MARK 4
4
Ntsi Kegwün gü Rüla Jokejvü
(Mt 13:1-9; Lk 8:4-8)
1Tsüsika a-le züda kho nme ka me senthyü ni; tsontsin temi danda nme le ryüo a-khoka kequenlo. 2Tsügenyu a-le run nme nyu yü-o züda nyu dunlo; lo temi dan le züda seki kazü kesin ki binlo, tsontsin a-le jokejvü ki tha kechon zope anyugun senthyü.
3Lo anyugun senthyü keshü ka a-le anyugun ka, “Nyülo chi! Hire, ntsi kegwün gü le ntsi gwün titse tsü. 4Lo a-le ntsi gwün shü ntsin, peha le tsonte ki chela, tsontsin tegü le ryüo tsüdan jüntyüla. 5Lo ntsin peha le tso soge chetsü la, 6tson-o nnyon le tso so rüpvüri kethyü genyu tsü whü chwiryü; ai tsang le nnyü chwiryü ntsin pho rügula, tson-o a-men kendi genyu rüguo sila. 7Lo peha le tsehü dan nyu chetsü la, tson-o tsehü no yhun chwiryüo a-zeü pe a-no a-sha nshalo mvula. 8Lo kechanyu we kazü kegwa nyu chetsülo, tson-o tsüyhun soryüo a-sha nshalo, peha le shenryü, lo peha le hentsero, lo peha le tsi-e nshalo.”
9Tson-o a-le, “Temi lihigüe a-nyetin le kebin nyu tsünyu no nyülo chi.”
Jokejvü gü Kon
(Mt 13:10-17; Lk 8:9-10)
10Tsükatsü a-le a-npvü kebin ka tseryü kenyhunche dan le ntsi jokejvü rüla a-ka ketso. 11Tsontsin a-le anyugun ka, “Tsangge keda rüla jokentsun dan lope hagun ka zoshü laso; ai tegwenki kebin nyuka we jokejvü tha lihi-e pe anyugun ka zohü. 12Kechamvule,
‘Anyugun le kehyu we hyuti,
ai sha loho,
anyugun le kenyü we nyü ti,
ai rüchün loho.
Anyugun no ho ni ryüo, anyugun kemu
jünikelo kenshvu genyu.’ ”
Jisu Le Ntsi Kegwün gü Rüla Jokejvü Gü Kon Zokeshü
(Mt 13:18-23; Lk 8:11-15)
13Tson-o a-le anyugun ka, “Hagun le jokejvü higühi shamvu ole? Tson yatselo hagun nyutsethyü jokejvü aphu shalo mon? 14Ntsi kegwün gü tsüle Jo lope gwünshü hü. 15Tsonkho ka cheketsü jo dan tsüle, anyugun le jo tsü shalo ntsin satan le whütse ryüo anyugun nyun nyu chetsükeryü jo tsü seü sen tinla kehü ju le. 16Tso soge ketsünyu dan tsüle, anyugun le jotsü shalo ntsin anyugun kenyü sa tse zen whütselo. 17Ai anyugun nyun ki anyugun men kendi genyu gwüngwa nti bin kelo gwünzin la hü; tsüsika jo genyu kenjünkethyü nmvue nthyünnyü kethyü le soryülo a-nyun ranila kehü ju. 18Lo tsehü dan nyu keyü ntsin dan tsüle, jo tsü shalo njüo ntso ntsenyü keyhun ka rüla rüchün pe a-nyun kenjün kethyü ju, lo nsala kehü kanyü, 19lo thakecha ketepen jvü gü tsü le anyugun nyun ka yülo njüo jo gü takemhenlao anyugun sha nshalo mvukela dan le. 20Lo kazü kegwa nyu chetsü kelo tsi dan tsüle, jo tsü shalo njüo pe anyugun hon thyülo, tson-o anyugun sha shenryü, hentsero, lo tsi nshalo kehü dan le.”
