MARK 5
5
Jisu Le Terogwakemvu No Semen Zen Kehünyu Nme Thyü Ngwakeshü.
(Mt 8:28-34; Lk 8:26-39)
1Tsüsika anyugun le tin sen-o züda se lukipon Gerasin lojvü nyu gunlo. 2Tson-o a-le run nyu chwiryülo ntsin nshünkemvu kapu no semen zen kehünyu nme le sika nyu tinchwiryüo a-zen ketenolo. 3Lo tsügü le sika nyu bin hü gwünzin; temi nme tegiron-e pe a-phin sen binlo mvula. 4Mele gwün kechon tegi ben kekhin lo tegiron pe a-pha a-ben phin, ai tsü aphu ka a-le tegiron dan bosebore lala lo tegi dan apha pe kedüren lahü. A-le nkonrio temi nme a-khin senbin kelo kekvu ndila. 5Lo a-le tsangkenben ki-e lo tsangkezün ki-e rincho ge lo sika nyu binzin tinla, tson-o a-le nra sen-o tso-e pe a-npvü a-jon zin hü tinla.
6Lo a-le nithen ki Jisu hyushüo ryüo a-pha ka a-rüshvu so. 7Lo a-le nra sen-o, “Ketetsotsin gü Sunggigü Nyugü, ale Sunggigü zan sen-o zoti, Nle a nthyü nnyü nyata,” 8kechamvule Jisu le a-ka, “Hire, nshünkemvu kapu, nle temi higü ge tinchwila lo!” tsonso kela genyu.
9Tsontsin a-le tsügü ka, “Nzan le segü la?” tson-o ketso.
Lo tsügü ko a-ka, “Azan le Legion le! Agun le kechonki kehü genyu.”
10Tson-o tsügü le Jisu no kazü tsügü nyu gwakemvu kapu dan hüshwi nyalo tse kethyü a-ka hi tenge tseso.
11Lo tsügwünkho ka tsü tebo dan me le rincho phaki hotyü bin. 12Tsüselo nshünkemvu kapu dan le Jisu ka hi tenge-o, “Nle agun nipe tebo dan nyu shüla lo, lo agun le tsüdan ge gü lati,” tson sola. 13Tsontsin a-le anyugun no gunla lotse zoshü la, lo nshünkemvu kapu tsüdan le a-ge chwio tin sen-o tebo dan nyu yüla. Tsontsin tebo yie kenyhun dan le tin-o tsokhin nyu teso tsügü züda nyu yüo anyugun nrheshvu küla.
14Lo tsüdan kekhwenyu le gungü rünyi nyu-e lo low nyu-e me tephu küshü; tsontsin nyu thyüla seyo tsekethyü shwi titseo mele aphu tin ryü. 15Lo anyugun le Jisu ki gungü tero gwakemvu no semen zen kehü gü, a-kon le nduka Legion no zen kehü gü le a-nyun ntsenla lo a-phi ben-o dun kebin hyulo-o anyugun le nshvu sala. 16Lo tsüsika tha tsü kehyu danle tero gwakemvu gü no semen zen kehü gü ge thyükela lo tebo dan rüla pe me ka zoshü.
17Tsontsin rünyi tsünyu kebin nyu danle a-no anyugun nken tinla lotseo anyugun le a-ka hi tenge tselo la.
18Lo tsüsika a-le run nyu yüzhü ntsin nduka tero gwakemvu no semen zen kehü gü le Jisu zen tinla titse hi tenge tse sola.
19Ai Jisu le nmvu letseo a-ka, “Nle ka ki ranio nkaminyu ki gunlo, lo anyugun ka, Npugü le n ge thakeda hitsüki thyüshü letse kethyü, lo a-le n njün pe hitsüki thyü keshü pe zoshü chi!”
20Tsüselo a-le gungü Dikapoli rünyi dan ka Jisu le a-ge thakeda ditsüki thyüshü yo tsekethyü pe meka zoshü; tson-o temi aphu no a-dun thyü sala.
