuthyü kela higenyu shaja pe ayi tsü nyata. 12A-thyü peha tyülao a-no kesi nnyu kelo nyu hontse lanya ta.”
13Tsügenyu Mosa le Npugü ka kehi thyüo, “O Sunggigü, a-thyü ngwa shülo!”
14Tsontsin Npugü le a-jokenishü, “A-pvü le nsü pe a-mhun nye yatselo tsügi le jon tsenyü keja pfü ti. Tsügenyu jon tsenyü a-lope kensenbin tegwe ki khin lalo tson-o tsüsiki a-zen kensenbin nyu yüryülo.” 15Miriam pe kensenbin tegwe ki jon tsenyü khinla lo a-zen niryü kemvuthen temi dan le ketu shü mvula. 16Tsüsika anyugun le Hazeroth nken-o gü Paran tehenyhunkemvu ki kensenbin thyülo.
Currently Selected:
TSIPWESWÜ 12: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
