MARK 3
3
A-ben Kesinyu Nme thyüngwa Keshü
(Mt 12:9-14; Lk 6:6-11)
1Tsüsika a-le sinagog ka nyu yü ntsin, temi a-ben kesinyu nme le tsünyu bin. 2Tsükatsü anyugun le a-nkhin kelo rüchün-o Kenshün jon nyü a-le temi higü thyü kesherhün shüti le mvuyo tseo a-nri ton bin. 3Tsontsin a-le a-ben kesi gü ka, “Solo-o npha ryü re,” tsonshü. 4Tson-o a-le anyugun ka, “Kenshün jon nyü me ge thakegwa kethyü le, le me ge thagwakemvu kethyü le tejvü la? Me thyü nrhün tile me dushvu tila?” tsonso.
5Ai anyugun le matse tinla. Tsontsin a-le anyugun nyunkerü rüchün pe a-nyunta, lo anyugun gwakemvu genyu a-le rani-o likipon hikipon nrio temi tsügü ka, “Nben ketoshü chi.” Tsontsin a-ben shwenshüo a-thyüngwalo. 6Tsüsika Farisinyu dan le kenyunrhün gü Herodia nyu dan zen-o Jisu boshvu kela rüchün-o kenthon so.
Temi danda Le Galil Züda Seki Jisu Fü Keryü
7Jisu le senthyükelonyu ju zen-o Galil züda kipon gunla; tsontsin Galil nyu temi danda nme le a-sithen lola. 8Tsüntimvule Judia, Jerusalem, Idumia nyu lo Jordan ri kho likipon lo Tur lo Sidon kerhon kipon temi danda nme le, a-le thyükeshü shakelo genyu a-ki ryü. 9Tsontsin me no a-tamvu titseo temi dan genyu senthyükelonyu ju no run keshe nme ndo pe a-khwen binlo tsela. 10A-le temi kechon thyü n gwashü kehü genyu keho le a-ge kebin nyu aphu a-kesü titseo a-then chuchu tse kehü genyu. 11Lo nshünkemvu kapu dan-e a-hyulo ntsin a-mhundyü ka zhütsülo njüo, nra sen-o a-ka, “Nle Sunggigü Nyugü le,” tson sola. 12Ai a-le anyugun no a-rüla zope me tesha nyalo tseo anyugun kesinni shüshü tse tinla.
Jisu Le Tseryü Kenyhunche dan Kejükelo
(Mt 10:1-4; Lk 6:12-16)
13Tsüsika Jisu le rinchothun ge külo njüo a-kendo nyu dan no a-ki ryülo tse koso. Tsontsin anyugun le a-ki ryülo. 14Tsükatsü a-le temi tseryü kenyhunche no a-zen hü lo tse, lo a-le anyugun nipe me senthyü titse, 15lo terogwakemvu hülo nrün kekvu pe anyugun tsüti tseo anyugun kejülo.
16Tsüdan tsüle: Simon, Jisu le a-lope Pitor thyü kelagü, 17lo Zebedi nyugü Jakob lo a-sikezen gü Johan; a-le tsühvu zen thope Boamerges, a-kon le “Tsangkesen nyu hvu” tseshü. 18Lo Andria, Filip, Bartholoma, Mathi, Thoma, Alfia nyugü Jakob, 19lo Thadia, lo Kanannyu gü Simon; lo a-tenpe me ben nyu shü kela gü Iskariot Judas.
Jisu Lo Belzebul
(Mt 12:22-32; Lk 11:14-23; 12:10)
20Lo tsüka a-le ka nyu yülo. Tsontsin temi dan le ryüo kequen salo, tson-o anyugun no tyütsülo shvula. 21Lo Jisu kaminyu dan le tsü shashüo gungü a-zenlo lati tse sola; kechamvule anyugun le, a-le nnu binla sele tse so kela genyu.
22Lo Jerusalem nyu nshye keryü lesü keshatsin nyu ju-e, “A-le Belzebul zen hü laso, lo terogwakemvu kedagü zen-o terogwakemvu ju hüla hü nle,” tson sola.
23Tsontsin a-le tsüdan kope a-ki shülo njüo jokejvü zo-o anyugun ka, “Satan le nyu tsethyü satan hü logwa tila? 24Lo raja lihigüe a-npvü a-pvükho titselo, raja tsügü le binlo hola ti. 25Lo ka lihigüe a-npvü a-pvükho la yatselo ka tsügü le bin loho lati. 26Lo Satan-e a-npvü a-shwirüchün-o kepvükho hü yatselo a-ko binlo hola-o nke lati.
27“Ai temi nme-e kekvunyu phinlo ri kemvu we a-ka nyu yüo a-kanyü khilo ho; ai phinlo terio a-kanyü khilo gwa.
28“Ale hagun ka zo tsentsü shüti le nje ntsenyü ju kemu aphu lo anyugun le me nkhin kehü jo aphu jü pe anyugun tsü shüti. 29Ai temi lihigüe Kenshün Kapu kenkhin nyu we thame kae jü pe tsü loho, ai kethonthen kemu kipon a-no mu tin lati.” 30(Jisu le hi zo shü kechamvule temi peha le, “A-le nshünkemvu kapu zen hüla sele,” tse kezo genyu.) zo kehü genyu.
Jisu A-jvü lo A-sikezennyu dan
(Mt 12:46-50; Lk 8:19-21)
31Lo tsükatsü a-jvü lo a-sikezen nyu dan le ryüo kamhun ki bin-o me nipe a-ki shüo no a-ko. 32Lo tsükatsü temi dan me le a-hunpvü bin laryü anyugun le a-ka, “Hire, njvü lo nsikezen nyu ju le nfü ryüo kamhun ki dun bin nle,” tsonshü.
33Tsontsin a-le anyugun ka, “Ajvü lo asikezen nyu dan le senyu la?” 34Tson-o kerükerio a-hunpvü kebin nyu dan nrio anyugun ka, “Hidan hile ajvü lo asikezen nyu dan le! 35Kechamvule temi lihigüe Sunggigü kendo thyülo zen kehünyu, tsünyu le asikezen nyu, lo a lüginyu, lo a jvü kethyü genyu.”
Currently Selected:
MARK 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