Rokhu Hensin Makenben
(Lk 8:16-18)
21Tsüntimvule a-le anyugun ka, “Mele makenben sen gü makenben bin ge shümvuo khipe tha hensin ki nmvue rokhu no rünla hü le? 22Kechamvule pe me teshashü titse kethyü a-me tha nme-e kebu kethyü kon ndi; lo me no shalo titse kethyü a-me thame tesütebu kethyüi ndi kethyü genyu. 23Temi lihigüe a-nyetin le bin-o nyülo kenyünyu tsünyu no nyülo chi!”
24Lo a-le anyugun ka, “Hagun tha nyülo kehü nyu petsülo chi; hagun le ndo keshügü nyu ndoni pe hagun tsüti. 25Kechamvule temi lihigüe kebin gü le pe tsü sinshü ti; lo temi lihigüe kendi gü we a-ben nyu keshanyu le kebin tsüe senni tinla nrün genyu.”
Low Le Tsüchwiryüo Gonkelo Pe Jokejvü Kezo
26Lo a-le, “Sunggigü keda le temi nme le ntsi sen tsügü kazü nyu gwünshüo, 27khejeki gungü zhü tinla, lo tsangbenlo lo soryüo ntsi tsüle dihontse tsüsoryüo gonlo hüyo tsekethyü shakemvu keme. 28Kazü gü le a-npvü a-sha nshalo, a-nyü senlo teri, tsüsika a-pwen, lo tsüsika a-pwen nyu a-tsin le a-sü chwiryülo hü. 29Tson-o a-low nyu a-shye tsüle nyenlo ntsin logvü gwünkho tikela genyu temi tsügü le a-zonkhi sen tsüryü hü.”
Hennyontsi Lope Jokejvü Kezo
(Mt 13:31-32,34; Lk 13:18-19)
30Lo Jisu le anyugun ka, “Ngun Sunggigü keda lope nyu ndyüshü mon? Nmvue nyu lope jokejvü zo-o me senthyüshü mon? 31Tsüle hennyon tsi keshen nme hontse; mele tsü sen tsügü kazü nyu yi keshü ka tsü le hentsin dan nyu a-tsi keshen tsin nme thyü. 32Ai sen tsügü yishüo tsüchwiryülo hen aphu nyeki gonla hü; tson-o a-ro kedada sen chwiryüo tegüe no a-hensin sunlo kegwa thyülo hünyo.”
33Lo tsüntimvule a-le anyugun no shalo kegwa thyüo jokejvü kecha ki-e pe anyugun ka zo. 34Lo jokejvü sen mvutse a-le anyugun ka thame zoshü mvu. Ai senthyükelo nyu npvü ka a-le tha aphu kon zope anyugun hishü hü.
Jisu Le Tsangkenbu Kesükela
(Mt 8:23-27; Lk 8:22-25)
35Lo tsünyü tsü n gwünki a-le anyugun ka, “N gun züda pere lukipon küla ti je.” 36Lo tsükatsü anyugun le temi dan khelao Jisu run nyu anyugun pvü kesin gunzhü; lo run kecha dan me-e anyugun zen hü. 37Lo tsükatsü tsangkenbu terhi nme le soryüo zü whünkenu keshü no ketyü pe züno run sülo güzhü la. 38Lo tsügwünkho ka Jisu le run siki bin nme ge zhü bin; lo anyugun le gü a-kesun-o aka, “Senkethyü gü, ngun le sigü zhü lae n we nnyun nkhi mvu ole?”
39Tsontsin a-le soryülo njüo tsangkenbu kesüshü, lo züda ka, “Nle ma tse binlo,” tsonshü, tsonshü ntsin tsang le nbu mvuo ntsema tsela. 40Lo tsüsika a-le anyugun ka, “Hagun le nyuthyüo nshvu hü nla? Hagun le ntsokhin-e hagun ketenyen le binlo mvu zun ale?”
41Ai anyugun le nshvu pe ketetsin thyüo khinyunyu ka, “Temi higü hile temi nyutse kethyü nme la? Tsangkenbu lo zü kedae a-jo zen kehü hile!” tson.
Currently Selected:
MARK 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