Jisu Le Jaira Nyugi Thyü Nrhünkeshü Lo Tenunyu Nme Thyü Ngwakeshü
(Mt 9:18-26; Lk 8:40-56)
21Tsüsika Jisu le run nyu tin ni sen-o züda se lukipon külo ntsin, temi danda nme le ryüo a-khoka kequenlo; lo a-le züda khoka binlo. 22Lo a-zan le Jaira tsekethyü sinagog ka nyu kedanyu nme le tsüka ryüo a-hyushüo temi tsügü le Jisu pha nyu zhütsülo njüo aka, “Anyugi le sigüzhü laso; 23a-no gwalo-o rhünlo nrün genyu nle ryüo nben pe a-kesü shüta!” tson-o a-ka hi tenge tse sola.
24Tsontsin a-le temi tsügü zengun, lo temi danda le a-sithen-o a-khun minmin tse gunla.
25Lo tsükatsü tenunyu chen tseryü kenyhun che a-ge tezi tsun-o, 26dawa keshanyu kechon no a-shwio, a-hon kebin aphu nkebu lae gwakelo gü mvule shvu ketsintsin tsekela nme. 27A-le Jisu rüla shashüo temi danda dan nyu tin sen-o Jisu siki ryüo a-phi kesü shü. 28Kechamvule a-le a-npvü a-nyunki, “Ale a-phi kesülo-e gwa loti,” tsonkethyü rüchün hü kela genyu.
29Lo tson-o a-le kesü shü ntsin a-ge tezi tsun kehü tsü le sin whü tsela. Lo a-keho le gwalo kela a-npvü a-ge shalo. 30Tsontsin Jisu le kekvu le a-ge chwikela shalo njüo rani gü lukipon hikipon temi dan nrio zo, “Segü le aphi kesü shüla?”
31Tsontsin a-le senthyükelo ju le, “Temi le nta minmin tse kebin pvünyu, ‘Segü le akesü shüla,’ tson ti ole?”
32Tson-e a-le rani gü a-kesü keshü gi nrishü titseo a-le lukipon hikipon nri so. 33Ai tsüka tenugi le a-ge tha nme thyükela shashüo nshvu ndün-o ryü a-pha nyu zhülo, tson-o a-ka joketsin zoni küshü la. 34Tsontsin a-le tenugi ka, “Anyugi, nketenyen le a-npvü nthyü ngwashüla sele nye. Nkeho no gwalo-o ndyü ben gunlo!”
35Lo a-le jo tsü zokebin ka me le sinagog kanyu keda gü ka ryüo a-ka, “Nyugi le sila sele! Nyuthyüo senkethyü gü no gun kenjünthyü sin bin tila?”
36Ai Jisu le jo tsü shakemvu rothyüo sinagog ka nyu kedagü ka, “Nle nshvu nya, tenyen binlo.” 37Lo tsükatsü a-le Pitor lo Jakob lo a-sikezengü Johan tsü nyeki temi kechanyu no a-sithen mvula. 38Lo anyugun le gü sinagog ka nyu kedagü ka tilo ntsin mele chekechü le ketetsin thyüo dada tse kebin hyulo. 39Tsüselo a-le kanyuki yügü anyugun ka, “Hagun le nyu thyüo chü ndyü bin nla? Nyu higi le sila mvu, ai zhü bin nle.”
40Tsontsin anyugun le a-shwinyü sola; ai a-le temi tsüdan no kamhun ki chwiküla-o tenugi a-pvü lo a-jvü, lo a-zen kehü senthyükelo nyu dan tsü zen-o tenugi le zhü kebin tsen ki yüla. 41Tson-o a-le yügü tenugi ben sülo njüo a-ka, “Talitha koum,” a-kon le “Ashenle, ale nka zoshü bin nle, solo chi!” tsonshü.
42Tsonshü ntsin nyugi tsü le so-o tsonchü tinla; a-ko chen tseryü kenyhun che nyu nme thyü kelasi genyu; lo tsonshü ntsin me no me dun thyü sala. 43Tson-e a-le me no tsü shamvu lo nrün genyu temi tsü keshanyu dan khin tenge tsela; tson-o a-le, “Tha pe tsügi tsü shüo no tyülo lo,” tse zoshü.
Currently Selected:
MARK 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
