MIKAH 5
5
1Jerusalem temidan, rihüdan, kequenlo! Mele ngun hunlo laso! Anyugun le Israel sharhi dan when bin so!
Sunggigü Le Bethlehem Kipon Kekvu kesen nyu Nme Pe Tsüti Tse Zoshwishü
2Npugü le zo, “Bethlehem Efrata, nle Juda kazü nyu rünyi keshentsin nme, ai ale ngen, nduka nyu hükela kami gen Israel kentsengü zen chwiryüti.” 3Tsügenyu tsügü zenshü nrüngi le a-nyu nnyu kemvuthen Npugü le a-temidan khepe anyugun shwikerüchün nyu tsü lati. Tsüsiki me kazü nyu kebin a-pvünyuju le anyugun temi dan zen-o kerhünni loti. 4A-le ryülo, a-le Npugü ki keryü kekvu lo Npugü Sunggigü terün sen-o a-temi ketsenti. A-temidan le nyun nkhimvuo bin loti, kechamvule kazü nyu temi aphu a-keda shati, 5lo a-le gwaketho sen ryü ti.
Khishwikelo Lo Shaja
Assiria nyu le ngun kazü hüryüo chwida boren yükeryü ka, ngun le ngun sharhi kenkotsindan nipe anyugun zenkerenti. 6Anyugun le terikanyü kekvu nyu Assiria, Nimrod kazü gü so kvu loti, lo Assiria nyu le ngun kazü hükeryü ka anyugun ben nyu ngun keni loti.
7Israel temi rhünkelonyu le senye kechon genyu Npugü ki nikeshü khüzü hontse, lo tehen gen tsangkenri zü hontse ti. Anyugun le temi gen mvule Sunggigü nngüo yhunti. 8Senye dan nyu khekela dan le shünyho le a-chvu füo chün lo shai ki thyühü kehü hontse ti, a-le tanyü dan nyu güo tsüdan gen nchwe küo anyugun tsothürükela hontse, lo kenishwikelo kenrin thame ndi lati. 9Israel le a-shwikerüchün nyu so kvulo-o tsüdan aphu nke lati.
10Npugü le zo, “Tsügwenkho ka ale hagun keru dan zen tinla lo hagun terigari dan nke lati. 11Ale hagun kazü nyu nyida nkela lo chwida aphu borenla ti. 12Ale nle sen-o jadu thyü kehüdan nkela tson-o mhundyü ki ryükejü rüla zokehü nme-e bin mvu lati. 13Ale nteromenkezü lo tsokesen dan nke lati; nle n- npvü kethyü rüshvusin mvu lati. 14Ale nkazü nyu nterogi Asherah menkezü süshe lo nnyida dan nke lati. 15Lo anyunnta sao senye aphu ka ajo zen kemvu dan gen akhün loti.”
Currently Selected:
MIKAH 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
